Welpiath ci Luk cithiei ke gɔɔr 9 - Lek Jot de Jecu Kritho 1940

¹ Go Yecu thiɛrkurou cɔɔl, ku yin ke riɛr ye kek jak rac tiam kedhia, ku bik kɔc ya cɔk dem ne bec.

² Go ke tooc bik lɔ weet ne ceŋ de Nhialic, ku bik kɔc bec cɔk ye dɛm.

³ Ku yook ke, Ye duɔka kethi leer dhɔlic, acin lec, ka boon, ka abiik, ka weu; ku duɔka alɛth ke kɔu leer keerou.

⁴ Ku ɣon ye we lɔ thin, ke we ye reer thin, ku bak lɔ.

⁵ Ku raan ebɛn ran ce we loor, ye na jalka yepane, ke we tɛŋka wecok ne tur bi ke nyuɔɔth.

⁶ Goki jaal, ku tekki ne bɛi kedhia, e ke ye weet ne welpiath, ku cɔkki kɔc dem ne piny ebɛn.

⁷ Ku Kerod tetararki ee ci keeka cike loika kedhia piŋ: go gai areet, ne kee cene ye luel ne kɔc kɔk, Ya Jɔn ee rɔt jɔt ne thouic;

⁸ ku luel ne kɔk, Ya ye Elija yene ci tuɔl; ku luel ne kake, Ya toŋ de nebii thɛɛr yenekee rɔt bɛɛr jɔt.

⁹ Go Kerod jam, Ye Jɔn ee ca kɛp nom wei; ku yene yeŋa yekene yan keekake piŋe? Ku kɔɔr ne yepiɔu bi ŋem.

¹⁰ Na ci kɔcpiocke dhuk, goki lɛk keriɛc cik loi. Go ke laar bii ke pan cɔl Bethaida.

¹¹ Go nyic ne kɔc, goki biɔɔth cok: go ke loor, ku lek ke ne ceŋ de Nhialic, ku kɔc eke kɔr bi ke cɔk dem aa pial.

¹² Go akɔl lɔ ke col; go thiɛrkurou bɛn, ku yookki; Yii ne duut puɔk, bik lɔ ne bɛi yic ku piny thiɔk, bik ɣan ke tac lɔ kɔɔr ku ka cameke: te tɔ wɔ thine ee roor abac.

¹³ Go ke yɔɔk, Ye miaceke ne ke bik cam. Goki jam, Yii wɔ cin dɛ aye monoi keedhiec ku rec keerou; te cii wɔ ber lɔ buk miɛth lɔ ɣɔc keekɔcka kedhia.

¹⁴ Ake cit bianabur dhiec de kɔc. Go kɔcpiocke yɔɔk, Ye caeke nyuc e ke ŋui roth, thiɛrdhiec ne dol tok.

¹⁵ Goki loi, cɔkki ke nyuc piiny.

¹⁶ Go monoi wen keedhiec loom ku rec keerou, ku liec nhial, ku thiei ke, ku wɛɛk keyic; ku yin ke kɔcpiocke bi ke lɔ kan e kɔc nhiim.

¹⁷ Goki cam, a bik kuɛth kedhia: ku ka eke ci doŋ wei ye thethuei acik bi kuany ne akuɔp yic keethiɛr ku rou.

¹⁸ Na re, ke laŋ yetok, ku tɔ kɔcpiocke kene yen: go ke thiec, jiɛm, Ye ye kɔc luel yii ya ŋa?

¹⁹ Goki dhuk jamki, Yii kaye luel ya ye Jɔn Baptith; ku luel kɔk, Yii ye Elija; ku ne kɔk, Ya ye toŋ de nebii thɛɛr yene ci rɔt bɛɛr jɔt.

²⁰ Go ke thiec, Ye ku yaka luel wuɔ ya ŋa? Go Petero dhuk yook, Ye Yin e Kritho de Nhialic.

²¹ Go ke lom thook ye cik yekene lek ran dɛ;

²² ku jiɛm, Ye Wen de raan abi kajuec dhiil ne guɔm, kabi jai ne roordit ku bany ke ka ke Nhialic ku dugɛɛr, ku nɛk, ku beer rɔt jɔt ne kol e diak.

²³ Go ke yɔɔk kedhia, Ye na bi raan ɣa ya kuany cok, ke ne ye rɔt nyɔŋ, ku ye tiɛm ageerde jɔt ne nyindhia, ku kuɛny ɣacok.

²⁴ Ran kɔr bi weike luɔk, e kaabike wuɔc; ku ran bi weike wuɔc ne ɣɛn, ke yeneka bi weike luɔk.

²⁵ Na kap raan piny nom ebɛn ku wɛɛc weike, ke ye kepiɛth ŋo bi kuany thin?

²⁶ Raan ebɛn ran ye nyin riɔc ne ɣɛn ku ne welcie, ke yerane abii Wen de raan nyin riɔc ne yen eya, te bii yen ne nuɔmdeic, ku ne nuɔm de Wunic, ku ne nuɔm de malaikai lajik.

²⁷ Ku we lɛkke yith, Ya kɔc kɔk ke keekɔc kaac eeneka, aaci bi thou, aŋootki e ke ken ceŋ de Nhialic guɔ ŋem.

²⁸ Na ɣɔn ne akol keebɛt aci keekake lɔ, ke lɔ kene yi Petero ku Jakob ku Jɔn, ku leer ne kuur nom lek lɔŋ.

²⁹ Ku te lɔŋ en, go nyin rɔt wel, ku ɣer alɛthke a bik gualegual.

