Welpiath ci Luk cithiei ke gɔɔr 19 - Lek Jot de Jecu Kritho 1940

¹ Go Yecu bɛn ke teek ne Jerikoic.

² Ŋem, raan ee tɔ ye cɔɔl Dhakayo; ku kee ye bɛny de juɛr, ku kee ci bany.

³ Go piɔu naŋ ŋem de Yecu lan yen ŋa; go cuɔk ye leu ne duut, ne kee cek en.

⁴ Go riŋ tueŋ, leer ku yith ne ŋaap nom bi ŋem: ne kee ben teek yedhole.

⁵ Na ci Yecu bɛn etedene, ke liec nhial, ku yook, Ye Dhakayo, ban yicok, bar piny; an bi lɔ cool ɣondu ekole.

⁶ Go yecok ban, bii piny, ku loor ne yum de piɔu.

⁷ Na cik ye ŋem, e ke lɔ ŋunŋun, jamki, Yii kee lɔ nyuc kene ran rac.

⁸ Go Dhakayo kɔɔc, ku yɔɔk Bɛnydit, Ye ŋem, Bɛnydit, baŋ toŋ de ceŋdie aya miɔc aŋaaŋ; ku na ca ke de ran dɛ kuɔc loom, e kaya dhuɔk e ke ye yic ŋuan.

⁹ Go Yecu yɔɔk, Ye luak ee bɛn yeɣone ekole, ku ne ke yen wen de Abraɣam eya.

¹⁰ Wen de raan ee bɔ bi ka eke ci maar bi kɔɔr ku bi ke luɔk.

¹¹ Na cik keekake piŋ, ke juɛkic ne parabol, ne kee cen thiɔk ke Jeruthalem, ku ne kee ye kek ye tak yii bi ceŋ de Nhialic dai tuɔl.

¹² A go jam, Ye bɛny tok ee ci keny pan mec, bi ceŋ lɔ loom, ku bi lɔ dhuk.

¹³ Go aluekke cɔɔl keethiɛr, ku yin ke jinii keethiɛr, ku jiɛm, Ye lui we ke agut te bɛi an.

¹⁴ Ku kee mɛɛn kɔcke, goki kɔc tuɔc ne yecok, lek yɔɔk, Yii wɔ ce yerane kɔr bi ya bɛnyda.

¹⁵ Na ɣɔn, aci jal dhuk, ke ci ceŋ lɔ loom, ke jam bi aluɛk eke ci yiɛn weu cɔl en, bi te cik juak ne weu thook nyic.

¹⁶ Go aluaŋ tueŋ kan bɛn, jiɛm, Ye Bɛny, jinidun waar ee jinii kɔk lɔ bɛi keethiɛr.

¹⁷ Go yɔɔk, Ye kapiath areet, yin ye aluaŋ piath: ku ke cene yi yok ke yin ye lui apiath ne kadiak, a bin naŋ riɛr de bɛidit keethiɛr.

¹⁸ Go aluaŋ de rou bɛɛr bɛn, jiɛm, Ye Bɛny, jinidu ee jinii kɔk bei keedhiec.

¹⁹ Go yɔɔk eya, Ye nɔŋ riɛr de bɛidit keedhiec eya.

²⁰ Ku bɔ dɛ, jiɛm, Ye Bɛny, ŋem jinidu eke, ee ca duut alath ku taau:

²¹ ne kee riac an ne yin, ne ke yin ran rir: yin ye ke kɛne taau piny kuany, ku ye tem ne ka kɛneke puur.

²² Go yɔɔk, Ye yin ba luk ne welku, yin aluaŋ rac. Yin nyic an ke ɣan ye ran rir, a ya loom ne ke kɛn taau piny, ku ya tɛm ne ka kɛnke puur.

²³ A ŋo cin weucie tɛɛu ne baŋkiyic, a na ya ca lɔ dhuk, e ke ba thiec lɔɔm ke ne cike juak yic?

²⁴ Go kɔc eke kaac tɛɛn yɔɔk, Ye lɔmka jini enɔŋ en, ku yiɛnka ran nɔŋ jinii keethiɛr.

