Kolothai 3 - Lek Jot de Jecu Kritho 1940

¹ Na ci we bɛr cɔk jɔt roth etok wene Kritho, ke we ye kanhial kɔɔr, te tɔ Kritho thin, yen nyuc ne ciin cuec de Nhialic.

² Yaka kanhial tak, ku kacie ka ye tɔ ne tiɔp nom.

³ We ci thou, ku piirduɔn ee thian kene Kritho ne Nhialicic.

⁴ Na bi Kritho nyuɔth, man ye piirda, ke week eya we bi nyuɔth wene yen ne nuɔm.

⁵ Yen cakka kakuɔn cɔk thou ka tɔ ne tiɔp nom; bɛɛl, ku cuɔl de piɔu, ku kɔɔr de guɔp, ku kɔɔr rac, ku wek, yenekee duɔr de ka yeke cak.

⁶ Keek keekake aaye ɣok de Nhialic bɛi enɔŋ wɛɛt ke areecwel.

⁷ Aake ye we ke cath ne keyic eya ɣɔn piir we ne keyic.

⁸ Ku yemane nyaaika keekake kedhia eya; ɣok, ku tɔŋ, ku guur, ku lɛɛt, ku wel rɛc ye bɛn bei ne wethook:

⁹ ci ŋɛk ŋɛk ye math; ne ke ci we ran thɛɛr nyaai kene luɔide,

¹⁰ ku cak ran jot piɔth, yen man ye bɛɛr cuec ne nyiny gok, bi ciɛt en yen man e cak en:

¹¹ te bi ciɛn Giriki ku Juda, aŋuala ku aboor, Bɛɛr, Thekutha, aluak ku ran cie aluak: Kritho ekee keriɛc ku yen ne keyic kedhia.

¹² Yen yaka roth piɔth, ci ka ke Nhialic cike lɔc, ye lajik ku yiki kanhiɛɛr, ne kac de piɔu, ku ne kuny, ku kuur de piɔu, ku pian luɔɔi, ku guɔm;

¹³ yaka muɔl ne roth, yaka roth puɔl; te ye raan naŋ ater ke rane; ci man ee ci Benydit we puɔl, yee we roth puɔl eya:

¹⁴ ke war yekeriɛce ebɛn ee yaka nhiɛr piɔth, man ye kɔc kuɛɛk nejik.

¹⁵ Ku yaka dɔɔr de Kritho cɔk ye we yal piɔth, man e cene we caal ne guɔp tokic; ku yaka leec.

¹⁶ Yaka wɛt de Kritho cɔk ceŋ ne weyic ne nyic ebɛn; yaka roth wɛɛt ku yaka roth jɔɔny ne ket, ne diɛt, ku ne diɛt ke duɔr, ku yaka Nhialic kɛɛt ke we nɔŋ piɔth athiɛi.

¹⁷ Ku keriɛc yaka loi ebɛn, naa wɛt ka ne luɔi, yaka loi ebɛn ne rin ke Bɛnydit Yecu, ku yaka Nhialic Wun yiɛn lɛc ne yen.

¹⁸ We diar, yaka tɔ ne riɛr de roorkuɔnic, ci man piɛth en ne Bɛnyditic.

¹⁹ Ku we roor, yaka diarkuɔn nhiar, ku duɔka piɔth ye kɛc enɔŋ keek.

²⁰ We mith, yaka kɔckuɔn riɛu ne kaŋ kedhia, ne ke ye Bɛnydit piɔu lɔyum ne yekene.

²¹ Ku we wunken, duɔka mithkuɔn ye cuɔth piɔth, kɛlke kek bi piɔth ya maar ne week.

²² Ku we aluɛk, yaka wel piŋ kedhia wel ke banykuɔn ke guɔp; ku duɔka ye lui te ye kek nyiin tɔ thin, ci kɔc ye kɔc yuum piɔth, yaka lui ne piɔth took, ke we ye riɔc ne Bɛnydit:

²³ Keriɛc ebɛn ke yaka loi, yaka loi ne piɔu ebɛn, ci ke de Bɛnydit, ke cie ke de kɔc;

²⁴ ku nyiɛcka we bi ariop de ceŋ adooc ya loom enɔŋ Bɛnydit, ne ke ye we Bɛnydit Kritho luɔi.

²⁵ Ran ye lui arac abi ya dhuɔk ke de luɔi rɛɛcde: kɔc aacie kuany yic.