Welpiath ci Jɔn cithiei ke gɔɔr 13 - Lek Jot de Jecu Kritho 1940

¹ Na ŋoot miɛth de ret ke ken guɔ loi, ke Yecu nyic kolden de jal ne piny nom ne ci bɛn, ku kɔckeek tɔ ne piny nom nhiɛr keek aaci nhiar agut thok bi kaŋ thok.

² Ku ciɛmki ne miɛth thɛi, ke durieth ci kan lɔ ne Judath Yithkariɔt piɔu, wen de Thimon, bi cɔk nyiin Yecu.

³ Ku nyic Yecu ke cii Nhialic kaŋ kedhia tau ne yeciin, ku nyic ke ne bɔ bei nenɔŋ Nhialic, ku bi bɛɛr dhuk enɔŋ Nhialic,

⁴ go rɔt jɔt te de miɛth, ku tɛɛu alɛthke tɛɛn, ku loom alanh de cunh de guɔp, ku ruk e ethar.

⁵ Ku wɛl piu ne thaanic, ku gɔl wɛk de kɔc cok kɔcpiocke, ku coth kecok ne alanh enhia ci ruɔk ne yethar.

⁶ Ana ye ɣeet enɔŋ Thimon Petero, ke yooke Petero, Ye Bɛnydit, ba ɣa waak cok?

⁷ Go Yecu dhuk yook, Ye yeke luɔiye emane akuc; aba nyic ne kol dɛ.

⁸ Go Petero jam, Ye yin ce ɣa wak cok necok. Go Yecu bɛɛr dhuk, Ye na caa yi wak, ke yin ce mɛt we ɣa.

⁹ Go Thimon Petero jam, Ye Bɛnydit, yin ce ɣa wak cok kepɛc, wak keek kene acin ku anom eya.

¹⁰ Go Yecu jam, Ye ran waak awaak cok kepɛc ku leer ke ɣer ebɛn: week we ɣer, ku kacie we wedhia.

¹¹ Anyic ran bi ye nyiɛn; yenekee jiɛm en, Ye kacie we wedhia.

¹² Na ci ke waak cok, ke lom alɛthke, ku lee nyuc, ku thiec keek, Ye nyiɛcka ke ca luɔi we?

¹³ We ye an cɔɔl, Wuɔ Dupioc, ku, Bɛnydit: we ye jam apiath; ɣan yinya.

¹⁴ Na waak wecok, ke an ye Bɛnydit ku ya Dupioc, ke we bi wecok ya waak ne roth eya.

¹⁵ We ca yiɛn ke bak ya kaar, bak bɛɛr ya loi ci man can e luɔi we.

¹⁶ We ya yɔɔk neyic, Ya aluak ace dit ne bɛnyde; ku dutuc ace dit ne ran toc e.

¹⁷ Na nyiɛcka kaake, ke we yeke thiei te ye we ke loi.

¹⁸ Ku an ce jam ne week wedhia: kɔc cake lɔc anyiɛcke: ku kecigɔɔr abi loi, Ya ran cam miɛthdie ee teer ke yɛn.

¹⁹ Emane we ba ya lɛk ke ŋoot ke ken guɔ loi, bak a gam wuɔ kee ye, te cen loi.

²⁰ We ya yɔɔk neyic, Ya ran ye ran ya tooc loor ee ɣa loor; ku ran ye ɣa loor ee yen man ci ɣa tuɔc loor.

²¹ Na ci Yecu jam yela, ke dhiau piɔu, ku lek keek jiɛm, Ye we ya yɔɔk neyic, ya ran toŋ de week abi ɣa nyiɛn.

²² Go kɔcpiocke roth liec, gɛiki ne ran yee luel.

²³ Ku tɔɔ ne agen thok ci toŋ de kɔcpiocke rɔt gɛi ne Yecu yɔu, yen man nhiɛr Yecu.

²⁴ Go nieu ne Thimon Petero, ku yook, Ye lɛk wɔ yeran ye luele.

²⁵ Go yekɔu taar ne Yecu yɔu ne tɔden e tɔ yen, ku thiec, Ye Bɛnydit, yeŋa?

²⁶ Go Yecu dhuk, Ye ran ban cuin juɔl ku yiɛn e, yenekee ye. Ana ci cuin juɔl, ke leer ku yin Judath de Thimon Yithkariɔt.

²⁷ Na wen ci cuin liek, ke Catan lɔ ne yeyic. Go Yecu yɔɔk, Ye ke ba loi, dɔc loi.

²⁸ Ku kacin ran de kɔc tɔ ne agen thok nyic ke e luel yekene.

²⁹ Go kɔk thɔɔŋ yi ye ke tɔ Judath ke boon, yene yooke Yecu ye, Ye ɣɔc ka kɔrukue ne miɛth; ka, kabi miɔc aŋaaŋ gup.

³⁰ Wen ci cuin loom, ke dɔc lɔ biyic elantoŋtɛi, ku kee ye wɛɛr.

³¹ Te cen lɔ biyic, go Yecu jam, Ye Wen de raan ee jal noom emane, ku Nhialic ee noom ne yen:

³² Na ye Nhialic ye nom ne yen, ke kabii Nhialic noom ne guɔpde, ku kabi noom nelantoŋtɛi.

³³ Miththiicie, ɣan ye yul wɔ week. We bi a kɔɔr: acit man can e lɛk Judai, Ya te lar an, acii we bɛn bi leu; yen emane abɛɛr lɛk week.

³⁴ Loŋ jot ayiɛn we, ya yaka roth nhiar; acit man can we ya nhiar, ke week eya yaka roth nhiar.

³⁵ Yeneka bii raan ebɛn ye ya nyic lan ye we kɔcciek piɔcke, te ye we roth nhiar.

³⁶ Go Thimon Petero yɔɔk, Ye Bɛnydit, ye te yinde leer yin? Go Yecu dhuk, Ye te lar ɣɛn, acin ɣa leu ne kueny cok emane; yin bi a kuany cok ne kol dɛ.

³⁷ Go Petero yɔɔk, Ye Bɛnydit, yeŋo can yi leu ne kueny cok emane? An bi rɔt cɔk nak ne kedu.

³⁸ Go Yecu dhuk, Ye ba rɔt cɔk nak ne kedie? Yin ya yɔɔk neyic, Ya ajith aci bi ciu, ke yin ken ɣa jai naadiak.