²⁵ Goki yɔɔk, Yii Bɛny, kanɔŋ jinii keethiɛr.

²⁶ We ya yɔɔk, Ya ran ye naŋ ke dɛ, e kabi ya miɔc; ku ran ye ciɛn ke dɛ, ke ne cak ya kethin tɔ ke ye, e kabi nyaai enɔŋ en.

²⁷ Bɛika kɔccie wen ke ater, ye jam yii cik ɣa beer kɔɔr ba ya bɛnyden, bɛieke etene, ku nakka ke ne ɣanom eene.

²⁸ Na ci jam yeya, ke lony dhol leer tueŋ, leer Jeruthalem.

²⁹ Na ɣɔn, aci thiɔk ke Bathpagi kene Bethani, ne kuur ye cɔɔl kuur e Olip, ke toc kɔcpiocke keerou,

³⁰ jiɛm, Ya laka pan tɔ ne wenhiim tueŋ, ku na cak lɔ thin, ke we bi dan akaja yok ne mac, acin ran ci guɔ ya nyuc ne yekɔu: luɔnyka ku bɛika.

³¹ Ku na thiec raan week, Ye yeŋo luɔnyka dau? ke we jam wuɔla, Wuɔ kee Bɛnydit yeneka ŋɛŋ en.

³² Go kɔc eke ci tooc goki lɔ yok ne cit luɛlden wen.

³³ Ana yii ŋootki e ke lony dau, ke kɔc ke dau jam, Yii yeŋo luɔnyka dau?

³⁴ Goki jam, Yii kee Bɛnydit yeneka ŋɛŋ en.

³⁵ Ku biiki enɔŋ Yecu: ku thiethki alɛthken ne dau kɔu, ku nyuucki Yecu ne yekɔu.

³⁶ Ana ye ciɛth, e ke thieth alɛthken dholic.

³⁷ Na wen aci lɔ ke coth baai, te lɔ piny ne kuur e Olip thar, ke rem diit de kɔcpiocke gɔc miɛt de piɔu ku lecki ne ror dit ne kadit cike loi cikke ŋem;

³⁸ jamki, Yii keewuubi thiei ye Meleŋ bɔ ne rin ke Bɛnydit: ne dɔɔr ye tɔ nhial, ku ne nuɔm ye tɔ nhialic.

³⁹ Go kɔc kɔk ke Parithai tɔ ne duutic goki yɔɔk, Yii Bɛny, wai kɔckuk piɔceke.

⁴⁰ Go dhuk, Ye we ya yɔɔk, Ya na bi keekake mim, ke kur aabi coot.

⁴¹ Na ci thiɔk ke baai, ke ŋem baai, ku dhiɛu,

⁴² jiɛm, Ye na ne nyic ne yekole, ye yiin, kek ka ye ya ka ke dɔɔr! ku emane aa thian ne yinyin.

⁴³ Akɔl abi yi yok, akol bik kɔc man yin yi yuɛl piny ne thieŋ dit, aabi yi gɔɔl piny, tiitki yi thin ne biɔk kedhia,

⁴⁴ ku kaabi yi thuɔr piny, agut mithkuk tɔ ne yiyic; ku kacin kuur toŋ bik nyaŋ piny ne kuure nom ne yiyic; ne ke kuc yin kol e nɛɛmdu.

⁴⁵ Go lɔ ne yekaluic, ku gɔɔc kɔc ne ciɛc kɔc eke ye kaŋ ɣaac,

⁴⁶ yook ke, Ye kee gɔɔr, Ya luaŋdie abi ya cɔɔl luaŋ de lɔŋ: ku kacak cɔk ye ɣon de rum.

⁴⁷ Ku ye cool ne weet ne yekaluic ne nyindhia. Go banydit ke ka ke Nhialic ku dugɛɛr kene bany ke kɔc goki kɔɔr bik nɔk:

⁴⁸ goki ke bik loi kuc; ne kee ci kɔc e guɛɛr, piŋki.