Epethioi 2 - Lek Jot de Jecu Kritho 1940

¹ Ku kee we bɛr cɔk piir, ɣɔn ci we thou ne karɛckuɔn ke awaac,

² ka eke ye we ke cath thin ci caŋ de luɔi de yepinye nom, ne luɔi de bɛny de riɛr de aliir, de jɔŋ ye lui ne wɛɛt ke kɔc reec wel yic.

³ Kek keek man eke ye wɔ ke ceŋ ne keyic, ne kɔr de guɔp ku ke de nom, ku yuku ya mith ke ɣok ne cɔɔkda; ci raan te dɛ.

⁴ Ku Nhialic, ee naŋ kac de piɔu, ku nhiɛr diitde yen wɔ nhiar,

⁵ te ci wɔ cak thou ne kareckuɔ, ke piir wɔ wɔne Kritho (ee athiɛi, yeneka luak we),

⁶ ku jɔt wɔ wɔne yen, ku cɔk wɔ nyuc wɔne yen ne ɣan tɔ nhial ne Krithoic:

⁷ bi baany gokdiitden de athiɛide nyuɔɔth ne run bi bɛn ne kac kɔc en piɔu ne wɔɔk ne Krithoic:

⁸ ee athiɛi yenekee we luɔk ne gam; ku kacie we wepɛc: ee miɔc de Nhialic:

⁹ acie ke de luɔi, kɛlke raan bi rɔt leec.

¹⁰ Wɔ wɔ loike ne yen, cak wɔ ne Yecu Krithoic buk ya lui apiath, ne luɔi cii Nhialic juɛr wɔɔk ɣɔn bii wɔ ya cath thin.

¹¹ Yen yaka wenhiim ciɛɛt, wuɔ we we ye tɔ peei ɣɔn, we Juurkɔk ne gupkuɔn, we we ye cɔɔl Abor ne ka yeke cɔɔl Aŋualɛɛi, ne wegup ka yeke loi ne kɔc cin;

¹² we we ye tɔ peei ɣɔn te cin Kritho, yaka ya alɛi cie mat wene Yithrael, ku yaka abakook ce tɔ ne matic man de keeciluel, yaka ciɛn ŋɔth ku ciɛnka Nhialic ne piny nom.

¹³ Ku yemane ne Yecu Krithoic, week we kɔc ɣɔn mec we ci jal thiɔk ne riɛm de Kritho.

¹⁴ Ne ke yen dɔɔrda, yen man ci ke cɔk ye tok keerou, ee pany tɔ ne kɛmken thuɔr piny,

¹⁵ ku nyiɛɛi tɔŋ ne guɔpde, ye wel ke looŋ ne garic; bi ke cɔk ye ran toŋ jot keerou ne guɔpdeic, a jɔl dɔɔr to;

¹⁶ ku bi ke keerou mat ne guɔp tokic tenɔŋ Nhialic ne tiɛm ageer, yen tɔŋ nyaai:

¹⁷ ku kee bɛn bi we ben lɛk dɔɔr we kɔc e we mec, ku dɔɔr de kɔc thiɔk.

¹⁸ Wɔ ye ciith enoŋ Awada ne Jɔŋdiit tok ne yen.

¹⁹ Yen emane we ce ber ya abakook ku alɛi, we ye kɔc ke piny wene kɔc cithiei, ku yaka dhien de Nhialic;

²⁰ ku yaka ya ɣon ci buth de dutuuc ku nebii, ku ye Yecu Kritho kuur piɛth tɔ ne ŋeep;

²¹ man ye ɣoot kuɔt, ci loi e kee dik, cil e kee ye luaŋ lajik ne Bɛnyditic;

²² man cene we buth etok ke we ye te bi Nhialic ya ɣap thin ne Jɔŋdit.