Welpiath ci Luk cithiei ke gɔɔr 17 - Lek Jot de Jecu Kritho 1940

¹ Go kɔcpiocke yɔɔk, Ye ka ye kɔc cɔk kɔth abi tɔ: ku kabi naŋ dhieu enɔŋ yen yen man ye ke cɔk tul!

² Aŋuan enɔŋ en te duute kuur de guɛr ne yeyeth, ku cuɛte bɛɛr, ne kɔth ben toŋ de keekathiike cɔk kɔth.

³ Yaka roth ŋem apiath: na loi wanmuuth rɛɛc, ke wai; ku na wel yepiɔu, ke pɛl.

⁴ Ku na ci yi luɔi rɛɛc naadherou ne akol tokic, ku beer yepiɔu wel naadherou, jiɛm, Ye ɣan dhiau piɔu; ke pale awanyde.

⁵ Go kɔcpiocke Bɛnydit yɔɔk, Yi cɔk gamda cɔk dit.

⁶ Go Bɛnydit jam, Ye na ye gamduɔn thoŋ ke nyin thin de muthada, kee te lɛuka yetim cɔl ŋaape ne yook, Wuɔ tuk yithar, ku lɔɔr cuɔme rɔt ne baric; e ke te ci we gam.

⁷ Ku yeŋa de week, nɔŋ aluaŋ ye ye puɔr, ka yin thokke ya biɔɔk, na bii roor, ke yook, Ye bar, dɔc nyuc ba cam;

⁸ ku cii bi yɔɔk, Ye loi ke cam, dut yiyic, ku luɔiye ɣɛn, ba kan cam ku kan dek; ku jɔl lɔ cam ku dɛkne aala?

⁹ Ye aluak leec ne ke cen welke ya loi?

¹⁰ Yenekee cɔɔkduɔn eya, na cak kaŋ loi kedhia, ka ci lɛk week, ke we jam, Wuɔ wɔ ye aluɛk rac; wɔ ci luɔi baŋda acuk loi abac.

¹¹ Na ɣɔn, atɔki dhol e Jeruthalem, ke bak Thamaria ciɛlic ku Galili.

¹² Ana ye ɣeet pan thin tok, ke ram ke kɔc keethiɛr kɔc cii abiɛl ke dɔm, e ke kaac temec:

¹³ goki kerot jɔt, cotki, Yii Yecu, Bɛny, kace piɔu ne wɔɔk.

¹⁴ Na ci ke ŋem, e ke yookke, Ye lak nyuɔthka roth bany ke ka ke Nhialic. Na wen, aleki, e ke go guɔ dɛm.

¹⁵ Na ci ran toŋ de keek rɔt ŋem ne ci dɛm, ke dhuk rɔt ke ye coot, leer ke lec Nhialic;

¹⁶ bii ku cuɛt rɔt piny ne yecok, ku leec, ku kee ye muɔny Thamaria.

¹⁷ Go Yecu dhuk, jiɛm, Ye ne ke cie thiɛr wen kek kɔc ci dɛm; a tɔ dheŋuan eno?

¹⁸ Cin toŋ lɔ rɔt dhuk bi Nhialic ben yiɛn nuɔm, a ye yealene?

¹⁹ Ku yook, Ye jɔt rɔt, gamdu ee yi cɔk piɔl.

²⁰ Go Parithai thiec, ne te bii ceŋ de Nhialic bɛn, go ke gam, jiɛm, Ye ceŋ de Nhialic aci bi bɛn ke dɛiye:

²¹ ka bi luel, Ya ŋɛmka, kabɔ tɛɛn! ka ya, Kabɔ tɛɛn! ŋɛmka, ceŋ de Nhialic atɔ ne weyic.

²² Go kɔcpiocke yɔɔk, Ye akol kɔk aabi bɛn, akol bii we kol de Wen de raan ya ŋaŋ bak ŋem, ku kacak bi ŋem.

²³ Ku kaabi we ya yɔɔk, Yii ŋɛmka tɛɛn! ku yii tene! ke we duɔka ye lɔ, duɔka ke ye biɔth:

²⁴ acit man de yuil e deŋ, man ye yuil ne nhial biakne ku lee gut ne nhial baŋe; yeneka bi ya cɔɔk de Wen de raan ne kolde.

²⁵ Ku kabi kajuec kan guum tueŋ, ku bi jai ne yekuane.

²⁶ Acit akol ɣɔn ke Noa, yeneka bi yenya ne akol ke Wen de raan.

²⁷ Ɣɔn ye kek cam, ku yiki dek, ku yiki thieek, ku ye ke thiak, agut kol lere Noa riɛi, abiiye aboor, ku mou ke kedhia.

²⁸ Ku yene ye cɔɔk de akol ɣɔn ke Lɔt; ake ye cam ku yiki dek, ku yiki ɣooc, ku yiki kaŋ ɣaac, ku yiki com, ku yiki ɣoot yik;

²⁹ ku kol jɔle Lɔt jaal ne Thɔdom, ke wɛl mac nhial, ku thulpur, ku nɛk ke kedhia:

³⁰ yeneka bi ya cɔɔk de kol de Wen de raan, ben tuɔl.

³¹ Yekole, ke ran tɔ nhial ne ɣot nom, ku tɔ kake ɣot, ke ne ce lɔ piny bi kake lɔ nap bei: ku yene ye cɔɔk de ran tɔ domic, ne ce beer dhuk ciɛn.

³² Yaka wenhiim ciɛt ne tiŋ de Lɔt.

³³ Ran ye piɔu naŋ luɛk weike aabike ya wuɔɔc: ku ran ye ke wuɔɔc aabike ya luɔk.

³⁴ We yɔɔkke, Ya yekaune abii kɔc tɔ e ke ci tac keerou ne agen tokic; tok abi jɔt, ku dɔŋ kene.

³⁵ Abi naŋ diar keerou guɛr ne kuur tok nom; tok abi nyaai, ku dɔŋ kene.

³⁶ Abi naŋ kɔc tɔ domic keerou; tok abi nyaai, ku dɔŋ kene.

³⁷ Goki bɛɛr yookki, Yii ye teno, Bɛny? Go ke yɔɔk, Ye te ye guɔp tɔ thin, yeneka ye coor guɛɛr.