Welpiath ci Jɔn cithiei ke gɔɔr 11 - Lek Jot de Jecu Kritho 1940

¹ Ku ran ee bec, ran cɔl Ladharo de Bethani, pan de Mari ku nyankene Martha.

² Yen Mari man e tɔc Bɛnydit ne miok, ku weec cok ne nhimke, yenekee bece wanmeethe Ladharo.

³ Go nyirakɛcke tooc enɔŋ yen, jamki, Yi Bɛnydit, yen man ye nhiare abec.

⁴ Go Yecu piŋ, ku jiɛm, Ye yebenye acie beny de thou, ee beny de nuɔm de Nhialic, bi Wen de Nhialic noom ne yen.

⁵ Yecu ee nhiar Martha, ku nyankene, ku Ladharo.

⁶ Na ci ye piŋ ke bec, go dhiac ne nin keerou te ceŋ en.

⁷ Ne ekene cok go kɔcpiocke yɔɔk, Ye berku lɔ Judaya.

⁸ Go kɔcpiocke yɔɔk, Yi Rabi, aake piɔc yi kɔɔr bik yi biok ne kur; yen ba bɛɛr lɔ eeti?

⁹ Go Yecu dhuk, Ye ci thaa ye ya thiɛr ku rou ne akɔlic? Na ye raan ye cath ne akɔlic, e kacie kɔth, ne ŋem yen ɣɛɛr de epinye nom ŋem.

¹⁰ Na ye raan ye cath wakɔu, e kee kɔth, ne ke ci ɣɛɛr ye tɔ ne eyic.

¹¹ Ee jam yela, ku ber ke yɔɔk, Ye mɛtheda Ladharo ee niin; yen an lɔ, ba lɔ puɔc te de nin.

¹² Go kɔcpiocke yɔɔk, Yi Bɛnydit, na ye nin, e kabi piath.

¹³ Yecu ee jam ne thonde: ku cɔlki yi jiɛm ne loŋ de nin.

¹⁴ Go Yecu jal lɛk ke nejik, Ye Ladharo ee thou.

¹⁵ Ku an mit piɔu ne week ne liu e liɛu an eeti, bak ya gam; apiath abac, loku enɔŋ yen.

¹⁶ Go Thoma, ye cɔl Acuek, kɔcpiocke yɔɔk, Ye loku eya, buk lɔ thou wɔne yen.

¹⁷ Go Yecu lɔ, ku yok ne ci tau ne raŋic a ci akol thol keeŋuan.

¹⁸ Bethani athiak ke Jeruthalem cit mail keerou;

¹⁹ ku Judai juec aa lɔ enɔŋ Martha ku Mari, bik ke lɔ duut piɔth ne thon de manheden.

²⁰ Go yen Martha piŋ ke Yecu bɔ, go dai lɔ, ku loor; ku dhiac Mari ke rɛɛr ɣot.

²¹ Go Martha Yecu yɔɔk, Ye Bɛnydit, ne yin tɔ etene, e kee te ken wanmaath thou.

²² Ku kanyiɛc emane eya, ke ye thiec enɔŋ Nhialic, aye Nhialic yiɛn yi.

²³ Go Yecu yɔɔk, Ye wanmuuth abi rɔt bɛr jɔt.

²⁴ Go Martha yɔɔk, Ye kanyiɛc kabi rɔt bɛr jɔt ne kol ciɛn ne jon bi tip roth jɔt.

²⁵ Go Yecu yɔɔk, Ye ɣan ye jon de rɔt, ku ya piir: ran ye ɣa gam, ku ne ci cak thou, e kabi piir:

²⁶ ku raan ebɛn ran ye piir ne ɣɛn ku ye a gam, ace kɔn thou. Ye yekene gam?

²⁷ Go yɔɔk, Ye Bɛnydit, kaya gam ke yin ye Kritho, Wen de Nhialic, man ye bɛn ne piny nom.

²⁸ Ku na ci ekene luel, ke lɔ, ku cɔɔl Mari nyankene ke luɔŋ, jiɛm, Ye Dupioc ee bɛn, ku kacɔl yin.

²⁹ Go piŋ, ku dɔɔc rɔt jɔt, ku leer enɔŋ yen.

³⁰ (Yecu ee ŋoot ke ken guɔ ɣeet bei, ee dhiac ke tɔ te e rɔm kek ke Martha.)

³¹ Go Judai, eke tɔ kene yen ɣot, dut epiɔu, na cik Mari ŋem ke pur rɔt ku leer biyic, goki kuany cok, cɔlki yi le dhiau ne raŋ nom.

