Welpiath ci Jɔn cithiei ke gɔɔr 1 - Lek Jot de Jecu Kritho 1940

¹ Ne gɔc gɔce kaŋ ke Wɛt ee tɔ, ku Wɛt ee tɔ ke Nhialic, ku Wɛt ee ye Nhialic.

² Yenekee tɔ kene Nhialic ne gɔc gɔce kaŋ.

³ Yenekee cak kaŋ kedhia: ku te cene yen, e ke te cin ke ci cak ne ka ci ke cak.

⁴ Piir e tɔ ne eyic; ku piir yeneka ye ɣɛɛr de ran.

⁵ Ku ɣɛɛr ee ya ruɛr tecol, ku kaci cuɔl ye piŋ.

⁶ Raan e tuɔc ne Nhialic, ran cɔl Jɔn.

⁷ Yenekee dulek, bi kɔc ya lɛk ɣɛɛr, bi kɔc kedhia bik ya gam ne yen.

⁸ Ku kacie yen e ye ɣɛre, ee bɔ bi kɔc bi ya lɛk ɣɛre.

⁹ Yeneke ɣɛɛr yic, ɣɛɛr ye raan mer ebɛn, ran ye bɛn ne piny nom.

¹⁰ Ee tɔ ne piny nom, ku yenekee cak piny, ku kakuc piny.

¹¹ Ee bɔ enɔŋ kɔcke, go kɔcke cuɔk lor.

¹² Kɔc kedhia ye yen loor, ayeke yiɛn riɛr bik ya wɛɛt ke Nhialic, kek kɔc ye rinke gam:

¹³ kɔc eke cike dhieth ne riɛm, ku ne piɔn de riiŋ, ku ne piɔn de raan, ake dhieth ne Nhialic.

¹⁴ Go Wɛt ya riŋ, ku ceŋ ne wɔyic (goku nuɔmde ŋem, nuɔm de Wantoŋ e bɔbei enɔŋ Wun), ci thiaŋ ne athiɛi ku yic.

¹⁵ Jɔn ee ye duleŋde, ku ye coot, jiɛm, Ye yekene, yenekee yan jam, Ya yen man bi a kuany cok ee ye tɔ tueŋ ne anom: yenekee tɔ ɣɔn ŋuɔt an wei.

¹⁶ Ke ci ye thiɔŋ acuk lom wɔdhia, ku athiɛi ne athiɛi.

¹⁷ Looŋ ake ci yiɛn Mothe, ku athiɛi ku yic kaa bɛn kene Yecu Kritho.

¹⁸ Acin ran ci Nhialic kan ŋem; Wantoŋden e bɔbei, tɔ ne Wun yɔu, yenekee nyuth e kɔc.

¹⁹ Lek de Jɔn eke, ɣɔn toce Judai ke Jeruthalem tit ku Lebii bik lɔ thiec, Ya yeŋa?

²⁰ Go lɔ gam, ku ci jai; gɛm, Ye an cie Kritho.

²¹ Goki thiec, Ya yeŋo? Ye Elija? Go jam, Ye an cie yen. Goki ya, Ye nebi? Go dhuk, Ye aa.

²² Goki thiec, Ya yeŋa? buk wel dhuɔk kɔc ke tuc wɔ. Ye rɔt cɔk yeŋa?

²³ Go jam, Ye an e ror de toŋ ye coot roor, Ye cakka dhol de Bɛnydit lacith, ci luɛl de nebi Yithaya.

²⁴ Ku keekɔcke aake tucike ne Parithai.

²⁵ Ku berki thiec yookki, Ya yeŋo yin kɔc baptith, ke yin cie Kritho, ku ci ye Elija, ku ci ye nebi?

²⁶ Go Jɔn ke gam jiɛm, Ye an ye kɔc baptith ne piu: ku tok akac ne weciɛl yic, toŋ kuɔcka;

²⁷ yeneka biɔth ɣa, ku an ce piath, a ɣan ce cou de war de ecok dak.

²⁸ Keekake kake loike ne Bethani ne Jordan lɔŋti, te ye Jɔn kɔc baptith.

²⁹ Ɣɔn ne miakne go Jɔn Yecu ŋem ne bɔ enɔŋ en, ku jiɛm, Ye ŋɛmka Nyɔŋ de Nhialic ye karɛc ke kɔc ke piny nom nyaai.

