Welpiath ci Luk cithiei ke gɔɔr 20 - Lek Jot de Jecu Kritho 1940

¹ Na ɣɔn ne kol toŋ weet en kɔc ne yekaluic, weet ke ne welpiath, go bany ke ka ke Nhialic bɛn kene dugɛɛr ku roordit;

² ku jamki, yookki, Yii lɛke wɔ: Ye keekake loi ne riɛro? yeŋa yin yin yeriɛre?

³ Go ke gam ku yook ke, Ye we ba thiec eya; ku gamka ɣa:

⁴ Ye baptinh de Jɔn ye ke e bɔ nhial, ka ne bɔ enɔŋ kɔc?

⁵ Goki kenhiim ciɛt ne roth, jamki, Yii na luelku yen, Wuu kee bɔ nhial; e kabi luel, Ye a yeŋo cii we ye gam?

⁶ Ku na luelku yen, Wuu kee bɔ enɔŋ kɔc, ke wɔ bi biɔɔk ne raan ebɛn: ne ke cik ke ye gam ke Jɔn ye nebi.

⁷ Goki dhuk, yii kucki te e bii yen thin.

⁸ Go Yecu ke yɔɔk, Ye ke we caa bi lɛk yeriɛr yan keekake loi.

⁹ Go yeparabole gɔɔc ne lek kɔc; Ye raan ee com dom de abiɛi, ku nyiɛŋ awuut ke dom, ku jiɛl lee ceŋ wei piny dɛ.

¹⁰ Na ɣɔn ye ruer ye bii, ke tooc aluak enɔŋ kɔc ke dom bik lɔ miɔɔc ne kaciluɔk ke dom de abiɛi; go kɔc ke dom goki lɔ dui, ku ciecki wei ne yecin.

¹¹ Go aluaŋ dɛ bɛɛr tooc: goki lɔ dui eya ku yɔŋki, ku ciecki wei ne yecin.

¹² Go aluaŋ de diak bɛɛr tooc: goki yiɛn ɣɔnetook, ku ciecki biyic.

¹³ Go bɛny de dom go jam, Ye ba ŋo loi? Ɣan bi wendien nhiar tuɔc, lan bik kek ye lɔ riɛu edewe.

¹⁴ Ana ye kɔc ke dom yii ŋemki ye, e ke yook roth jamki, Yii dit eke kene: nakku, ku bi dom ya adonyda.

¹⁵ Goki ciɛc biyic domic, ku nɛkki. Yen yeŋo bii bɛny de dom luɔi keek?

¹⁶ Abi bɛn ku nɛk keek keekɔc ke domka, ku kabi dom gam yin kɔc kɔk. Na cik ye piŋ, e ke jam, Yii diɛre te peen Nhialic.

¹⁷ Go ke ɣoi, ku jiɛm, Ye yee ke yeŋo yeke ci gɔɔre, Ya kuur ci jai ne mebuuth, Yenekee bɛɛr cɔk ye ŋem de pany nom?

¹⁸ Raan eben ye loony ne yekuure nom abi rɔt ya thoor; ku ran bi ya mat, abi ya mot ci liɛt.

¹⁹ Go dugɛɛr kene bany ke ka ke Nhialic piɔth naŋ bik dɔm ne yethaane; e ke riɔc e kɔc; ne kee cik kek ye nyic ke luel yeparabole ne keek.

²⁰ Goki ya tiit, ku toocki aneem ci roth loi e ke ye kɔc piath, bik naŋ ke dɔm ke ye ne welke, bik kek ye gam yine riɛr de gabana.

²¹ Goki thiec, Yii Dupioc, yin nyicku ke yin e jam ku ye weet apiath, ku cii kɔc e kuanyic, ku ye cok weet neyic ne dhol de Nhialic:

²² Yen piɛth buk Kaithar ya juɛr weu, ka rɛɛc?

