Jakob 4 - Lek Jot de Jecu Kritho 1940

¹ Ye teer bɛn teno ku ye tɔŋ bɛn teno ne kɛmkuɔn? Cik ye bɛn ne kɔrduɔn de guɔp ye ter ne gupkuɔn yic?

² Ayaka kɔɔr, ku kacak ye yok: we ye kɔc nɔk, ku yaka wak, ku kacak leu ne lɔm: we ye ɣeet ku yaka thɔɔr; ku cin ke yaka yok, ne ke ci we ye ŋal.

³ We ye ŋal, ku cakke lom, ne ke ye we ŋal arac, bak thiai wei ne kɔrduɔn de guɔp.

⁴ We ye abɛɛl, kuɔcka ke maath de ka ke piny nom ye ya teer enɔŋ Nhialic? Yen raan ebɛn ye piɔu naŋ maath kene ka ke piny nom ee rɔt cɔk nɔŋ ater kene Nhialic.

⁵ Ka calka wuɔ ci kecigɔɔr jam ne ciɛlic, Ye tiɛpdɛn ci cɔk rɛɛr ne wɔyic akor areet ne tiɛl?

⁶ Ee thiɛi juak. Yen aluel kecigɔɔr, Ye Nhialic ee kɔc dit piɔth peen, ku ye thiɛi yiɛn kɔc kor piɔth.

⁷ Yen yaka roth yiɛn Nhialic; ku yaka durieth rɛɛc, ku kabi ya kat ne week.

⁸ Yaka roth cuɔt Nhialic, ku kabi rɔt ya cuɔt week. Yaka wecin waak, we kɔc rac; ku yaka wepiɔth cɔk ɣer, we kɔc ye takic rou.

⁹ Kuanyka nyin ku wuɔika, dhiauka: ne dɔlduɔn wel rɔt ne wuɔi, ku yum de piɔu ne ye thiɛk de piɔu.

¹⁰ Yaka piɔth kuur ne Bɛnydit nyin, ku kabi we ya jat nhial.

¹¹ Ci ŋɛk ŋɛk ye jaam arac, we watmɛthcie. Ran ye manhe jaam arac, ka ye manhe luk, ee looŋ jaam arac, ku ye ke luk: na ye looŋ ye ke luk, ke yin cie melui de looŋ, yin e duluk.

¹² Ducon de looŋ ku ye duluk, ee tok erir, ee ye yen man leu luak ku nyiɛi; yen yeŋa yin man ye ran rɛɛr ke yin luk?

¹³ Piɛŋka, we kɔc ye jam, Wuɔ wɔ bi lɔ yepane ne yekole ka miak, ku buk run tok lɔ thol eeti, ku buk ya ɣooc ku juakku weukuɔ:

¹⁴ ku ke bi tuɔl miak akuɔcka. Ye piirduɔn ŋo? We ye kɔɔr, ye tuɔl emane, ku go liu.

¹⁵ Yen ee te yaka dhil jam, Wuɔ na tɔ ne Bɛnydit piɔu, ke wɔ bi ya piir, ku yuku kene loi, ku kene.

¹⁶ Emane we ye naŋ dheeŋ ye we wenhiim lɛc: yedheeŋ yinyane ee rɛɛc ebɛn.

¹⁷ Yen ran ye kepiath nyic, ku cii ye loi, yenekee naŋ kerac.