Mathayo 12 - Lek Jot de Jecu Kritho 1940

¹ Yekole aci Yecu lɔ cath ne duum yic ne ye kol e thabath; ku ci kɔcpiocke cɔk, goki rap doony ku camki ke.

² Na ci Parithai ye ŋem, goki yɔɔk, Yi ŋem, kɔckuk piɔceke, aaloi ke ce piath ne kol e thabath.

³ Go ke yɔɔk, Ye kɛnka ke cii Dabid loi ciir, ɣɔn cii cɔk ye nɔk, kene kɔc cath kene yen;

⁴ ne lɔ cen lɔ luaŋ de Nhialic, ku ciɛm monoi ci week, ke ci piath bi cam kene kɔc eke tɔ kene yen, yee ke de bany ke ka ke Nhialic kepɛc?

⁵ Ku kɛnka ciir ne loŋic, ne rɛc ye bany ke ka ke Nhialic luɔi de thabath rac ne yekaluic, ku cinki awac?

⁶ We ya yɔɔk, Ya toŋ diit ye yekalu wuɔr eke.

⁷ Na yaka ye nyic yekene lan yen ŋo, Ya kac de piɔu eka ya kɔɔr, ku kacie koc de rɔt, e kee te kɛnka kɔc cin awac luɔkwei.

⁸ Ne ke ye Wen de raan bɛny de thabath.

⁹ Go jaal etɛɛn, ku leer luaŋden de gueer.

¹⁰ Ku ŋɛmka, ran tok ciin ee tɔ. Goki thiec, jamki, Yi piɛth bi cɔk dem ne kol e thabath? bik kek ye leu ne gueel.

¹¹ Go ke yɔɔk, Ye yeŋa tɔ ne weyic, nɔŋ amal tok, ku na ci loony ne adhuɔmic ne kol e thabath, ke cii dɔm ku miit bei?

¹² Wɛr amaal raan yede? Yen apiath bi kepiath ya loi ne kol e thabath.

¹³ Ku yook raan, Ye thiu yiciin. Go yeciin thiu; ke ci pial ci dɛne.

¹⁴ Go Parithai lɔ biyic, ku lek roth jaam ne yen, ne nɛŋ bik kek ye leu ne nɛk.

¹⁵ Go Yecu nyic, go rɔt liip etɛɛn; ku biɔth kɔc juec cok; go ke cɔk dem kedhia.

¹⁶ Ku yook keek kɛlke cik bi cɔk nyic.

¹⁷ Bi ke cii Yithaya nebi luel bi ya yic, jiɛm,

¹⁸ Ye yaka awundie ŋem, man ca lɔc. Kedien ya nhiar, yan piɔu lɔyum ne yen. Aba yiɛn Jɔŋdie, Ku bi Juurkɔk ya lɛk ne luk.

¹⁹ Aci bi ya teer, ku ci ye coot; Acin ran bi ye ya piŋ ror ne dhɔl yic.

²⁰ Aruɔr ci niɔi acii bi dhoŋ, Ku linon ye ɣeer ne tol acii bi yaai, Agut te cen luk laar te de tiɛm;

²¹ Ku rinke abii Juurkɔk ke ya ŋɔɔth.

²² Goki ran ci jɔk dɔm bɛi enɔŋ en, ci cɔɔr ku cin thok, go cɔk dem, bi ran cin thok jam ku yin.

²³ Go duut gai ebɛn, ku jamki, Yi ci ye wen de Dabid yekene?

²⁴ Na ci Parithai ye piŋ, e ke jam, Yi yerane ee jak rac ciec ne riɛr de Beeldhebub, bɛny de jak rac.

²⁵ Go tɛŋden nyic, ku yook keek, Ye ceŋ ebɛn ye teer ke rɔt ee lɔ te de riaak; ku baai ebɛn ka ɣot ye teer ke rɔt acie kɔɔc.

²⁶ Ku na ye Catan Catan ciec, ke kee teer ne rɔt; yen bi ceŋde kɔɔc yede?

²⁷ Ku na ya jak ciec ne riɛr de Beeldhebub, e ke yee wɛɛtkuɔn ke ciec ne ŋa? yen aabi ya duluukuɔn.

