Welpiath ci Jɔn cithiei ke gɔɔr 20 - Lek Jot de Jecu Kritho 1940

¹ Ku akol tueŋ de wik go Mari Magdalene riɛr ɣɔn miak aŋoot piny ke col, te de raŋ, go kuur ŋem ne ci nyaai ne raŋ thok.

² Go kat, ku bii enɔŋ Thimon Petero ku ran dɛ pioce, nhiɛr Yecu, ku yook keek, Ye kaaci Bɛnydit nyaai rɛɛŋ, ku kakuc wɔ te cik ke ye kan thin.

³ Go Petero lɔ kene ran dɛ pioce, biki te de raŋ.

⁴ Aake riŋ netok: go ran dɛ pioce Petero wuɔr, kɔn bɛn te de raŋ;

⁵ bii ku guŋ, ku luiitic; go alɛth linon ŋem e ke tai; ku cii lɔ thin.

⁶ Go Thimon Petero bɛn, ke kuɛny cok, bii ku leer rɛɛŋ; ke ŋem alɛth linon ne tai,

⁷ ku ci alanh e ci duɔt ne yenom cii tai kene alɛth linon, ci dol tede yetok.

⁸ Go ran dɛ pioce go lɔ thin eya, man e kɔn bɛn te de raŋ, go ŋem, go jal gam.

⁹ Aake ŋoot e ke kuc kecigɔɔr, ya kabi rɔt bɛr jɔt ne thouic.

¹⁰ Go kɔcpiocke bɛɛr jal leki panden.

¹¹ Ku kaac Mari ne raŋ thok ke dhiau: na ye dhiɛu ku ye guŋ, ye luiit raŋic,

¹² ke ŋem malaikai ceŋ alath ɣer keerou ne rɛɛr, tok ne yenom ku kene ne yecok, te cene guɔp de Yecu kan thin.

¹³ Goki thiec, Yi tiŋe, yeŋo dhiɛue? Go ke yɔɔk, Ye kaaci Bɛnydiitdie nyaai, ku kakuɔc ɣan te cik ke ye tau thin.

¹⁴ Na ci jam yeya, ku ye wel rɔt, ke ŋem Yecu ne kaac, ku kuc lan yen Yecu.

¹⁵ Go Yecu thiec, Ye tiŋe, yeŋo dhiɛue? Ku yeŋa kɔɔr? Go cɔɔl ye ye duŋem de genen, a go yɔɔk, Ye Bɛny, na ca ye nyaai etene, ke lɛkne ɣa te cin en kan thin, ku kaba lar.

¹⁶ Go Yecu yɔɔk, Ye Mari. Go rɔt wel, ku yook, Ye Raboni; luɛlde kee, Dupioc.

¹⁷ Go Yecu yɔɔk, Ye duk ɣa jak; an ken guɔ lɔ nhial enɔŋ Awa: yen lɔɔr enɔŋ mɛɛthcie, ku yɔɔke keek, Wu ya ɣan lɔ nhial enɔŋ Awa ku ye Wuɔrduɔn; ku nenɔŋ Nhialinydie ku ye Nhialinyduɔn.

¹⁸ Go Mari Magdalene lɔ ku lek kɔcpiocke, Ye ɣan ci Bɛnydit ŋem, ku kee keekake luel kene ɣɛn.

¹⁹ Na ɣɔn thei, ne ekole, kol tueŋ de wik, ku te cene thok thiɛk te tɔ kɔcpiocke thin ne riɔc riɔc kek ne Judai, ke Yecu bɔ ku kɛɛc ne keciɛl yic, ku yook ke, Ye keeyabi dɔɔr tɔ ke we.

²⁰ Na ci yekene luel, e ke nyuthke yecin ku yelɔɔm. Go kɔcpiocke piɔth miɛt te cik kek Bɛnydit ŋem.

²¹ Go Yecu ke bɛɛr yɔɔk, Ye keeyabi dɔɔr tɔ ke we; ci man ci Awa ɣa tuɔc, yenekee caŋ tuɔc an week.

²² Na ci yekene luel, go weei ne kenhiim, ku yook ke, Ye lɔmka Jɔŋdiit Lajik:

²³ raan ebɛn ye we karɛcke puɔl, ke kaye puɔl; raan ebɛn ye we karɛcke jai, ke kaye jai.

²⁴ Ku Thoma, ran toŋ de thiɛrkurou, cɔl Acuek, ee ce tɔ ne keyic ɣɔn biine Yecu.

²⁵ Go kɔc kɔk piocke goki yɔɔk, Yi wɔ ci Bɛnydit ŋem. Go ke yɔɔk, Ye te can ɣɔr de theet ber ŋem ne yecin, ku ba aciin cuɔk ne ɣɔr de theetic, ku cuɔk aciin ne yelɔɔm, e kacaa gam.

²⁶ Na ci nin bɛr ya bɛt, ke kɔcpiocke tɔ ɣot, ku tɔ Thoma ke ke. Go Yecu bɛn, ku ci thook thiɛk, ku kɛɛc ne keciɛl yic, ku jiɛm, Ye keeyabi dɔɔr tɔ ke we.

²⁷ Ku yook Thoma, Ye thiu yiciin, ku ŋem acin; ku thiu yiciin, ku cuɔke ne ɣalɔɔm: ku duk beer ya riɛr, ye gam.

²⁸ Go Thoma dhuk yook, Ye Bɛnydiitdie ku ye Nhialinydie.

²⁹ Go Yecu yɔɔk, Ye Thoma, ee ŋem cin ɣa ŋem, yenekee gɛm yin ɣa: kɔc ye gam, ke cik ye ŋem, keeka ye thiei.

³⁰ Cit juec kɔk kaacii Yecu ke loi ne kɔcpiocke nhiim, ka keneke gaar ne ekitamneic:

³¹ ku keekake aacike gɔɔr, bak ya gam wuɔ Yecu kee Kritho, Wen de Nhialic; ku bak ya naŋ piir ne rinke ne gamduɔn.