Welpiath ci Jɔn cithiei ke gɔɔr 5 - Lek Jot de Jecu Kritho 1940

¹ Ɣɔn ne kaake cok ke miɛth diit de Judai ee tɔ; go Yecu lɔ Jeruthalem.

² Ku wɛr atɔ ne thoŋ de amɛl lɔɔm ne Jeruthalem, ye cɔɔl Bethetheda ne thoŋ de Eberu, nɔŋ akuɛɛth keedhiec.

³ Ku ci dun diit de kɔc bec taac ne keyic, ku coor, ku ŋot, ku kɔc ci ruai, titki amaŋ de piu.

⁴ Ku malaika kee lɔ piny ku le wɛric ne akol kɔk, ku mɛɛk piu; ku ran ci kan kɛɛc ne piu yic te mɛɛk en piu ee dɛm ebɛn ne benyden ye tɔ ke ye.

⁵ Ku raan ee tɔ, ran ci arɛɛm dɔm ne run keethiɛrdiak ku bɛt.

⁶ Na ci Yecu ye ŋem ke ci tɛc, ku nyic ke ci tɔ ne run juec yela, go yɔɔk, Ye nɔŋ piɔu bi yi cɔk piɔl?

⁷ Go ran bec jam, Ye Bɛny, kacin ran ye ɣa tau ne piu yic te mɛɛke ke: ku te ŋuɔt an ke an bɔ, ke ran dɛ a go dai kɛɛc wɛric ne anom.

⁸ Go Yecu yɔɔk, Ye jɔt rɔt, jɔt agendu, ku cathe.

⁹ Go raan dai dɛm elantoŋtɛi, ku jɔt agende, ku ciɛth. Ku kee ye akol de thabath.

¹⁰ Go Judai ran ci dɛm yɔɔk. Yi kaya akol de thabath: yen kace piath ba agendu jɔt.

¹¹ Go ke yɔɔk, Ye ran e cɔk ɣa dem, yenekee yook an, Ye jɔt agendu, ku cathe.

¹² Goki thiec, Yi yeŋa e yook yin, Ye jɔt agendu, ku cathe?

¹³ Ku kakuc ran ci dɛm lan yen ŋa: Yecu ee rɔt liɛp wei ne thiaŋ ci piny thiaŋ ne kɔc.

¹⁴ Ela ke yok Yecu ne yekalu, go yɔɔk, Ye ŋem, yin ci cɔk piɔl: duɔna kerac ber loi, kɛlke yin bi rac ne rɛɛc war yerɛɛce.

¹⁵ Go ran lɔ ɣɔu wei ku le Judai yɔɔk ye kee Yecu yenekee cɔk ye piɔl.

¹⁶ Go Judai goki Yecu ŋet ne ekene, ku nɔŋki piɔth bik nɔk ne ke cen kaake loi ne akol de thabath.

¹⁷ Go Yecu dhuɔk ke, Ye Awa ee lui agut ci emane, ku an ye lui.

¹⁸ Go Judai goki piɔth naŋ bi cok nɔk ne ekene, ne ke cen ke rek, dony kol e thabath ku cɔk Nhialic ye Wun, cɔk rɔt cɔk thoŋ ke Nhialic.

¹⁹ Go Yecu dhuɔk ke jiɛm, Ye we ya yɔɔk neyic, Ya Wa ace ke dɛ leu ne luɔi ne guɔpde, ee ke ye ŋem ne ye Wun loi abac. Ke dɛ ebɛn ke ye loi, eka loi Wa eya,

²⁰ Wun ee Wa nhiar, ku nyuth ke dɛ ebɛn ke ye loi: ku kabi nyuɔth luɔi diit war kaake, bi we gai.

²¹ Acit man ye Wun kɔc ci thou jɔt, ku ye ke cɔk piir, yenekee cɔɔk de Wa eya ben kɔc tɔ ne yepiɔu ya cɔk piir.

