Welpiath ci Luk cithiei ke gɔɔr 11 - Lek Jot de Jecu Kritho 1940

¹ Na ɣɔn, te lɔŋ en etɛɛn, ku jɔl ye pɛl, ke ran toŋ de kɔckeek piocke yook en, Ye Bɛnydit, piɔce wɔ buk ya lɔŋ, ci man e pioce Jɔn kɔckek piocke.

² Go ke yɔɔk, Ye na yaka lɔŋ, ke we ye jam, Wuɔ Awadan tɔ nhial, Rinku aabike ya riɛu. Cɔk ceŋdu cɔk bɔ.

³ Ye wɔ miɔc ne yekole buk ya cam.

⁴ Ku ye wɔ puɔl ne karɛckuɔ; ne ke ye wɔ raan ebɛn pal kanykuɔ eya. Duɔne wɔ ye yiɛn them; ye wɔ luɔk ne kerac.

⁵ Go ke yɔɔk, Ye yeŋa ne week nɔŋ mɛthe, ku bi lɔ enɔŋ en ne wɛɛr ciɛlic, lee yɔɔk, Ye Math, yiɛne ɣa monoi keediak;

⁶ math ee bɛn enɔŋ ɣɛn teden de cath, ku kacin ke gaaŋ an en;

⁷ ke bi dhuk ye ran tɔ ɣot yook, Ye duk ɣa yɔŋ: ɣot ee thiɛɛk thok emane, ku mithcie aatɔ kene ɣɛn agenic; ɣan ce rɔt leu ne jot ku laa yi miɔc?

⁸ We ya yɔɔk, Ya na cii rɔt cak jɔt ku miɔc, ne ke yen mɛthe, e kabi rɔt wuth ne agɔcthinde ku yin kajuec ci ye ŋɔɔŋ.

⁹ Ku we yake yɔɔk, Ya yaka thiec, ku kabi ya yiɛn we; yaka kɔr, ku kabak ya yok; yaka tɔŋ, ku kabi ya liɛp we.

¹⁰ Raan ebɛn ye ŋal, abi ya loom; ku ran ye kor abi ya yok; ku ran ye tɔŋ abi ya liɛp e.

¹¹ Yeŋa ne week nɔŋ meth, ku thiec meth mono, ke bi lɔ yiɛn kuur? ka na thiec rɛc, ke bi lɔ yiɛn keroor cɔk ye rɛc?

¹² Ka na thiec tuɔŋ, ke yin ciɛɛth?

¹³ Yen na yaka mithkuɔn nyiɛc miɔc, ke we rac, ke Wuɔrduɔn nhial bi Jɔŋdiit Lajik yiinde yiɛn kɔc ye ye thiec?

¹⁴ Ku kee ciec jɔŋ cin thok. Na wen ci jɔŋ rac bɛn bei, ke ran cin thok ke jam; go duut gai.

¹⁵ Go kɔc kɔk ke keek jam, Yii kee jak rac ciec ne riɛl de bɛny de jak rac, Beeldhebub.

¹⁶ Go kɔc kɔk goki thiɛc cin nhial them kek yen.

¹⁷ Go tɛŋden nyic, ku yook ke, Ye ceŋ ebɛn ye teer ke rɔt ee lɔ te de riaak; ku ɣon ye yeyic tek ee yuik.

¹⁸ Ku na ye Catan teer ne rɔt; ke ceŋde bi kɔɔc yede? ne ke ye we jam wuɔ ya jak rac ciec ne Beeldhebub.

¹⁹ Ku na ya jak rac ciec ne Beeldhebub, e ke ye weetkuɔn ke ciec ne ŋa? Yen kaabi jal ya duluukuɔn.

²⁰ Ku na ya jak rac ciec ne ciin de Nhialic, ke ceŋ de Nhialic ee bɛn ne wegup.

²¹ Na tɔ ran rir ke weukeek ke ɣeet tit en ke pande, ke kake aye tɔ apiath:

²² ku na bɔ dɛ rir e yen ku tiɛɛm en, e kalom weukeek wen ke ɣeet yen ke rɔt gɛi, ku tek kakeek ci rum.

²³ Ran cie mat ke ɣa ee teer ke ɣa; ku ran cie kuany kene ɣɛn yenekee kɛɛr ke wei.

²⁴ Na ci jɔŋ rac bɛn bei ne raan guɔp, e ke teek ne ɣan cin piu, kɔɔr te de lɔŋ; go ciɛn te lee yok, go jam, Ye ɣan bi rɔt dhuɔk ɣondien wen bɛi an bei thin.

²⁵ Wen ye bii, ke yok ne ci weecic a ci diik.

²⁶ Ela ke lɔ dhuk, ku lee jak rac loom keedherou jak wɛr en ne rɛɛc; ku leki thin lek ceŋ: go taa de yerane jal rac aŋuɛɛn tɔ thɛɛrde.

²⁷ Na re, aŋoot ke luel keekake, ke tiŋ tok jɔt eror ne duutic ku yook, Ye kee thiei yeadhienh e dhiethe yin, ku thin e yee tiak.

