Welpiath ci Jɔn cithiei ke gɔɔr 2 - Lek Jot de Jecu Kritho 1940

¹ Ɣɔn ne kol de diak ke thiek ee tɔ ne Kana de Galili; ku man e Yecu ee tɔ thin:

² ku Yecu, kene kɔcpiocke eya, aa cɔɔl te de thiek.

³ Na ci piukeabiɛi dak, go Yecu yɔɔk ne man, Ye kacin piukeabiɛi.

⁴ Go Yecu yɔɔk, Ye Tiŋe, ba ŋo ya loi wɔ yi? thadie aŋot ke ken bɛn.

⁵ Go man awuut yɔɔk, Ye ke ci ya lɛk we yaka loi.

⁶ Ku tɔ tony ke piu keedhetem ke kur etɛɛn, bi kɔc ke ya waak ci man de luɔi de Judai, kaaye tony ke riɛm keerou ku keediak.

⁷ Go Yecu ke yɔɔk, Ye thiaŋka tony ke piu nhim ne piu. Goki ke thiɔŋ nhiim.

⁸ Go ke yɔɔk, Ye gameke bei emane, ku lareke enɔŋ bɛny de miɛth. Goki ke lar.

⁹ Ku na ye bɛny de miɛth ye thiep piu, piu cike waar e ke ye piukeabiɛi, ku kuc te bii kek (ku nyic awuut eke gem piu); go bɛny de miɛth ran de thiek cɔɔl,

¹⁰ ku yook, Ye raan ebɛn ee piukeabiɛi piath kan yiɛn kɔc ne acirnom; ku na ci kɔc duɔr kuɛth, ke jal piukeabiɛi piath emath bɛi: ku yin ci piukeabiɛi piath pen agut ci emane.

¹¹ Ekene eke gɔle Yecu kagɛiyeke ne luɔi ne Kana de Galili, ku nyooth nuɔmde; go kɔcpiocke jal gam.

¹² Ɣɔn ne ekene cok ke lɔ Kapernaum kene man ku mithakacke, ku kɔcpiocke: ku cii ceŋ thin ne nin juec.

¹³ Ku te ci ret de Judai thiɔk, ke Yecu lɔ Jeruthalem.

¹⁴ Ku yok kɔc ke ɣɔɔc de mioor ku thok ku kurei ne yekalu, ku kɔc ke wɛr e weu e ci nyuc thin eya:

¹⁵ ku na ci tiar de yuinthi loi, e ke ciec ke wei kedhia ne yekalu, ku thok kene mior; ku wɛl weu wei weu eke warke, ku puk agen nhiim piny;

¹⁶ ku yook kɔc eke ɣɔɔc kurei, Ye nyaike keekake etene; ku duɔka ɣon de Awa ye cɔk ye ɣon de ɣɔc.

¹⁷ Go kɔcpiocke kenhiim ciɛt ne ke ci gɔɔr, Ye dit de piɔu de ɣondu abi a ya cam.

¹⁸ Go Judai gam, ku thiecki, Ya ye ciɛn ŋo nyuuth yin wɔ, ne loi yin keekake?

¹⁹ Go Yecu ke gam, ku yook ke, Ye riakka yeluaŋ de Nhialicne, ku kaba bɛr cɔk kaac ne nin keediak.

²⁰ Go Judai thiec, Ya run keethiɛrŋuan ku dhetem eke loike yeluaŋe, ku ba bɛr cɔk kaac ne nin keediak?

²¹ Ku kee jam ne luaŋ de guɔpde.

²² Na ɣɔn ye jɔt rɔt ne thouic, go kɔcpiocke ke e ci lɛk ke tak; ku yiki kacigɔɔr gam, ku wel eke ye Yecu ke luel.

²³ Ɣɔn tɔ en ne Jeruthalem te de ret ne kol de miɛth, go kɔc juec gam ne rinke, te cik kek kagɛiyeke ŋem e ke ci loi.

²⁴ Go Yecu rɔt cuɔk thɛny ke, ne nyiny nyic en kɔc kedhia,

²⁵ ku cii kor ne ran bi ye lɛk piɔn de ran dɛ; ne nyiny nyic en raan piɔu.