Welpiath ci Luk cithiei ke gɔɔr 18 - Lek Jot de Jecu Kritho 1940

¹ Go ke ciɛr parabol, bik lɔŋ ya luut, ku cik kɔn dak;

² jiɛm, Ye duluk ee tɔ pan tok, ran e cie riɔc ne Nhialic, ku cii raan ye cɔk ye ke dɛ:

³ ku kee nɔŋ tiŋjɔɔk tɔ yepane; tiŋ e ye cool e bɛn enɔŋ en, ye jam, Ye luk luŋdie wɔ ran de aterdie.

⁴ Go yok ke rec: wen ke jɔl jam ne yepiɔu, Ye ne cak ya man can ye riɔc ne Nhialicne, ku caa raan ye cɔk ye ke dɛ,

⁵ ke ke ye yetiŋe ɣa yɔŋ, aban e luɔk luŋde, a go ɣa cuɔk ye bɛɛr nuan ne cool e bɛn.

⁶ Go Bɛnydit jam, Ye piɛŋka ke luel duluŋ rac.

⁷ Ci Nhialic kɔckeek ci lɔc bi luɔk luk, kɔc ye cool e cɔl en akol ku wɛɛr, ku ye kac de piɔu luut enɔŋ keek?

⁸ We ya yɔɔk, Ya kaabike dai luɔk luk. Ku na bɔ Wen de raan, ke bi gam yok ne piny nom?

⁹ Go ke bɛɛr ciɛr yeparabole kek kɔc ye roth luel yii kek ye lajik, ku ye raan ebɛn rɛɛc:

¹⁰ Ye kɔc keerou aake lɔ yekalu lek lɔŋ; tok ee ye muɔny Paritha, ku ye kene mejuer.

¹¹ Go muɔny Paritha kɔɔc ku lɛŋ yela ne yepiɔu, Ye Nhialic, yin lɛɛc, ne ke can cit kɔc kɔk, kɔc ye rum, ku kucki luk, kɔc ye kor, ku caa cit yemejuere.

¹² Ɣan ye thiel naarou ne wik tok; ku ya ke de thiɛr gam ne kacie yic kedhia.

¹³ Go mejuer go kɔɔc temec, ku cii yenyin jɔt nhial, ku biɛk yepiɔu, jiɛm, Ye Nhialic, ye piɔu kac ne ɣa, ɣan ran rac.

¹⁴ We ya yɔɔk, Ya yerane ee dhuk bei ke ci cɔk lajik ne rane: raan ebɛn ye rɔt cɔk dit abi ya kuur, ku ran ye rɔt kuɔr piny abi ya dit.

¹⁵ Goki miththiiken bɛi enɔŋ en, bi ke bi jak gup: na ci kɔcpiocke ke ŋem, e ke waiki ke.

¹⁶ Go Yecu ke cɔɔl, jiɛm, Ye cakka miththii ye bɛn enɔŋ an: ku duɔka ke ye peen: ka cit ke keeka ye ya ceŋ de Nhialic.

¹⁷ We ya yɔɔk neyic, Ya raan ebɛn ran cie bɛn ne ceŋ de Nhialicic ci man de mɛnhthi, e kace lɔ thin bi kan leu.

¹⁸ Go bɛny tok thiec, jiɛm, Ye Dupiony Piath, yeŋo ba ya loi ban naŋ piir athɛɛr?

¹⁹ Go Yecu yɔɔk, Ye yeŋo yin a cɔk piath? acin toŋ ye piath, ee tok, ee Nhialic.

²⁰ Yin nyic looŋ, Ya duɔne ye kor, Duɔne ye nɛk, Duɔne ye kual, Duɔne ye rieth, Ye wuur theek ke ke moor.

²¹ Go jam, Ye keekake aacake ya loi ne lan e yan ranthi agut ci emane.

²² Na ci Yecu ye piŋ, ke jam, Ye kee tok yeneka ŋoot ke liu: ɣaace kaku kedhia, ku tɛke ke aŋaaŋ, ku yin bi naŋ weu nhial: ku jɔl bɛn, ye ɣa kuany cok.

²³ Na ye piŋ keekake, ke dhiau piɔu areet; ne kee cen bany areet.

²⁴ Na ci Yecu ye ŋem, ke jam, Ye bɛn de ran ci bany ne ceŋ de Nhialicic arir ewai!

²⁵ Teek de thɔrɔt ne nyin de alibrɔtic, yeneka kɔc ne lɔ de ran ci bany ne ceŋ de Nhialicic.

²⁶ Go kɔc ci ye piŋ goki jam, Yii a yeŋa bi luɔk?

²⁷ Go jam, Ye ka ye raan dhal, aye Nhialic ke leu.

²⁸ Go Petero jam, Ye ŋem, wɔ ci kakuɔ puɔl ku yuku yi biɔɔth.

²⁹ Go ke yɔɔk, Ye we ya yɔɔk neyic, Ya kacin ran ci ɣot puɔl, ku tiik, ku watmɛthke, ku wun ku man, ku mith, ne ke de ceŋ de Nhialic,

³⁰ ku cii bi naŋ kajuec ne yepinye nom, ku piir athɛɛr de ceŋ bi bɛn.

³¹ Go thiɛrkurou loom, ku yook ke, Ye ŋɛmka, wɔ lɔ Jeruthalem, ku keriɛc ci gɔɔr ne nebii aabi luɔi Wen de raan.

³² Abi gam yine Juurkɔk, ku kabi bui, ku luie karac, ku kabik ŋuɔɔt:

³³ ku kabik dui ku nakki: ku na ye nin yi yiki diak, e kabi rɔt bɛɛr jɔt.

³⁴ Goki ciɛn toŋ nyicki cok ne keekake; ku keewelka aake ci thian ne keek, goki wel cike luel cuɔk nyic.

³⁵ Na ɣɔn, aci thiɔk ke Jeriko, ke cɔr ee tɔ ne dhol kec, ye lim:

³⁶ go duut piŋ ke tek, go thiec bi nyic ke yeŋo.

³⁷ Goki yɔɔk, Yi kee Yecu de Nadhareth yeneka teek.

³⁸ Go coot, jiɛm, Ye Yecu, yin wen de Dabid, kace piɔu enɔŋ an.

³⁹ Go kɔc ŋaar waai bi mim: go dhiac ke cot areet, Ye yin Yecu, wen de Dabid, kace piɔu enɔŋ an.

⁴⁰ Go Yecu kɔɔc, ku jiɛm, bi bɛi enɔŋ en: na ci ɣeet tethiɔk, ke thiec,

⁴¹ Ye yeŋo kɔr ba luɔi yin? Go jam, Ye Bɛnydit, ee ba bɛɛr yin.

⁴² Go Yecu yɔɔk, Ye yiɛne: gamdu ee yi cɔk piɔl.

⁴³ Go dai yin elantoŋtɛi, ku biɔɔth cok, ke lec Nhialic; ku na ci raan ebɛn ye ŋem, ke jɔl Nhialic cok leec.