Mathayo 14 - Lek Jot de Jecu Kritho 19401 Yerune aci Kerod teterarke thoŋ de Yecu piŋ, 2 go awuutke yɔɔk, Ye kee Jɔn Baptith; ee rɔt jɔt ne thouic, a keeriirke aa loike ne yen. 3 Kerod ee ci Jɔn dɔm, ku deer, ku tɛɛu ɣon de dom ne ke de Kerodiath tiŋ de manhe Pilip. 4 Ne ke ci Jɔn ye yɔɔk, Ye kaci piath bi tɔ ke yi. 5 Ku nɔŋ piɔu bi cɔk thou, ke jɔl riɔc ne duut, ne ke ye kek ye cɔk ye nebi. 6 Na ci akol ne dhiethe Kerod bɛn, ke nyan de Kerodiath diɛr ne keciɛl yic, cɔk Kerod lɔ piɔu yum. 7 Go luel abi mel kueeŋ ye bi yiɛn ke dɛ ke thiec. 8 Ku cii man piɔc, jiɛm, Ye yiɛne ɣa nom de Jɔn Baptith ne alɛcic. 9 Go melek piɔu dhiau. Ku luel ye bi yiɛn en, ne ke cen mel kueeŋ ku ne kɔc yic kɔc rɛɛr kene yen te de miɛth. 10 Go toc, ye teeme Jɔn nom wei ɣon de dom. 11 Go nomde bɛi ne alɛcic, ku yine nya; go yiɛn man. 12 Go kɔcpiocke bɛn, ku lomki guɔp, ku lek thiɔk; ku leki lek lɛk Yecu. 13 Na ɣɔn ci Yecu ye piŋ, go rɔt liip etɛɛn ne riai, leer roor telaau. Go duut piŋ, goki biɔth ne kecok ne bɛi yic. 14 Go bɛn, ku ŋem dun dit; go piɔu kac ne keek, ku cɔk kɔcken bec cɔk dem. 15 Na ɣɔn thei ke kɔcpiocke bɔ enɔŋ en, jamki, Yi yetene kee roor, ku akɔl acol; ciec duut, bik lɔ ne bɛi yic bik roth lɔ ɣɔc miɛth. 16 Go Yecu ke yɔɔk, Ye kacin ke nyiɛi ke; yiɛnka ke ke bik cam. 17 Goki yɔɔk, Yi wɔ nɔŋ monoi keedhiec abac ku rec keerou. 18 Go luel, Ye yiɛneke ɣa. 19 Go duut yɔɔk bi nyuc ne noon nom. Ku loom monoi keedhiec ku rec keerou, ku liec nhial, ku thiei ke, ku wɛɛk ke, ku yin keek kɔcpiocke, bik ke yiɛn duut. 20 Goki cam kedhia abik kuɛth. Ku jɔlki thethuei cikke both kuany ne thiaŋ akuɔp keethiɛr ku rou. 21 Ku kɔc eke ciɛm aaye bianabur dhiec, ke cin diar ku mith. 22 Go kɔcpiocke dac yɔɔk bik lɔ riɛi bik ye ŋaar lɔŋti, agut te ben duut cɔk puɔk. 23 Na ci duut cɔk puɔk, ke lɔ ne kuur nom yetok le lɔŋ: ɣɔn thei ke tɔ eeti yetok. 24 Ku tɔ riai ne bar ciɛlic, ku thieth atitiak, ee lor yomic. 25 Ɣɔn ne tiɛt de ŋuan de wɛɛr, ke bɔ enɔŋ ke, ke cath ne piu nhiim. 26 Ana ye kɔcpiocke yi ŋemki ye ne cath ne piu nhiim, e ke mum nhiim, ja ki, Yi kee jɔk: ku kuuiki ne riɔc. 27 Go Yecu ke dac yɔɔk, jiɛm, Ye miɛtke piɔth; ee ɣɛn; duɔke riɔc. 28 Go Petero dhuɔk en, jiɛm, Ye Bɛny, na ye yi, ke lɛke ɣa ba lɔ enɔŋ yin ne piu nhiim. 29 Go yɔɔk, Ye bar. Go Petero kɛɛc piny riɛi, ku ciɛth ne piu nhiim leer enɔŋ Yecu. 30 Ana ye ŋem yom, ke riɔc; ku leer ke diir, ku kuui, jiɛm, Ye Bɛny, luak ɣa. 31 Go Yecu yeciin dac thiu, ku dɔm, ku yook, Ye yin ran de gam koor, yeŋo riɔc yin? 32 Wen ci lɔ riɛi, ke yom lɔ diu. 33 Go kɔc tɔ riɛi door, jamki, Yi kee yic, Yin ye Wen de Nhialic. 34 Na cik tem lɔŋti, e ke lɔ piny cɔl Genethareth, 35 go kɔc ke yepane nyic, goki tooc piny thiak ke keek ebɛn, ku biiye kɔc bec enɔŋ en kedhia. 36 Goki lɔŋ bik alanhde jak thok. Go kɔc ci ye jak kedhia goki pial. |