²⁸ Go jam, Ye naa, kɔc ye wɛt de Nhialic piŋ, ku yiki muk, keeka cike thiei.

²⁹ Na ci duut ye guɛr, ke gɔc jam, Ye yekuane ee kuan rac: ee cit kɔɔr; ku kacin cin bi kan yiɛn e a kee cin de Jona.

³⁰ Ci man e ye Jona cit enɔŋ kɔc ke Ninebe, yenekee cɔɔk de Wen de raan ben ya cin de yekuane.

³¹ Tiɛŋbɛny de piny ciɛm abi rɔt jɔt ne kol e luk kene kɔc ke yekuane, ku kabi luɔkwei: ne ke bii en ne piny thar bi nyiny de Tholomon ben piŋ; ku ŋɛmka, yen man dit a wɛɛr Tholomon ekee kene.

³² Kɔc ke Ninebe aabi roth jɔt ne kol e luk kene yekuane, ku kaabik luɔkwei: ne kee cik kek kepiɔth wɛl pioc de Jona; ku ŋɛmka, yen man dit a wɛɛr Jona ekee kene.

³³ Acin ran na de ku deep lamba, ke cook ɣon piiny, ka buur piny ne akook, aye taau nhial, bii kɔc lɔ ɣot bik riarde ŋem.

³⁴ Nyindu yenekee ya many de yiguɔp: yen na lɔ nyindu car, ke guɔpdu ebɛn ee ya ɣɛɛr nyin; ku na rac nyin, ke guɔpdu ee ya cuɔl nyin.

³⁵ Yen ye rɔt caar duɔke ɣɛɛr ye tɔ ne yiguɔp bi ya cuɔl.

³⁶ Na ye guɔpdu ebɛn ya ɣɛɛr nyin, a cin tecol, e kabi cok ya ya ɣɛɛr nyin ebɛn, ci man de riar de lamba yen yi riar.

³⁷ Ku te ŋoot en ke jam, ke thiec ran toŋ de Parithai bi lɔ cam ke ye: go lɔ ɣot, ku nyuuc bi cam.

³⁸ Na ci muɔny Paritha ye ŋem, ke gɛi ne camde ke ken guɔ piiny.

³⁹ Go Bɛnydit yɔɔk, Ye we Parithai we ye abiny waak kɔu ku aduuk, ku we ci yic thiaŋ ne rum de kɔc ku rɛɛc.

⁴⁰ We ye kɔc ci bel, ken ke e cak baŋ biyic ken baŋ thin cak eya?

⁴¹ Yaka miooc ne ka ke baŋ thin, ku ŋɛmka, keriɛc ebɛn abi ya piath enɔŋ week.

⁴² We bi naŋ dhieu we Parithai! ne ke ye we ke de thiɛr juar de mint ku de rue ku de wal ebɛn, ku yaka luk dhoŋ ku nhiɛr de Nhialic; keekake keeka ete cak ke kan dhiil ne luɔi, ku cak kɔk ye puɔl.

⁴³ We bi naŋ dhieu we Parithai! ne ke ye we kok ne ɣɔn ke bany ke nyuc ne luek ke gueer yic, ku muɔth yene we muɔth ne ɣan ke ɣɔc.

⁴⁴ We be naŋ dhieu! ne ke cit we rɛŋ cie tic, ku ye ke kuc ne kɔc ye ke bak nhiim.

⁴⁵ Go ran toŋ de dukuuny ke luɔk go dhuk yook, Ye Dupioc, na ye jam wula, ke yin ye wɔ waai eya.

⁴⁶ Go jam, Ye we bi naŋ dhieu we dukuuny ke luɔk eya! ne ke ye we kɔc jɔt kɔth kathiek edot bik ke ɣaac, ku cak ke jak ne gupkuɔn ne werioop.

⁴⁷ We bi naŋ dhieu! ne ke ye we rɛŋ ke nebii buth, ku ye wurkuɔn kek ke nak ke.

⁴⁸ Yen we ye duleek ku we ye mat wene wurkuɔn ne luɔiden: ne ke yen keek eke nak ke, ku yaka rɛŋken buth.

⁴⁹ Yenekee jiɛme nyiny de Nhialic yela eya, Ye kaabake tuɔc nebii ku dutuuc; ku kɔk ke keek aabikke lɔ nɔk ku ŋetki ke;

⁵⁰ bi riɛm de nebii kedhia ci kuer elan e ciɛke piny, bi thiɛc yekuane;

⁵¹ gɔc ne riɛm de Abel agut en riɛm de Dhakaria, man e nak ne kaam de kan de koc kene telajik: we yɔɔkke neyic, ya kaabi thiɛc yekuane.

⁵² We bi naŋ dhieu we dukuuny ke luɔk! ne ke ci we muktar de nyic nyaai: we ken lɔ thin ne gupkuɔn, ku yaka kɔc ye lɔ thin peen.

⁵³ Na ci bɛn bei etɛɛn, go dugɛɛr ku Parithai goki teer gɔɔc kene yen areet, bik cɔk jam ne ka juec;

⁵⁴ buthki, bik naŋ ke dɔmki ne yethok.