Welpiath ci Luk cithiei ke gɔɔr 16 - Lek Jot de Jecu Kritho 1940

¹ Ku beer kɔcpiocke yɔɔk, Ye kee nɔŋ ran e ci bany nɔŋ meŋemde; go yerane guɛɛl ya ye ka ke wun thiɔi.

² Go cɔɔl ku yook, Ye yeŋo eke ca piŋe enɔŋ yin? Nyuɔthe ɣa kuɛn de kaku ye ke ŋem da. Yin ce beer ya meŋem.

³ Go meŋem jam ne rɔt, Ye ba ŋo loi? bɛnydie anyiɛi ŋem de kaŋ enɔŋ ɣɛn. An cin riɛr puɔr an; an ye lim riɛu.

⁴ An ci ke ba loi tak, ke bik kek ɣa loor ne ɣootken yic te nyiɛie ɣɛn ne ŋem de kaŋic.

⁵ Go kɔc ke kany ke bɛnyde cɔɔl, ku thiec ran tueŋ, Ye yede ca yuit enɔŋ bɛnydie?

⁶ Go luel, Ye kaaye riɛm ke miok keethiɛrnyɛny. Go yɔɔk, Ye lom waragaŋdu, ku dɔc nyuc piiny, ku gar thiɛrdhiec.

⁷ Ku beer ran dɛ thiec, Ye ca de yuit? Go luel, Ye kaaye riɛm ke rap keethiɛrnyɛny. Go yɔɔk, Ye lom waragaŋdu, ku gar thiɛrbɛt.

⁸ Go bɛnyde meŋem rac leec, ne ke cen lui ci ran nyic kaŋ: wɛɛt ke yepinye aawɛr wɛɛt ke ɣɛɛr ne nyiny de kaŋ ne kuandenic.

⁹ We ya yɔɔk, Ya yaka maath wene kɔc ne wɛu ke luɔi rac; bik we ya loor ne ɣan ke ceŋ athɛɛr te ye we yuik.

¹⁰ Ran ye kalik dot, ee kajuec dot eya: ku ran ci kalik ye dot aci kajuec ye dot eya.

¹¹ Yen na cak weu ke luɔi rac ye dot, ke ŋa bi weu yith ya tau week?

¹² Ku na kɛnka ka ke ran dɛ ya dot, ke ŋa bi we ya yiɛn ka ye kakuɔn?

¹³ Acin awun ye bany keerou leu ne lui: abi tok ya maan, ku ye tok nhiar; kabi ya ceŋ ke tok, ku ye tok rɛɛc. We ci Nhialic bi ya luɔi ku weu.

¹⁴ Go Parithai, kɔc ye weu nhiar, goki keekake piŋ kedhia; goki bui.

¹⁵ Go ke yɔɔk, Ye we ye roth cɔk lajik ne kɔc nyin; ku Nhialic ee we nyic piɔth: ke ye leec areet ne kɔc ee ya ke man ne Nhialic nyin.

¹⁶ Loŋ ku nebii aake tɔ agut en Jɔn: elan e bii en, go welpiath ke ceŋ de Nhialic jal ya luel, go raan ebɛn jal ya wat leer thin.

¹⁷ Na jiɛl yi nhial ke ke piny, e kapiɔlic ne lony wei de cook toŋ de loŋ.

¹⁸ Raan ebɛn ran ye tiŋde puɔl, ku thiɛk dɛ, e kee ya mekor: ran ye tiŋ ci moc puɔl thiak, e kee ya mekor.

¹⁹ Raan ee tɔ ran nɔŋ kaŋ, ku ye ceŋ ne alanh alian piath, ku ye miith lɔyum cam:

²⁰ ku tɔ melim cɔl Ladharo cii kɔc kan ne ɣonde thok, nɔŋ guɔp ɣɔntook juec,

²¹ ku ye piɔu naŋ bi ya yiɛn thethuei ye loony piny ne agen de ran nɔŋ kaŋ nom; go jɔk bɛn ku yiki ɣɔntook nyan yic.

²² Ɣɔn ke melim ke thou, go laar ne malaikai ku lek taau ne Abraɣam yɔu: ku thou ran nɔŋ kaŋ eya, go thiɔk.

²³ Ku te tɔ yen pan de tip ke kɔc, go yenyin jɔt, ke guum luc, ŋem Abraɣam temec, ku Ladharo ne yeyɔu.

²⁴ Go coot ku jiɛm, Ye Awa Abraɣam, kace piɔu enɔŋ ɣa, ku tuuc Ladharo, bi yeriop juɔl ne piu yic, bi a cɔk lir liep; an ci guɔp lɔ cuei ne yemanyeic.

²⁵ Go Abraɣam yɔɔk, Ye Wene, ciɛte yinom, waar piir yin ke yin ee ye kapiɛthku kap, ku kap Ladharo karac: yen emane eene ee naŋ duɔt epiɔu, ku lɔ guɔp cuei.

²⁶ Ku kanɔŋ dɛ, kaamda wɔne yin anɔŋ adhuɔm dit; na nɔŋ kɔc piɔth bik neth enɔŋ yin, e kacik leu, ku cin ran leu en ne neth eeti enɔŋ wɔɔk.

²⁷ Go jam, Ye yen yin laŋ, awa, ba tuɔc ɣon de awa;

²⁸ an nɔŋ watmathkuɔ keedhiec; bi ke lɔ yɔɔk, duɔeke bi bɛn yete de luce eya.

²⁹ Go Abraɣam jam, Ye kaanɔŋ Mothe ku nebii; neke piŋeke.

³⁰ Go jam, Ye naa, Abraɣam awa: na lɔ ran toŋ ci thou enɔŋ keek, e kaawel kepiɔth.

³¹ Go yɔɔk, Ye na cik Mothe ye piŋ ku nebii, ku ne ran toŋ ci thou cak rɔt jɔt, e kace ke kuem nhiim.