Welpiath ci Luk cithiei ke gɔɔr 24 - Lek Jot de Jecu Kritho 1940

¹ Na ɣɔn ne kol tueŋ de wik, ɣɔn ne nyaany, e ke bɔ te de raŋ, kene wɛl nyir cikke juir.

² Goki kuur yok ne ci lɛɛr wei ne raŋ thok.

³ Goki lɔ thin, goki guɔp de Bɛnydit Yecu cuɔk lɔ yok.

⁴ Na ɣɔn, aŋootki e ke gɛi ne yekene, ŋem, go kɔc keerou kɔɔc e kelɔm ceŋ alɛth lɔ egual:

⁵ ana yii riɔcki, ku gutki kenyiin piny, e ke yookki ke, Yii yeŋo ye we ran piir kɔɔr te de kɔc ci thou?

⁶ Aliu etene, ee rɔt jɔt: ciɛtka wenhiim ne wel eke ci lɛk we ɣɔn ŋoot en ke tɔ ne Galili,

⁷ jiɛm en ye bi Wen de raan bi dhiil ne gɛm yine kɔc rac, ku bi piaat, ku bi rɔt bɛɛr jɔt ne kol e diak.

⁸ Goki kenhiim ciɛt ne welke,

⁹ ku jiɛlki te de raŋ, ku lek keekake kedhia lɛk thiɛrkutok, ku kɔc kedhia.

¹⁰ Ku kaake ye yi Mari Magdalene, kene Joana, ku Mari man e Jakob: ku diar kɔk kene keek, keeka ke lek keekake dutuuc.

¹¹ Go keewelke ciɛt wel ke acibel enɔŋ keek; ku cik welken gam.

¹² Go Petero rɔt jɔt, ku riŋ te de raŋ; leer ku guŋ ku luiitic, ke ŋem alɛth linon e ke tai kepɛc; a go dhuk pande, ke gɛi ne ke ci tuɔl.

¹³ Ŋem, ren de kɔcpiocke ake lɔ ne yekole pan thin cɔl Emauth, ye cathde mail keedherou ku nuth ne jal ne Jeruthalem.

¹⁴ Goki lɔ e ke gɔk ne keriɛc ebɛn ci tuɔl.

¹⁵ Na ɣɔn aŋootki e ke gɔk, ku yiki roth thiec, ke Yecu miit rɔt, ku leer ke ke.

¹⁶ Goki nyiin cuɔl, a cik nyic.

¹⁷ Go ke yɔɔk, Ye ye abara de ŋo yaka mat wuɔla ke we cath dholic? Goki kɔɔc ediu, e ke ci nyiin kuany.

¹⁸ Go toŋ de keek cɔl Kleopath, go gam yook, Ye yin e ye ran toŋ rɛɛr ne Jeruthalem ku kuc ka ci tuɔl ne keeakolke?

¹⁹ Go ke yɔɔk, Ye yeki yi kaŋo? Goki yɔɔk, Yii kaaye ka ke Yecu de Nadhareth, man e ye nebi ku rire luɔide kene welke ne Nhialic nyin ku kɔc kedhia:

²⁰ ku gɛm cene ye gam ne banydit ke ka ka Nhialic ku banykuɔ, bi luɔk thou, ku piɛtki.

²¹ Ku kee ŋɔthku wuu ye yen ede ci Yithrael bi luɔk. Ku kacie keekake abac, nin aya diak nin eke loiye keekake.

²² Diarkuɔk kɔk aa wɔ cɔk gɛi, ne kee cik kek riɛr te de raŋ;

²³ ku na wen akenki guɔp de Yecu yok, e ke bɔ, jamki yi cik malaikai ŋem, man eke ye jam yii piir.

²⁴ Go kɔc kɔk eke tɔ wɔ ke goki lɔ te de raŋ, goki lɔ yok ne cit luɛl wen de diar: ku yeguɔp eka kenki ŋem.

²⁵ Go ke yɔɔk, Ye agai kɔc ci bel, ku cak kaŋ ye dai dot ne wepiɔth ka eke ci lɛk week ne nebii!

