Eberuu 11 - Lek Jot de Jecu Kritho 1940

¹ Gam yenekee nyiɛny yic de ka yeke ŋɔɔth, ku yenekee nyooth de ka keneke ŋem.

² Yekene yenekee leke roordit.

³ Gam eka ye wɔ piiny nyic ne eke cak ne wɛt de Nhialic, yen ke ye ŋem ee ce cak ne ka ye wɔ ke daai.

⁴ Ee gam yenekee gɛme Abel koc piath areet wɛr ke de Kain yin Nhialic, ke cene ye lɛk ya lee jik, ee Nhialic yenekee lek yen ne lɔm de miɔcde: a go yekene cɔk jam ke ci cak thou.

⁵ Ee gam yenekee ɣooce Enok kɛlke bi thou; a go cuɔk yok, ne ke cii Nhialic ye ɣooc: ɣɔn ŋoot en ke kene ɣooc, ke kee ye lɛk en ya ne lee Nhialic piɔu yuum:

⁶ acie leu ne yuɔm piɔu te cin gam: ran ye bɛn enɔŋ Nhialic abi ya dhiil ne gam lan yen tɔ, ku ye gam ke ye meriom de kɔc ye ye kɔɔr.

⁷ Ee gam, yenekee nyiine Noa ne Nhialic, ne ka keneke ŋem, a go thiɔŋ ne rieu de Nhialic ku juir riandiit ben kɔcke luɔk; ke ɣɔn luk en piny nom ne yen, ku jɔl ya dit de lajik ne ke de gam.

⁸ Ee gam, yenekee gɛm Abraɣam wel leer te ci lɛk en bi lɔ loom ne ye piɛny adooc, ɣɔn cɔɔle yen; go lɔ biyic, ku kuc te leer en.

⁹ Ee gam, yenekee yen abakok piny ci luel, ci ke rɛɛr piny lei, ye ceŋ ne akemai yic kene Yithak ku Jakob, kɔc ye adiit ke yekeciluele kene yen:

¹⁰ ee kɔɔr baai pan cene cok wɛc, pan ye Nhialic meyik ku ye duluɔi.

¹¹ Ee gam eya, yenekee loome Thara riɛr ben liac ne ke ye kuat ɣɔn cen cak dhiɔp, ne nyiny e nyic en en ke nɔŋ adot yen man e luel kede:

¹² a go tok jal ker, toŋ ci thou, ne juaac cit kuel nhial ne duut, ku citki liɛɛt ye tɔ ne bar yɔu, ci ke ye leu ne kuɛn.

¹³ Keekɔcke kedhia aa thou ne gamic, ke kek ken kaciluel guɔ loom, aake yiki ke ŋem temec ku yiki ke muɔɔth, ku yiki gam lan e ye kek alɛi ku abakeeny ne tiɔp nom.

¹⁴ Kɔc ye keekake luel ayiki nyuɔɔth e ke kɔr panden peei.

¹⁵ Ku na ne ke ci ya tak ne panden cik waan, e kee te cik dhuk thin leu.

¹⁶ Ku emane aaye pan ŋuan kɔɔr, pan nhial: yen Nhialic aci yic ye liɛr ne keek, bene ye ya cɔɔl Nhialinyden: ne ke cen keek juɛr baai.

¹⁷ Ee gam, yenekee gɛm Abraɣam Yithak, ɣɔn theme yen: ee yic, ran e ci kaciluel loom ne miɛt de piɔu ee gɛm wantoŋde;

¹⁸ wen e ci luel, Ya Yithak eka bene kuandu cɔɔl:

¹⁹ ee nyic ne bii Nhialic leu ne jot, agut ne thouic; te ɣɔn beer en ye loom eya ne parabol.

²⁰ Ee gam, yenekee thieie Yithak Jakob ku Ethau, agut ci ka bi bɛn.

²¹ Ee gam, yenekee thieie Jakob wɛɛt ke Jothep ŋɛk ku ŋɛk, ɣɔn thou en; ku lɛm, ke muk rɔt ne waai.

²² Ee gam, yenekee luele Jothep jal de mith ke Yithrael, ɣɔn cii thookde thiɔk; ku yin ke loŋ ne ke de yomke.

²³ Ee gam, yenekee thiɛne Mothe ne kɔcken, ɣɔn dhiethe yen, ne kee cik ke ye ŋem ke ye mɛnh piath; ku cik riɔc ne loŋ de melek.

²⁴ Ee gam, yenekee reece Mothe cɔt bene yen ya cɔɔl wen de nyan de Paro, ɣɔn cen dit;

²⁵ ku lɔc yɔŋ bene yen ya yɔŋ kene kɔc ke Nhialic, ne miɛt de piɔu de rɛɛc de akol kɔk;

²⁶ ku cɔk wɛi de ke de Kritho ye kepiɛth diit wɛr baany de Yijep: ee ye riop bene ye riɔp ɣoi.

²⁷ Ee gam, ekee wɛɛn en Yijep, ku cii ye riɔc ne ɣok de melek: ee ci gum, ne ŋem cen ke cie leu ne ŋem ŋem.

²⁸ Ee gam, yenekee yen ret loi, ku weer de riɛm, bi menɛŋ de wenkaai ke cuɔk ye jak.

²⁹ Ee gam, yenekee teem kek Bar Thith ci ka tek ne riɛric: ke ye kɔc ke Yijep yi themki e ke mouke.

³⁰ Ee gam, yenekee thur paany ke Jeriko piny, ɣɔn cik kek ye jal yuil ne nin keedherou.

³¹ Ee gam, yenekee kene Rakab tiɛŋ abal ken en thou kene areecwel, ne kee cen anem loor ne dɔɔr.

³² Ye keno ba bɛɛr luel? akɔl abi yic ciɛk te yɛn an jam ne ke de Gideɔn, ku de Barak, ku Thamthon, ku Jeptha; ku Dabid kene Thamuel, ku nebii:

³³ kɔc ci ceeŋdit riɔk ne gam, ku yiki lajik loi, ku lomki kaciluel, ku cik cuɛɛr kuɔɔt thook,

³⁴ ku yaiki riɛr de mac, ku cik poth ne theep thok, ne ke niɔp go ke cɔk rir, ku yiki riɛr ne tɔɔŋ yic, ku yiki rɛm ke alɛi cɔk lɔ weerer.

³⁵ Diar aa kɔcken ci thou bɛɛr loom ne jon de rɔt: kɔk aake yeke luc, ku reecki ke bi ke luɔk; bik jon de rɔt ŋuan bik loom:

³⁶ kɔk aake yeke them ne dui, ee yic, ku ne rek eya ku mac ne ɣoot yic:

³⁷ aake ye biɔɔk ne kur, ku yeke ŋuɔt, aake ye them, aake ye nɔk ne theep: aake ye roth piɔth ne biɔŋ ke amɛl, ku buɔɔth; ku cik ŋɔŋ, ku yiki gum, ku ye ke ŋet arac,

³⁸ (kɔc kene piny ke rɔt tiiŋ kene keek), yiki tai piɛny liɛɛt ku ne kur yic ku ne ɣar ke kur yic, ku adhum piiny.

³⁹ Ku keekɔcke kedhia, ɣɔn cene lek ne ke ne gamden, aake ken keciluel loom,

⁴⁰ ne ke cii Nhialic keŋuan miaac ne keda, kɛlke kek bi ya cɔk lɔcap te cin wɔɔk.