Epethioi 6 - Lek Jot de Jecu Kritho 1940

¹ We mith, yaka wel ke kɔckuɔn ke Bɛnydit loi: ne ke yen kepiath.

² Ye wuur ku moor riɛu (yenekee loŋ tueŋ tɔ ke wɛt),

³ abi ya kepiath enɔŋ yin, ku ye piir ne nin juec ne piny nom.

⁴ Ku we we wurken, duɔka mithkuɔn ye cuɔth piɔth ne tɔŋ; yaka ke dɔp ne wɛi ku wel ke Bɛnydit.

⁵ We awuut, yaka wel ke banykuɔn ke ka ke piny nom yakake loi, ne rieu ku ne leeth, ne piɔn toŋduɔn, ci man tɔ en ke Kritho;

⁶ kacie luɔi ye tic ne nyin, ci kɔc ye kɔc pal nhiim; yaka ciɛt awuut ke Kritho ye piɔn de Nhialic loi ne kepiɔth;

⁷ ye lui ne piɔn piath, ci luui de Bɛnydit, ku kacie luui de kɔc:

⁸ nyiɛcka yekene, ke ye ŋɛk loi ebɛn yenekee cɔɔk de ke bi bɛr ya loom enɔŋ Bɛnydit, lan yen luɛɛk ku lan yen laau.

⁹ Ku we bany, yaka luɔi ke wuɔya, ku duɔake ye yɔŋ: nyiɛcka yekene, Bɛny toŋduɔn wene keek atɔ nhial, ee ciɛn teek de yic enɔŋ en.

¹⁰ Wɛtdien ciɛn, watmathcie, ee bak ya riɛr ne Bɛnyditic ku ne riɛr de ceŋdeic.

¹¹ Piɔthka ka ke gel ye ceŋ ke Nhialic, bak kɔɔc ya leu te ye durieth we dhoom.

¹² Wɔ cie yuit wɔne guɔp ku riɛm, wɔ ye yuit wɔne meluuk ku meriir, ku medook ke yepiny coole nom, ku rɛm ke jak rac ye ter kene wɔ nhial.

¹³ Yen jatka ka ke gel ye ceŋ ke Nhialic, bak kɔɔc ya leu ne akol rac, ku te ci we ke tiam kedhia, ke we ye kɔɔc.

¹⁴ Yen yaka kɔɔc, ke we ci wethaar duut ne yic, ku taauka luŋ e yɔu de luɔi lajik,

¹⁵ ku piɔthka war ne wecok wɛr ke juɛr de welpiɛth ke dɔɔr;

¹⁶ lɔmka kon de gam, bi we yuɛth ke rɛɛc ya jɔc.

¹⁷ Ku lɔmka luŋ de nom de luak, ku them de Jɔŋdit, man ye wɛt de Nhialic:

¹⁸ yaka lɔŋ ne akolriɛc ne Jɔŋdit ne lɔŋ ebɛn ku ŋal. Ku yaka dhiac ke we ye ekene tiit, ku yaka lɔŋ ne kɔc cithiei kedhia,

¹⁹ ku ne ɣɛn, bi ɣa ya pal jam, liɛp athok, ba kacikum ke welpiath ya nyuɔth ne riɛr de nyin,

²⁰ yen man cene ɣa rek ne joth, ɣan dutunyde; ba ya jam ne riɛr de nyin, ci man ban jam ya dhiil.

²¹ Bak keriɛc ya leu ne nyic eya, ku tɔ yan tɔ, Tukiko, mɛthedien nhiar, ku ye awun nɔŋ adot ne Bɛnydit, abi we cɔk nyic kaŋ kedhia:

²² yen man ca tuɔc week ne yekene, bak tɔ ye wɔ tɔ bak nyic, ku kabi we duut piɔth.

²³ Eeyabi dɔɔr ya tɔ kene mɛɛthcie, ku nhiɛr kene adot, enɔŋ Nhialic Wun ku nenɔŋ Bɛnydit Yecu Kritho.

²⁴ Eeyabi athiɛi ya tɔ kene keek kedhia kek kɔc ye Bɛnydiitda Yecu Kritho nhiar ne yic. Amen.