Eberuu 5 - Lek Jot de Jecu Kritho 1940

¹ Baanydiit de ka ke Nhialic ebɛn aye lɔc bei ne kɔc yic, ku tɛɛue bi ka ke Nhialic ya loi ne rin ke kɔc, bi miɔc ku ka ke koc de rɛɛc bi ke ya gam:

² ku bi kɔc ye kaŋ kuc ya leu ne thiɛɛr ne kac de piɔu ku kɔc ke awac, ne ke yen niɔp eya ne yepiɔu;

³ ku yekene yeneka bi ya dhiil bi ka ke koc de rɛɛc ya gam ne guɔpde ci man de kɔc.

⁴ Acin ran ye naŋ yerieue ne guɔpde, ee ya ran ci cɔɔl ne Nhialic, ci man ɣɔn de Aron.

⁵ Yenekee cɔɔk de Kritho eya ee ken rɔt noom ne guɔpde bi rɔt cɔk ye bɛnydiit de ka ke Nhialic, ee yen yen man e ci jam ne yen, Ye yin ye Wendie, Yin ca cɔk bɔbei e ekole;

⁶ ci man e cen e luel eya te dɛ, Ye yin ye bɛny de ka ke Nhialic athɛɛr Ne ke de dhien de Melkidhedek.

⁷ Ɣɔn ne akol ɣɔn ye Yecu ke raan, ɣɔn lɔŋ en ke bi e leu ne luak ne thouic, ŋɛl ne wuɔi gok ku piau de nyin, go piŋ ne rieuden nhial,

⁸ ku ci pioc ne gam de wel ne ka cike guum, ke cak ya Wa;

⁹ ku te cene ye jal cɔk lajik, go jal ya megony de luak athɛɛr enɔŋ keek kedhia kek kɔc ye welke gam,

¹⁰ ku ciɛke ne Nhialic cɔk ye bɛnydiit de ka ke Nhialic ne ke de dhien de Melkidhedek.

¹¹ Anɔŋ kajuec buk luel ne yen, ku kaarir ne nyooth, ne ke cii we ye piŋ apiath.

¹² Na ne cak ya nyin ete ye we dupioc ne ke cii we ceŋ, ke we beer ran pioc we ŋaŋ, ne pioc de cok tueŋ ke wɛt de Nhialic; ku we ci ciɛt mith ye rueth ne ca, ku cak ye ka ke miith rir kɔth.

¹³ Raan ebɛn ran ye rueth ne ca ee ciɛn nyiny de wɛt de lajik; ee ya ya meth.

¹⁴ Miɛth rir kɔu ee ya ya ke de kɔcdit, agut keek eya kek kɔc ye lui bik piath ya nyic ku rɛɛc ne naŋ adotden.