²³ Go koonyden nyic, ku jiɛm yook ke,

²⁴ Ye yeŋo thɛmka ɣɛn? Nyuɔthka ɣa denariɔn. Yeŋa ku rinke tɔ ne yekɔu? Goki jam, Yii kee Kaithar.

²⁵ Go ke yɔɔk, Ye ke we yaka Kaithar yiɛn ka ye kake, ku yaka Nhialic yiɛn ka ye kake.

²⁶ Goki ciɛn ke loiki ne kɔc nhiim ne yejame: goki gai ne beerde, ku ropki kethook.

²⁷ Go kɔc kɔk ke Thadokai bɛn enɔŋ en, kɔc ye jam yii cin jon de rɔt; ku thiecki,

²⁸ jamki, Yii Dupioc, Mothe ee wɔ gaar, jiɛm, ye na ci manhe e raan thou, ku ne nɔŋ tiik, ku cin mith, ke manhe bi tiik loom, ku bi manhe kɔɔc.

²⁹ Yen wat ake tɔ keedherou mith ke mony tok: go wen tueŋ go thieek; ku thou ke cin mith;

³⁰ ku lɔ wen de rou;

³¹ ku leer ke wen de diak; ku yene ye cɔɔk de wat kedhia, ku thouki.

³² Ɣɔn ke tiik jɔl thou.

³³ Yen bi jal ya tiŋ de ŋa miak ne kol de jon de rɔt? ne ke cen ya tiŋden keedherou.

³⁴ Go Yecu ke yɔɔk, Ye wɛɛt ke yeceŋe aye thieek, ku ye ke thiaak,

³⁵ ku kek keek, keekɔc ye luɔk piath ne ɣet yeceŋtike, ku jon de rɔt ne thouic, aaci bi ya thieek, ku ce ke beere thiaak:

³⁶ ne ke cik kek kɔn bɛɛr thou: aabi ya ciɛt malaikai: ku yiki ya wɛɛt ke Nhialic, yiki wɛɛt ke jon de rɔt.

³⁷ Ku ke de kɔc ci thou ye kek bɛɛr piir, ee ci Mothe nyuɔɔth te de But, ɣɔn yen Bɛnydit cɔɔl Nhialiny de Abraɣam, ku ye Nhialiny de Yithak, ku ye Nhialiny de Jakob.

³⁸ Yen acie Nhialiny de kɔc ci thou, ee ke de kɔc ye piir: ne ke ye kek piir kedhia enɔŋ en.

³⁹ Go kɔc kɔk ke dugɛɛr gam yookki, Yii Dupioc, yin ci jam apiath.

⁴⁰ Ku riɔcki ne thiɛc bik kek ye bɛɛr thiec.

⁴¹ Go ke thiec, Ye yeŋo ye kek ye luel yii ye Kritho ye wen de Dabid?

⁴² Ne kee cii Dabid jam ne guɔpde ne kitam de Diɛtic, Ye Bɛnydit ee Bɛnydiitdie yɔɔk, Ye nyuɔce ne ciɛn cuenydie,

⁴³ Agut te ban yin cɔk kɛc kɔc nɔŋ ater kene yin kɔth.

⁴⁴ Ee ye Dabid cɔk ye Bɛnydit, ne ye wende yede?

⁴⁵ Go jam ke piŋ ne raan ebɛn yook kɔcpiocke,

⁴⁶ Ye yaka roth ŋem ne dugɛɛr, kɔc ye kok ne cath e ke ceŋ alɛth bar, ku yiki muɔth yene ke muɔth ne ɣan ke ɣɔc nhiar, ku ɣɔn ke nyuc ke bany ne luek ke gueer yic, ku ne ɣɔn ke bany te de miɛth dit;

⁴⁷ kɔc ye ɣoot ke diarjɔɔk cam yic, ku yiki lɔŋ cɔk baar ne adhuɔm: keekɔcka aabi naŋ lukwei gok.