Welpiath ci Luk cithiei ke gɔɔr 8 - Lek Jot de Jecu Kritho 1940

¹ Na ɣɔn aken nin juec thok, ke gɔɔc teek ne bɛi yic bɛi dit ku bɛi koor, ke weet kɔc ku lek ke thoŋ piɛth de ceŋ de Nhialic, ku tɔ thiɛrkurou kene yen,

² ku diar eke ci cɔk dem ne jak rac ku benyden dɛ, ye Mari man col Magdalene, man e cene jak rac keedherou bɛi bei ne yeguɔp,

³ ku Joana tiŋ e Cudha, awundiit de Kerod, ku Thuthana ku diar kɔk, man e ye ke kony ne weuken.

⁴ Ɣɔn ye dun diit de kɔc ye ci gueer, ku ci kɔc ke bɛi kedhia gueer enɔŋ en, ke jam ne parabol:

⁵ Ye dupuk ee lɔ pok ne kɔth: ana ye puk, ke kɔk lony ne dhol kec; go ke dum ne kɔc cok, ku kuanyke ne diɛt nhial.

⁶ Ku lony kɔk piny de kur; ana yi cilki, e ke nɔc, ne ciɛn tiɔp piiny.

⁷ Go kɔk lony e kuɔth yic; goki ciil etok kene kuɔth, go kuɔth ke nhiac.

⁸ Ku lony kɔk e tiɔm piathic, goki cil, ku lokki yiki naŋ nyiin keethiɛrnyɛny. Na ye luel keekake, ke cot, Ye cakka ke piŋ kɔc nɔŋ yith keek.

⁹ Go kɔcpiocke thiɛc luɛl de yeparabole.

¹⁰ Go jam, Ye we eka ci yiɛn nyiny de kecikum de ceŋ de Nhialic: ku kɔc kɔk aabi ya jaam ne parabool; bik ŋem, ku cik bi ya ŋem, bik piŋ, ku cik bi ya dot.

¹¹ Yen luɛl de parabol eke: Kɔth aye wɛt de Nhialic.

¹² Ka ke dhol kec aye kɔc ci wel piŋ; ela ke durieth bɔ, ku nyiɛi wɛt ne kepiɔth, duɔke kek bi gam ku bi ke luɔk.

¹³ Ku ka ke piny de kur, aye kɔc ye na yi cik wɛt piŋ, ke gamki ne yum de piɔu; ku cinki mei, yiki yul ne gamic, ana ya them ke, e ke yuɛk.

¹⁴ Ku ka ci lony e kuɔth yic, aye kɔc ci piŋ, ku na yi kuanyki dholdenic, e ke dɛc ne ka ke piny nom kene baany de kaŋ ku ka kɔɔr piɔu keek ke yepiire a cik lok apiath.

¹⁵ Ku ka ci lɔ ne tiɔm piathic, aye kɔc nɔŋ piɔth piath, ana yi cik wɛt piŋ, ke kuɛkki piny arir etor, ku lokki e ke ce ŋueny.

¹⁶ Acin ran ye lamba dɛɛp ku kum nom ne tony ka tɛɛu ne agen thar; aye muɔk nhial, bi kɔc lɔ ɣot bik riarde ŋem.

¹⁷ Acin ke ci thian ku cii bi tuɔl; ku kacin ke mony ku cii bi tic ne ɣɔn ɣer.

¹⁸ Ŋɛmka roth ne piŋ ye we piŋ; ran ye naŋ ke dɛ, e kabi bɛɛr ya miɔc, ku ran ye ciɛn ke dɛ, abene ke ye tak ye tɔ ke yen nyaai.

¹⁹ Na re ke man bɔ enɔŋ en kene mithakɛcke, ku cik ɣet enɔŋ en leu, ne gel wei de duut.

²⁰ Go yɔɔk, Ya moor ku mithakɛcku aakaac kec, aakɔr bik yi ŋem.

²¹ Go dhuk yook ke, Ye kɔc ye wɛt de Nhialic piŋka ku yiki loi, keeka ye ama ku keeka ye mithakɛcie.

²² Ɣɔn ne kol toŋ de keeakolka, go kɛɛc riɛi, yen ku kɔcpiocke; ku yook ke, Ye teemku bar lɔŋti: goki lony dhol.

²³ Ku te ciɛth kek, go Yecu lɔ korou ne nin: go yomdit go bɛn bɛɛr, goki lɔ e ke thiaŋ ne piu, cik jal ya kɔc tɔ ne thuɔuic.

²⁴ Goki bɛn enɔŋ en, ku packi, jamki, Yi Bɛny, Bɛny, wɔ thou. Go rɔt jɔt ku wɛɛi yom kene atitiak: goki kɔɔc, a lɔ piny diu.

²⁵ Go ke thiec, Ye tɔ gamduɔn teno? Goki riɔc ku gɛiki, jamki ne roth, Yi yene yeŋa ekene, ye yi yom kene yi piu yɔɔk, ku yiki welke gam?

²⁶ Goki ɣet piny de Gadarai, tɔ ne Galili lɔŋti.

²⁷ Ɣɔn ye kɛɛc teɣer, ke ram ke ran toŋ de baai, nɔŋ guɔp jak rac, ken alath kan piɔth te ci mɛc, ku cii rɔt gɛm ɣot, ye ya rɛŋ yic.

