Mathayo 11 - Lek Jot de Jecu Kritho 1940

¹ Go tɔ, te ci Yecu kɔcpiocke keethiɛr ku rou thol ne weet, ke jiɛl etɛɛn le pioc ku weet ne bɛiken yic.

² Ɣɔn piŋ e Jɔn luɔi de Kritho ke tɔ ɣon de dom, go tuɔc kɔckek piocke,

³ thiec, Ye ye yin man wen bi bɛn eka, ka buk dɛ tiit?

⁴ Go Yecu dhuɔk keek jiɛm, Ye lak lɛkke Jɔn ka yaake piŋ ku ŋɛmeke:

⁵ coor aayiɛn, ku ŋot aacath, ku kɔc ke abiɛl aadem, ku miiŋ aapiŋ, ku kɔc ci thou aa roth jɔt, ku kɔc ŋɔŋ aawɛɛt ne welpiath.

⁶ Raan ee thiei, ran cie kɔth ne ɣɛn.

⁷ Ana yi lek, ke Yecu gɔl yook de duut ne Jɔn, Ye yeŋo yaka lɔ ŋem roor? ye aruɔr ye yom yiir?

⁸ Ku yeŋo ye we lɔ lak ŋem? ye ran ye rɔt piɔth ne alanh piath? Ŋɛmka, kɔc ye alath piath ceŋ aaye tɔ ne ɣoot ke meleek.

⁹ Ku yeŋo ye we lɔ? yee bak nebi lɔ ŋem? Ee yic, we ya yɔɔk, ku kawɛr nebi.

¹⁰ Ee yen yekene, yen man ci gɔɔr, Ya ŋɛmka, an tooc dutunydie tueŋ bi yi ŋɔɔr, Bi dholdu lɔ juiric.

¹¹ We ya yɔɔk neyic, Ya kɔc ci tiik ke dhieth aacin toŋ wɛr Jɔn Baptith ne keek; ku ran thin de ceŋ de pan nhial yeneka wɛr yen.

¹² Ku ne akol ke Jɔn Baptith agut ci yemane aguume ceŋ de pan nhial atɛɛr, ku kayee kɔc ke atɛɛr dɔm ne riɛr.

¹³ Nebii kedhia ku looŋ aaye lek agut Jɔn.

¹⁴ Na yaka piɔth naŋ bak kap, ke Elija eke, man bi bɛn.

¹⁵ Nɛke piŋ ran nɔŋ yith.

¹⁶ Ye keno ba thɔŋ yekuane? Acit mith rɛɛr ne thuk yic ye wariɛcken cɔɔl,

¹⁷ ku jamki, Yi we cuk kuɔth tuŋ, ku kɛnke diɛr; wɔ ci wui, ku kɛnke dhiau.

¹⁸ Ne ke ci Jɔn bɛn ku cii ye cam ku cii dek, goki ya jam, Yi kanɔŋ jɔŋ rac.

¹⁹ Wen de raan ee bɛn, ee cam ku dek, goki ya jam, Yi ŋɛmka, kee dumith, ku kee medeŋ de piukeabiei, ee manhe de mejueer ku kɔc rac! Ku nyic aye cɔk ye yic ne mithke.

²⁰ Go bɛi gɔl ne wɛi, bɛi cen ke kadit juɛc loi thin, ne ke ken kek kepiɔth wel.

²¹ Ye yin bi naŋ dhieu, yin Karadhin! Yin bi naŋ dhieu, yin Bethaida! Nee kadit loike ne Turo ku Thidon, ci man loie ke ne weyic, e kee te cik kepiɔth wel thɛɛr ne alanh e cual ku ŋeth.

²² We ya yɔɔk, Ya Turo ku Thidon aabi ŋuɛɛn ne week ne akol e luk.

²³ Ku yin Kapernaum, bi yi jat pan nhial? Yin bi laar piny pan de tip ke kɔc. Nee kadit loike ne Thɔdom, ci man loie ke ne yiyic, e kee te ci dhiac agut ci yemane.

²⁴ Yin ya yɔɔk, Ya piny de Thɔdom abi ŋuɛɛn ne yin ne kol e luk.

²⁵ Yekole aci Yecu dhuk jiɛm, Ye yin lɛɛc, Yin Awa, Bɛnydiit de pan nhial ku piny, ne ke cin keekake muɔny kɔc nyic kaŋ, ku yiki ke dot, ku yee ke nyuɔth miththii.

²⁶ Ee yic, Awa, ee piath ne yipiɔu yeya.

²⁷ Kaŋ kedhia acii Awa ke yiɛn ɣa: ku kacin ran toŋ nyic Wa, aye Awa yetok. Ku kacin ran toŋ nyic Awa, ee Wa yetok, ku ran bii Wa ya nyuɔth en.

²⁸ Baka enɔŋ an, kɔc ye piɔth dak wedhia, ku kɔc ye kethiek jɔt ke nɛk we, ku we ba miɔc lɔŋ bak ya lɔŋ.

²⁹ Yaka yoŋdie ket, ku yaka pioc ne ɣan; ne ke can ye ɣok ku ya piɔu kuur: ku lɔŋ abak ya yok ne tiipkuɔn.

³⁰ Yoŋdie ee kac, ku kedien ye ɣaac ee pial.