Welpiath ci Jɔn cithiei ke gɔɔr 10 - Lek Jot de Jecu Kritho 1940

¹ We ya yɔɔk neyic, Ya ran cie lɔ ne rɔŋ de thokic ne rɔk thok ku yith thin ne dhol dɛ peei, e kee rueeny ku ye dupec.

² Ku ran ye lɔ thin ne rɔk thok, yenekee ya abiok de thok.

³ Ayee dutit liɛp thok; ku kayee thok piŋ ror: ku cɔɔl thokke ne rinken, ku ler ke biyic.

⁴ Na ci thokke kedhia lar biyic, e kaayeke ŋɔɔr, ku ye thok kuany cok: ayeki nyic ror.

⁵ Ku kaaci alei ye kuany cok, aaye kat ne yen: aaye ror de alei kuc.

⁶ Yeparabole acii Yecu lɛk ke: goki ka ci lɛk ke cuɔk muk.

⁷ Go Yecu ke bɛɛr yɔɔk, Ye we ya yɔɔk neyic, Ya ɣan ye thoŋ de thok.

⁸ Ke kedhia ci ŋɔɔr anom aaye rueny ku yeke dupeec: ku kaacii thok ke ye piŋ.

⁹ Ɣan ye thok: na ye raan ye lɔ thin ne ɣɛn, e kabi luɔk, ku kabi ya lɔ thin, ku bii bei, ku kabi te de nyuath ya yok.

¹⁰ Rueeny ee bɛn, bi ya kual ku bi ya nak, ku bi ya riɔɔk: ɣan ee bɔ bik naŋ piir, ku bik ya kuɛth ne yen.

¹¹ Ɣan ye abiok piath: ku abiok piath ee weike gam ne thok.

¹² Ku ran e kueiye, ku cie abiok, ku cie thokke, na yee baŋbar ŋem ke bɔ, e kee thok nyaaŋ wei ku kɛt: e kaadɔm baŋbar ke, ku ye ke thiai wei:

¹³ ne ke yen ran e kueiye, ku cii thok ye ŋem apiath.

¹⁴ Ɣan ye abiɔk piath, ku an ye kacie nyic, ku kacie aanyic ɣa,

¹⁵ ci man ye Awa ɣa nyic, ku an nyic Awa: ku an ye weicie gam ne thok.

¹⁶ Ku an nɔŋ thok kɔk, cie thok ke erɔŋe: aabake dhiɛl bei eya, ku kaabi a ya piŋ ror; ku kaabi ya bioŋ tok, ku abiok tok.

¹⁷ Yeneka ye Awa ɣa nhiar, ne ke can weicie gam, ba ke bɛr loom.

¹⁸ Acin ran ye ke loom enɔŋ an, aaya gam ne guɔpdie. An nɔŋ riɛr ban ye gam, ku an nɔŋ riɛr ban en bɛr loom. Yeloŋe ee kap enɔŋ Awa.

¹⁹ Go Judai bɛɛr teer ne keewelke.

²⁰ Ku jam kɔc kɔk, Ya kanɔŋ jɔŋ rac, ku kee miɔl; yeŋo yaka piɛŋ en?

²¹ Ke luel kɔk, Yi keewelke aacie wel ke ran nɔŋ jɔŋ rac. Leu jɔŋ rac cɔɔr a bi yin?

²² Ku miɛth dit de gɛm ee tɔ ne Jeruthalem ɣɔn muɔi;

²³ go Yecu cath ne yekaluic ger de Tholomon.

²⁴ Go Judai gueer enɔŋ en, ku yookki, Yi ba wɔ cɔk gɛi naa? Na yee Kritho, ke lɛke wɔ ejik.

²⁵ Go Yecu dhuɔk ke, Ye kaca lɛk we, ku cak gam: ka yaake loi ne rin ke Awa keeka ye duleek ke ɣɛn.

²⁶ Ku cak gam, ne ke cii we ye thokcie.

²⁷ Thokcie aaye ɣa piŋ ror, ku kaayake nyic, ku kaaye ɣa kuany cok:

²⁸ ku kaayake yiɛn piir athɛɛr; ku kaaci bi kan maar a bik liu, ku kacin ran bi ke wuɔth bei ne acin.

²⁹ Awa, man e yin ke ɣɛn, adit ne kɔc kedhia; ku kacin ran leu ke ne wuth bei ne Awa cin.

³⁰ Wɔ ye tok wɔne Awa.

³¹ Go Judai kur bɛɛr kuany, bik kek ke ye biok.

³² Go Yecu dhuɔk ke, Ye luɔi piɛth kuɔtic aca nyuɔth we ne Awa; ye luɔi no de keeluɔike bii we ɣa biok?

³³ Go Judai dhuɔk e, Yi yin cuk biok ne luɔi piath; ee lɛɛt lɛɛt yin Nhialic; ku ne ke yin ran ye rɔt cɔk ye Nhialic.

³⁴ Go Yecu dhuɔk ke, Ye kene gɔɔr ne loŋduɔnic, Yi kaca luel, Ya we ye nhielic?

³⁵ Na ci ke cɔɔl nhielic, kek kɔc ci wɛt de Nhialic ke bɛnke (ku kacigɔɔr acie leu ne duɔny),

³⁶ ke we jam ne yen, yen man cii Wun thiei, ku tuuc ne piny nom, Wuɔ yin lat Nhialic; ne ke yan jam, Ya ɣan ye Wen de Nhialic?

³⁷ Na caa luɔi de Awa ye loi, ke we duɔke an ye gam.

³⁸ Ku na ya lui, ku cak ɣa cak gam, ke we yaka luɔi gam: bak ya nyic, ku bak ya gam, lan ye Awa tɔ ne ayic, ku ɣɛn ne yeyic.

³⁹ Goki bɛɛr kɔɔr bik dɔm: go rɔt kual ne kecin.

⁴⁰ Ku ber lɔ ne Jordan lɔŋti, te yee Jɔn kɔc kan baptith thin; ku ye ceŋ thin.

⁴¹ Go kɔc juec ya bɛn enɔŋ yen; ku yeki jam, Yi kacin kegɛiye e cii Jɔn loi: ku wel kedhia eke ci Jɔn ke luel ne yerane aya yith.

⁴² Go kɔc juec ya gam eeti.