³⁰ Ku ŋem, jam kɔc keerou kene yen, ke ye yi Mothe kene Elija;

³¹ eke tul ne nuɔm, ku jamki ne thon bi thol ne Jeruthalem.

³² Ku yi Petero kene kɔc eke tɔ kene yen aake ci nin ke kuɔt nyin: na wen yi pɛɛcki, goki nuɔmde ŋem, ku kɔc keerou kaac kene yen.

³³ Ana yi leuki wei enɔŋ en, go Petero Yecu yɔɔk, Ye Bɛny, apiath buk tɔ ene: ku cɔk wɔ loi akaat keediak; tok enɔŋ yin, ku tok enɔŋ Mothe, ku tok enɔŋ Elija: ee kuc ke luel.

³⁴ Na ŋoot ke luel keewelka, go piol bɛn, ku buur ke piny, goki riɔc wen ler ke ne piolic.

³⁵ Ku bɔ ror ne piolic, jiɛm, Ye yekene kee Wendie, ee kanlɔcdie: yaka piɛŋ wel.

³⁶ Wen biiye ror, ke Yecu ee yok yetok. Goki kethook deer, ku cik ber lɛk kɔc kɔk ne keeakolka ye ke cik ŋem.

³⁷ Na ɣɔn ne ekole, acik bɛn piny ne kuur nom, ke ram kene dun dit.

³⁸ Ŋem, go ran toŋ de kɔc yic coot, jiɛm, Ye Bɛny, yin laŋ ba wendie ŋem; ne ke yen yen yetok e tɔ ne ɣanom:

³⁹ ŋem, aye jɔk dɔm, aye cɔk pɛu wei ne dhieu; ku kaye rɛt guɔp a bi amoth cuɔk, ku kacii ye puɔl te ŋoot en ke ken guɔ yiɛn guɔp te lɔ cuei ebɛn.

⁴⁰ Guɔ kɔckuk piɔceke thiec bik ciɛc wei; goki cuɔk leu.

⁴¹ Go Yecu dhuk ku yook, Ye agai we, kuan cin gam ku yaka mɛr wei, ba ceŋ wɔ we anana, ku ba we guum anana? bɛiye wendu ene.

⁴² Ana ye ŋoot ke bɔ, go jɔŋ rac yuɛt piny, ku ret guɔp arac. Go Yecu jɔŋ rac waai, ku cɔk dhuk cɔk dem, ku dhuk wun.

⁴³ Goki gai kedhia ne riɛr de Nhialic. Te ŋoot kek e ke gɛi ne keeka cike loika, ke yook kɔcpiocke,

⁴⁴ Ye cakka keewelke lɔ gɔc ne wenhiim; Wen de raan abi taau ne kɔc cin.

⁴⁵ Goki yewɛte cuɔk nyic, ku kee ci thian ne keek, duɔke bik ŋem: ku riɔcki ne thiɛc bik kek ye bɛɛr thiec ne yewɛte.

⁴⁶ Go teer rɔt gɔɔc ne keyic, ne kɔc ke keek yic bi tɔ tueŋ.

⁴⁷ Na ci Yecu tɛŋ de kepiɔth ŋem, ke lom mɛnhthi, ku jɔt ne yelɔɔm,

⁴⁸ ku yook ke, Ye ran bi yemɛnhthine loor ne rincie, e kaloor ɣɛn: ku ran bi ɣa loor, e kaloor yen yen man ci ɣa tuɔc: yeyen man koor ne weyic wedhiane, yeneka dit.

⁴⁹ Go Jɔn dhuk ku yook, Ye Bɛny, wɔ wɔ ci raan yok ne ye jak rac ciec ne rinku; goku peen, ne ke cen ye cath ke wɔ.

⁵⁰ Go Yecu yɔɔk, Ye duɔka ye peen: ran cie teer ke we ee ya randuɔn.

⁵¹ Na ɣɔn aci niin cok thiɔk, nin bene ke ye loom nhial, go yenom puɔk dhol lɔ Jeruthalem.

⁵² Ku tooc kɔc tueŋ: goki lɔ, ku leki pan thin toŋ de Thamaria, lek kaŋ juir ne bɛnde.

⁵³ Ku kakenki ben loor, ne ke ɣoi en lɔ Jeruthalem.

⁵⁴ Ɣɔn ye kɔcpiocke, yi Jakob ku Jɔn yi ŋemki yekene, goki jam, Yii Bɛnydit, buk mac cɔɔl piny nhial, ku bi ke nyop?

⁵⁵ Go rɔt wel ku wɛi ke.

⁵⁶ Goki bɛɛr lɔ pan thin dɛ.

⁵⁷ Ku te ciɛth kek dholic, go raan yɔɔk, Ye yin ba biaath ne ɣan kedhia bake ya teek.

⁵⁸ Go Yecu yɔɔk, Ye awan aanɔŋ adhum, ku diɛt nhial aanɔŋ ɣoot; ku Wen de raan ee ciɛn te yen yenom kan.

⁵⁹ Ku yook ran dɛ, Ye ye ɣa kuany cok. Go jam, Ye Bɛnydit, kɔn a cɔk lɔ la awa thiɔk.

⁶⁰ Go Yecu yɔɔk, Ye cɔk kɔc ci thou thiak kɔcken ci thou; ku bar, lɔ luel thoŋ de ceŋ de Nhialic.

⁶¹ Go ran dɛ jam eya, Ye yin ba kuany cok, Bɛnydit; ku kɔn a cɔk lɔ kɔc ke panda tɔɔŋ.

⁶² Go Yecu yɔɔk, Ye ran ye puur kuany ku beer cuat piny, ku liec can, acie piath kene ceŋ de Nhialic.