³² Na ci Mari ɣet te tɔ Yecu, ku ŋem, go piny ciim ne yecok, ku yook, Ye Bɛnydit, ne yin tɔ eene, e kee te ken wanmaath thou.

³³ Na ci Yecu ye ŋem ke dhiau, ku dhiau Judai eke bɔ kene yen eya, go keŋ ne yepiɔu, ku wupic,

³⁴ ku jiɛm, Ye cak kan teno? Goki yɔɔk, Yi Bɛnydit, bar ŋem.

³⁵ Go Yecu dhiau.

³⁶ Go Judai jam, Yi ŋɛmka nhiɛr cen e nhiar!

³⁷ Go kɔk ke keek jam, Yi ci yerane, man e cɔk cɔɔr yiɛn, cii yerane bi cuɔk cɔk thou eya?

³⁸ Na ci Yecu lɔ raŋ nom ke beer keŋ. Ee ye te ɣɔɔr de kuuric, ku ci thiɛk thok ne kuur.

³⁹ Go Yecu jam, Ye lɛɛrka kuur wei. Go Martha, nyankene yen man ci thou, go yɔɔk, Ye Bɛnydit, ee nhiany ekole: ee nin a ŋuan piiny.

⁴⁰ Go Yecu yɔɔk, Ye ne kɛn lɛk yin ya na gam ɣa, ke yin bi nuɔm de Nhialic ŋem?

⁴¹ Goki kuur lɛɛr wei. Ku jɔt Yecu enyin nhial, ku jiɛm, Ye Awa, yin lɛɛc ne piŋ piŋ yin ɣa.

⁴² Ku kanyiɛc yin ye ɣa piŋ akolriɛc: ee ke de keekɔc kaac eeneke yeneka cɔk ɣa jam, bik gam ke yin ci a tuɔc.

⁴³ Na ci jam yela, ke cot areet, Ye Ladharo, bar bei.

⁴⁴ Go ye yen man ci thou bɛn bei, ke ci duut cin ku yecok ne alɛth ke thiɛk, ku ci deer nyin ne alath. Go Yecu ke yɔɔk, Ye dakka, ku ne lɔ.

⁴⁵ Go Judai juec ci bɛn enɔŋ Mari, ku cik kaŋ ŋem ka cii Yecu ke loi, goki gam.

⁴⁶ Ku kɔc kɔk ke keek aa lɔ enɔŋ Parithai, ku leki ke ka cii Yecu ke loi.

⁴⁷ Go bany ke ka Nhialic ku Parithai goki kɔc cɔk gueer, ku jamki, Yi buk ŋo loi? yerane ee kajuec gɛiyeke loi.

⁴⁸ Na yeku ye puɔl wuuya, e kabii raan ebɛn gam: ku Romai aabi bɛn ku lomki pinyda kene ceŋda.

⁴⁹ Go ran toŋ de keek cɔl Kaiapath, ye bɛnydiit de ka ke Nhialic ne yerune, go ke yɔɔk, Ye kacin ke nyiɛcka,

⁵⁰ ku kacak ye muk ne wenhim ke ye kepiath enɔŋ week bi ran tok thou ne nyin de kɔcic, ku ci jur ebɛn bi maar a bi liu.

⁵¹ Ejame acie jam de guɔpde: yenekee ye bɛnydiit de ka ke Nhialic e erune, ku ke jam ye Yecu abi thou ne nyin de jurdenic;

⁵² ku kacie yejure yetok, aabi mat nhiim etok kek mith ke Nhialic ci thiai.

⁵³ Ku yekole acik kek roth ben ya jaam bik cɔk thou.

⁵⁴ Go Yecu ciɛk beer cath ne Judai yic ke dɛɛiye, ku leer eeti piny tɔ rok thok, ɣeet pan col Epuraim; ku le ceŋ thin ke kɔcpiocke.

⁵⁵ Ret de Judai ee ci thiok: go kɔc juec lɔ Jeruthalem ne baaiyic ke ret ŋoot, bik roth lɔ juik.

⁵⁶ Goki Yecu kɔɔr, ku jamki ne roth e ke kaac ne yekalu, Yi takka ŋo? Cii bi bɛn te de miɛth?

⁵⁷ Ku ci banydit ke ka ke Nhialic ku Parithai cik loŋ luel yi na nyic raan te tɔ en, e kabi nyuɔth, bik lɔ dom.