²² Acin ran ye Wun ke dɛ luk, ee luk ebɛn yiɛn Wa:

²³ bi raan ebɛn bi Wa ya riɛu ci man rieu ke Wun. Ran ci Wa ye riɛu aci Wun ye riɛu man ci ye tuɔc.

²⁴ We ya yɔɔk neyic, Ya ran ye wɛtdie piŋ, ku gɛm en yen man ci a tuɔc, ee naŋ piir athɛɛr, ku kaci ye luɔkwei; ee thou dɛɛny ne piiric.

²⁵ We ya yɔɔk neyic, Ya thaa abɔ, ku katɔ emane, bi kɔc ci thou ror de Wen de Nhialic piŋ: ku kɔc ye piŋ aabi ya piir.

²⁶ Acit man ye Wun naŋ piir ne rɔt, yenekee cɔɔk cen e yiɛn Wa eya bi ya naŋ piir ne rɔt;

²⁷ ku kaci yiɛn riɛr bi luk a luk, ne ke yen Wen de raan.

²⁸ Duɔka gɛi ne ekene; thaa abɔ, bi raan ebɛn tɔ ne rɛŋ yic rorde piŋ,

²⁹ ku biki bei; ran e ye kepiath loi abi bɛn ne jon de rɔt de piiric, ku ran e ye kerac loi abi bɛn ne jon de rɔt de lukwei.

³⁰ An ne guɔpdie acin ke lɛu ne luɔi: ke ya piŋ, yeneka ya luk: ku luŋdie ee lajik; ne ke cen e ke de apiɔu yene ya kɔɔr, ee ya ke de piɔnde yen man ci a tuɔc.

³¹ Na ya duleŋ de rɔt, ke lekdie acie yic.

³² Duleŋ lek ne ɣɛn ee dɛ, ku kanyiɛc lekden yen lek ne ɣɛn ee yic.

³³ We ci tooc enɔŋ Jɔn, ku kee duleŋ de yith.

³⁴ Ku lek ca lom acie ke de raan: an ye keekake luel, bi we ben luɔk.

³⁵ Yenekee ye ɣɛɛr ye dep ku meer: ku we we ci piɔth naŋ bak piɔth lɔyum ne ɣɛɛrde ɣɔn tɔ we wene yen.

³⁶ Ku lek tɔ ke ɣa adit ne lek de Jɔn: luɔi ci Awa yiɛn a ba thol, ee luɔi ya loi, yenekee duleŋ de ɣɛn, ye Awa ci ɣa tuɔc.

³⁷ Ku Awa man ci a tuɔc ee duleŋ de ɣɛn. Ee kɛnka kan piŋ ror, ku kɛnka ŋem guɔp.

³⁸ Ku kacin wɛtden ceŋ ne weyic: yen man ci tuɔc akɛnka gam.

³⁹ We ye kacigɔɔr caar, calka wɔ bak naŋ piir athɛɛr ne keyic: ku keeka ye duleek ke ɣɛn;

⁴⁰ ku we ce bɔ enɔŋ ɣɛn bak naŋ piir.

⁴¹ An cie naŋ rieu enɔŋ kɔc.

⁴² We yake nyic, kacin nhiɛr de Nhialic ne weyic.

⁴³ An ee bɔ ne rin ke Awa, ku we ken ɣa gam: na bɔ dɛ ne rinke ne rɔt, e kabak gam.

⁴⁴ Bak leu ne gam wuɔde, ke we ye roth riɛu ŋɛk ke ŋɛk, ku cakka kor ne rieu ye bɛn enɔŋ Nhialic yetok?

⁴⁵ Duɔka tak wuɔ ba we guɛl Awa; tok atɔ toŋ ye we guɛɛl, Mothe, man ye we roth gɛi.

⁴⁶ Na cak Mothe gam, e kee te cak ɣa gam: ee gɔɔr ne ɣɛn.

⁴⁷ Ku na cak garde ye gam, ke we bi welcie ya gam wuɔde?