²⁸ Na ya jak rac ciec ne riɛr de Jɔŋdiit de Nhialic, ke ceŋ de Nhialic ee bɛn enɔŋ we.

²⁹ Leu ran tok lɔ ɣon de ran rir, ku le kake riɔk, ke ŋoot ke ken ran rir kan deer? ku jɔl ɣonde riɔk.

³⁰ Ran cie tɔ ke ɣa, ee teer ke ɣa; ku ran cii wɔ ye kuany yenekee ke kaar wei.

³¹ Yen we ya yɔɔk, Ya rɛɛc ebɛn ku lɛɛt aabike pal kɔc; ku lɛɛt de Jɔŋdit aci bi puɔl.

³² Ku raan ebɛn ran ye Wen de raan jaam, abi puɔl: ku raan ebɛn ran ye Jɔŋdiit Lajik jaam, aci bi puɔl ne yepinye nom, ku ne ke bi bɛn.

³³ Yaka tiim cɔk piath ku luɔkden; ka yaka tiim cɔk rac ku luɔkden. Tiim aaye nyic ne luɔkden.

³⁴ We ye kuan de karoor, lɛuka wuɔde, ke we rac, bak kapiath ya luel? Ke ye piɔu thiɔŋ, yeneka yee thok luel.

³⁵ Ran piath ee kapiath yok ne weu piɛthke: ku ran rac ee karac yok ne weu rɛcke.

³⁶ We ya yɔɔk, Ya wɛt piɛlic ebɛn ye raan luel abi kuɛn e ne kol e luk.

³⁷ Yin bi luɔk luk ne welku, ku yin bi luɔkwei ne welku.

³⁸ Go kɔc kɔk ke dugɛɛr ku Parithai dhuɔk en, jamki, Yi Dupioc, wɔ nɔŋ piɔth cit buk cit ŋem enɔŋ yin.

³⁹ Go dhuk yook keek, Ye kuan rac ku yee kuan abal ee cit kɔɔr; ku kacin cin bi yiɛn en, ee cin de Jona nebi yetok;

⁴⁰ tɔ ɣɔn tɔne Jona ne akol keediak ke weer keediak ne rɛc gokic; yenekee cɔɔk bi Wen de raan bi tɔ ne piny piɔu ne akol keediak ku weer keediak.

⁴¹ Kɔc ke Ninebe aabi kɔɔc kene yekuane ne lukic ku kabik luɔkwei; ne ke ci kek kepiɔth wɛl pioc de Jona; ku ŋɛmka, ke dit ne Jona eke.

⁴² Tiɛŋ Bɛny de piny ciɛm abi kɔɔc ne lukic kene yekuane, ku kabi luɔkwei; ne kee bii yen ne piny thar bi nyiny de kaŋ de Tholomon bi piŋ; ku ŋɛmka, ke dit ne Tholomon eke.

⁴³ Na ci jɔŋ rac bɛn bei ne raan guɔp, e kee ɣɔn cin piu bak yic, kɔɔr lɔŋ, ku cii yok.

⁴⁴ Go jam, Ye ɣan bi dhuk ɣondien enhia bɛi an bei thin. Na ci bɛn, ke yok ne laauic, ci weec, ku ci thieth.

⁴⁵ Go lɔ, ku loom jak rɛc kɔk keedherou, wɛr en ne rɛɛc, ku leki thin ku ceŋki. Go ceŋ de yerane jal rɛɛc, aŋuɛne ceŋ tueŋ. Yeneka bi ya cɔɔk de yekuan rɛɛce eya.

⁴⁶ Na ŋoot ke jam ke duut, ke man ku watmɛthke kaac kec, kɔrki jam kene yen.

⁴⁷ Go raan yɔɔk, Ye moor ku watmɛthku, aakaac kec, aakɔr jam kene yin.

⁴⁸ Go dhuk thiec, Ye yeŋa ye ama? ku yiŋa ye watmɛthcie?

⁴⁹ Ku nyooth kɔcpiocke, ku jiɛm, Ye ŋɛmka ama ku watmɛthcie!

⁵⁰ Raan ebɛn ran bi piɔn de Awa tɔ nhial ya loi, yenekee wanmaath, ku ye nyankɛi, ku ye ama.