²⁶ Cii piath bi Kritho keekake guum, ku bi lɔ ne nuɔmdeic?

²⁷ Go ke nyuɔth kacigɔɔr kedhia ne yen, gɔɔc ne Mothe agut en nebii kedhia.

²⁸ Goki lɔ e ke coth panthi, pan e bii ke thin: go cieth tueŋ cit ke bi lɔ ke lɔ.

²⁹ Goki peen, jamki, Yii rɛɛre we wɔ: ne ke cen cuɔl. Go lɔ lee tɔ ke ke.

³⁰ Na ci nyuc ke ke ciɛmki, ke lom mono, ku thiei, ku wɛɛkic, ku yin ke.

³¹ Goki jal nyic; go rɔt liɛɛp wei, a cik beer ŋem.

³² Goki jam ne roth, Yii kenku piɔth nyop ne biɔk thin, wen jiɛm en ke wɔ dholic, ku wen nyuth en wɔ ne kacigɔɔr?

³³ Goki roth kuany ne yethane, dhukki Jeruthalem, ku yokki thiɛrkutok ne ci gueer tetok, ku kɔc eke tɔ kene keek,

³⁴ jamki, Yii Bɛnydit ee rɔt cok jɔt ejik, ku kee tuɔl enɔŋ Thimon.

³⁵ Goki kaŋ ciir kedhia ka eke ci loi dholic, ku nyiny e cik kek ye bɛn jal nyic ne wɛɛk de mono.

³⁶ Ku na ŋootki e ke luel keewelke, ke Yecu tul ne keciɛl yic, ku yook ke, Ye keeyabi dɔɔr tɔ ke we.

³⁷ Goki nhiim mum ne riɔc, ku cɔlki yii ye jɔk e cik ŋem.

³⁸ Go ke yɔɔk, Ye yeŋo riɔc we? ku yeŋo muum we nhiim tɛk we ne kajuec?

³⁹ Ŋɛmka ɣacin ku ɣacok, kee ɣa guɔp: thapka ɣa, ku ŋɛmka; ne ke ye jɔk ciɛn riiŋ ku yuɔm ci mandie.

⁴⁰ Na ci yekene luel, e ke nyuthke yecin ku yecok.

⁴¹ Ku na ŋootki e ke mum nhiim ne yum de piɔu, gɛiki, go ke yɔɔk, Ye nɔŋ kecam etene?

⁴² Goki yiɛn baŋ toŋ de rɛc ci geet.

⁴³ Go loom, ku ciɛm ne kenhiim.

⁴⁴ Go ke yɔɔk, Ye welcie ɣɔn cake luel eke, ka ŋoot ka tɔ wɔ we, ya keriɛc ebɛn abi rɔt dhiɛl, ka ci gɔɔr ne loŋ de Motheic, ku nebii, ku diɛt, ne ɣɛn.

⁴⁵ Go ke jal loi nhiim, bik kacigɔɔr ya nyic;

⁴⁶ go ke yɔɔk, Ye kee gɔɔr yala, ya Kritho abi gum, ku bi rɔt jɔt ne kol e diak;

⁴⁷ ku ya bi gam de awac kene pɛl de rɛɛc bi ke ya pial juɔr ebɛn ne rinke, kɔne gɔɔc ne Jeruthalem.

⁴⁸ We ye duleek ke keekake.

⁴⁹ Ku ŋɛmka, we tuɔcke keciluel ne Awa; ku rɛɛrka ne Jeruthalem, agut te cene we piɔth ne riɛr nhial.

⁵⁰ Go ke ŋaar biyic agut en Bethani, ku jɔt yecin nhial, thiei keek.

⁵¹ Na ɣɔn aŋoot e ke thieike, ke jiɛl ne keyic, jɔt leere nhial.

⁵² Goki door, ku dhukki Jeruthalem ke ke ci piɔth lɔyum areet:

⁵³ ku yiki lɔ yekalu luut, yiki Nhialic thiei.