²⁸ Na ɣɔn ye ŋem Yecu, ke cot areet, ku cuɛt rɔt piny ne yenom, ku jiɛm ne ror dit, Ye yeŋo ba bi loi wɔ yin, yin Yecu, Wen de Nhialinydiit Nhial? Yin laŋ, duɔne ɣa luc.

²⁹ Ne ke cen jɔŋ rac yɔɔk bi bɛn bei ne raan guɔp. Ee ye jɔŋ rac cool e dom: a go ya cok tit ne kɔc, ku ye deer ne joth ku luɔŋ; go ke ya dhoŋ kɔth, ku ye jɔŋ rac kuaath roor.

³⁰ Go Yecu thiec, Ye cɔl rinku de? Go jam, Ye ɣan ekee Duut, ne kee cii jak rɛɛc kuɔt lɔ ne yeguɔp.

³¹ Goki lɔŋ duɔke bi ke ciɛc tethuth de piu.

³² Ku nyuɛth kuɔl juec ne kuur nom: goki lɔŋ bi ke cɔk lɔ ne kuɔl gup. Go gam ke.

³³ Go jak rac bɛn bei ne raan guɔp, ku leki ne kuɔl gup: goki riŋ te lɔ tiɛlaŋ lek bɛɛr, goki mou.

³⁴ Ku na wen ŋem kɔc biok kuɔl ke ci tuɔl, goki kat, ku lek lɛk kɔc ke baai ku piny ebɛn.

³⁵ Goki bɛn bik ke ci tuɔl bi ŋem; ku bik enɔŋ Yecu, goki ran e ci jak rac bɛn bei ne yeguɔp yok ke rɛɛr ne Yecu cok, ke ci rɔt piɔth ku ci nom jal loi: goki riɔc.

³⁶ Ku kɔc ci e ŋem acik ciɛr kɔc ye luaŋ cene ran ci jak rac dɔm luɔk.

³⁷ Go kɔc ke piny de Gadarai yuil en kedhia goki Yecu yɔɔk bi jaal pinyden; ne ke ci riɔc dit ke dɔm: go kɛɛc riɛi, ku dhuk ciɛn.

³⁸ Ku ran cii jak rac jaal ne yeguɔp ee Yecu lɔŋ bi tɔ ke ye: go Yecu jai, jiɛm,

³⁹ Ye dhuɔkne panduɔn, ku ba kadit ci Nhialic ke luɔi yin lɔ ciir. Go lɔ ɣɔu dhol, ku le kɔc ke baai kedhia lɛk ka dit ci Yecu ke luɔi yen.

⁴⁰ Ana ye Yecu ye dhuk, go loor ne duut; ne kee tiit kek yen kedhia.

⁴¹ Ŋem, go ran cɔl Jairo bɛn, ku kee ye bɛny de luaŋ de gueer: bii ku cuɛt rɔt piny ne Yecu cok, ku lɔŋ bi lɔ ɣonde;

⁴² ee nɔŋ nyan toŋden lɔrir, ye runkeek ke dit thiɛr ku rou, bec a duur thou. Go lɔ ke guere ne duut.

⁴³ Go tiik bɛn tiŋ nɔŋ tetook ye riɛm kueer ne run keethiɛr ku rou, ci weuke riap kedhia yin ke kɔc ke wal, ku cin toŋ leu en ne kuny,

⁴⁴ go bɛn ne Yecu kɔu ku jiɛk alath thok: go riɛm dai lɔ ŋou.

⁴⁵ Go Yecu jam, Ye yene yeŋa ci a jak? Na wen ajai kɔc kedhia, ke Petero, ku kɔc tɔ kene yen jam, Yii Bɛny, ee duut yeneka thany yin riekki yin.

⁴⁶ Go Yecu jam, Ye kanɔŋ ran toŋ ci ɣa jak: ne ke nyiɛc an en ke riɛr ci jaal aguɔp.

⁴⁷ Na wen ye tiik ye ŋem rɔt ke cii bi muɔny, ke bɔ bei ke lɛthe, ku cuɛt rɔt piny ne yenom ku cir ke yen en jak ne kɔc nhiim kedhia, ku ne dɛm cen dai dɛm.

⁴⁸ Go yɔɔk, Ye nyane, gamdu aci yi cɔk dem; jɔl lɔ ne dɔɔr.

⁴⁹ Te ŋoot en ke jam, ke raan bɔ ɣon de bɛny de luaŋ de gueer jiɛm, Ye nyandu kee thou, duɔne Bɛny rɛɛm nom.

⁵⁰ Go Yecu piŋ, ku yook, Ye duɔne riɔc: gam pei, ku kabi cɔk piɔl.

⁵¹ Ɣɔn ye Yecu ye leer ɣot, go ciɛn ran gam lɔ thin kene yen, aye Petero, ku Jɔn, ku Jakob, ku wun e nya ku man.

⁵² Ku kɔc ake dhiau kedhia, wuiki ne yen: go jam, Ye duɔka dhiau; aken thou, kanin.

⁵³ Goki dɔl ke buiki, ne ke nyic kek yen ne ci thou.

⁵⁴ Go dɔm ciin ku cɔɔl, jiɛm, Ye Nyane, jɔt rɔt.

⁵⁵ Go weike dhuk, ku jɔt rɔt nelantoŋtɛi: go ke yɔɔk bik miɔc ne ke ciɛm.

⁵⁶ Go kɔcken gai: go ke lom thook duɔke bik lɛk ran dɛ yeke ci loine.