³⁰ Yekene, yenekee yan jam, Ya raan abɔ ne acok, ran man e ye tɔ tueŋ ne anom: yenekee tɔ ɣɔn ŋuɔt an wei.

³¹ Ku kee kuɔc; ku nyuth bene ye nyuɔth Yithrael yenekee cɔk ɣɛn bɔ ke an ye kɔc baptith ne piu.

³² Go Jɔn lɛk kɔc, jiɛm, Ye an ci Jɔndit ŋem ne bɔ piny Nhial ne cit guɔp kure; ku ye ceŋ ne enom.

³³ Ku kee kuɔc: ku yen man ci ɣa tuɔc ba kɔc bi ya baptith ne piu ee ci a yɔɔk, Ye ran bin Jɔŋdit ŋem ne nyuc ne enom ku ye ceŋ ne enom, yeneka bi kɔc ya baptith ne Jɔŋdiit Lajik.

³⁴ Guɔ ŋem, ku ya kɔc lɛk ya yekene kee Wen de Nhialic.

³⁵ Ku ber Jɔn kɔɔc ɣɔn miak kene kɔcpiocke keerou:

³⁶ ku ŋem Yecu ke cath, ku jiɛm, Ye ŋɛmka Nyɔŋ de Nhialic.

³⁷ Go kɔcpiocke keerou goki piŋ ke jam, goki Yecu kuany cok.

³⁸ Go Yecu rɔt wel, ku ŋem ke e ke kuany yecok, go ke thiec, Ye ŋo karka? Goki yɔɔk, Ya Rabi, (te luele yen e thoŋda, Ya Dupioc,) ye ceŋ teno?

³⁹ Go ke yɔɔk, Ye bak ŋɛmka. Goki lɔ ŋemki te yen ceŋ; ku tɔki kene yen ne ekole: ke ci ya thaa de thiɛr.

⁴⁰ Ran toŋ de kɔc keerou e piŋ Jɔn ke jam, ku kuɛny cok, ee ye Andereya, manhe de Thimon Petero.

⁴¹ Go manhe Thimon kan yok, ku yook, Ye wɔ ci Mathia yok (te luele yen e thoŋda, ke ye Kritho).

⁴² Ku bii enɔŋ Yecu. Go Yecu ŋem, ku jiɛm, Ye yin Thimon wen de Jɔn; yin bi cɔɔl Kepath (te luele yen e thoŋda, ke ye Petero).

⁴³ Ana ye kol dɛ ke Yecu nɔŋ piɔu lɔ Galili, go Pilip yok, ku yook, Ye ye ɣa kuany cok.

⁴⁴ Pilip ee ye ran de Bethaida, pan de Andereya ku Petero.

⁴⁵ Go Pilip Nathaniɛl yok, ku yook, Ye kacuk yok ye ran ci gɔɔr ne Mothe ne looŋ yic, ku nebii, ya Yecu de Nadhareth, wen de Jothep.

⁴⁶ Go Nathaniɛl jam, Ye leu kepiath bɛn bei ne Nadhareth? Go Pilip yɔɔk, Ye bar ŋem.

⁴⁷ Go Yecu Nathaniɛl ŋem ke bɔ enɔŋ en, ku jiɛm ne yen, Ye ŋɛmka ran de Yithrael, ran cin adhuɔm!

⁴⁸ Go Nathaniɛl jam, Ye ne yin nyic an teno? Go Yecu gam, ku yook, Ye ɣɔn ŋote Pilip ke ken yi cɔɔl, ɣɔn tɔ yin ne ŋap liel, yenekee ŋɛm an yin.

⁴⁹ Go Nathaniɛl gam, ku yook, Ye Rabi, yin ye Wen de Nhialic; ku yin ye Meleŋ de Yithrael.

⁵⁰ Go Yecu gam, ku yook, Ye gam jam can jam ya yin ee ca ŋem ne ŋap liel? yin bi kadit ŋem ne ekene.

⁵¹ Go yɔɔk, Ye yin ya yɔɔk neyic, Ya yin bi Nhial ŋem ne ci liepic, ku malaikai ke Nhialic ye lɔ nhial ku biki piny ne Wen de raan nom.