Eberuu 10 - Lek Jot de Jecu Kritho 1940

¹ Na ye loŋ naŋ atiapa de kapiɛth bi bɛn, ku cii yic de keekake ye nyuɔɔth, e kaci kɔc ye roth cuɔt ye kan leu abik lɔcar, ne koc de run ku run, yiki gam akolriɛc.

² Nee ci yinla ee te kene puɔl ne gɛm, ne ke cii kɔc ye duur rɛɛc ye bɛɛr yok ne nyiny de piɔu, te cene ke cɔk ɣer naatok?

³ Yekocne ayene rɛɛc ciɛɛt ne run ku run.

⁴ Riɛm de mioor ku de buɔɔth ace karac leu ne nyiɛɛi.

⁵ Yen ɣɔn bii en piny, go jam, Ye koc ku gɛm aake kɛneke kɔɔr, Ee guɔp yenekee ca juɛr ɣɛn;

⁶ Miɔc ci nyop ku koc de rɛɛc aaken yin ke piɔu lɔyum:

⁷ Guɔ jal luel, Ya ŋem, Ɣan ci bɛn (Ee gɔɔr ne kitam duɔlic ne ɣɛn) Ba piɔndu ya loi, Yin Nhialic.

⁸ Te cen keeka enhiake luel, Ye koc ku gɛm, ku miɔc ci nyop ku koc de rɛɛc aake kɛneke kɔɔr, ku kaake ken yin ke piɔu lɔyum (keeka ye gam ci luel de loŋ),

⁹ ke beer jam, Ye ŋem, Ɣan ci bɛn ba piɔndu ya loi. Ee ketueŋ nyaai, bi keciɛn ya nyuɔɔth.

¹⁰ Yepiɔne acene wɔ cɔk lajik ne guɔp de Yecu Kritho ci gam naatok ne raan ebɛn.

¹¹ Baany de ka ke Nhialic ebɛn ee cool ne kɔɔc ne akol yic lui ku ye yekoc toŋe dai gam, ke ci rɛɛc ye kan leu ne nyiɛɛi:

¹² ku yen, ɣɔn cen koc tok gam athɛɛr ne rɛɛc, ke lɔ reer ne ciin cuec de Nhialic;

¹³ ku jɔl ya tiit agut te bene kɔc ke aterde cɔk ye thony de yecok.

¹⁴ Gɛm tok acen kɔc cɔk lɔcap athɛɛr kɔc cike cɔk lajik.

¹⁵ Ku Jɔŋdiit Lajik ee wɔ lɛk eya: ɣɔn cen e luel,

¹⁶ Ye yemane aba loi wɔne keek Ne keeakolke, aluel Bɛnydit; Ɣan bi looŋcie taau ne kepiɔth, Ku gaar ke ne kenhiim yic eya; ke jɔl jam,

¹⁷ Ku rɛɛcden ku aciwuɔɔcken aacaake bi bɛɛr ya tak.

¹⁸ Te ye naŋ pɛl de keekake, ee ciɛn koc de rɛɛc beer ya tɔ.

¹⁹ Yen na cuk jal naŋ ŋeeny, mɛɛthcie, ŋeeny ye wɔ lɔ telajik ne riɛm de Yecu,

²⁰ ne dhol ci liɛp wɔɔk, dhol jot ye ya piir, ye alanh ci gɛɛŋ bakic, ke ye ya guɔpde;

²¹ ku na cuk jal naŋ bɛnydiit de ka ke Nhialic ne dhien de Nhialic nom;

²² ke ne wɔ cot roth tethiɔk ne pian yic ne gam rir, ke piɔthkuɔ ci kan weer te de nyiny rɛɛc de piɔu, ku ci gupkuɔ waak ne piu lɔcar:

²³ ku ne wɔ ye gam de ŋathda muk arir bi ya cuɔk ye yai; yen man e luel kaake ee naŋ adot:

²⁴ ku ne wɔ ye ŋɛk ke ŋɛk tak buk wɔpiɔth ya cuɔth nhiɛr ku luɔi piath;

²⁵ ku dukku gueerda ye puɔl, ci gueer de kɔc kɔk; yuku roth yɔɔk, ku yuku yook juak ne nyiny nyic we akɔl ne ci thiɔk.

²⁶ Na yuku rɛɛc loi ke nyicku ke wɔ ci nyiny de yic loom, e kee ciɛn koc de rɛɛc ci bɛɛr ya doŋ,

²⁷ ee ya tiɛt riɔc de luk, ku ye ya alɛɛth diit de many bi kɔc ke ater nyop.

²⁸ Ran ci loŋ de Mothe piɔlic ee thou te cin kac de piɔu ne wɛt de rou ka de diak de duleek:

²⁹ ke wɛide ci nyin bi dit ne luk ye ran ci Wen de Nhialic patic ne yecok, ku ci riɛm de mat, ke e cɔk yen lajik, cɔk ye ke ce lajik, ku ci rɛɛc luɔi Jɔŋdiit de athiɛi?

³⁰ Anyicku ye ke e jam, Ye guur ee ya kedie, aba cool. Ku beer, Ye Bɛnydit abi kɔcke ya luk.

³¹ Yuik ne Nhialiny ye piir cin ee ke rac areet.

³² Ciɛtka wenhiim ne akol tueŋ ɣɔn, ɣɔn kɔne we meer, guum we ke guɔm diit de ater;

³³ go we mac ke we kaac ne kɔc nyin ne lɛɛt ku aŋeet; ku bɛɛrka ya mat wene kɔc yeke loi yaya.

³⁴ We we ci piɔth ya kac ne kɔc ci mac, ku bɛɛrka piɔth ya lɔyum te cene kakuɔn rum, ne ke ye we ye nyic ke we ye naŋ keŋuan ku ye ke ye ceŋ.

³⁵ Yen duɔka ŋeenyduɔn ye biɔk wei, ee naŋ riop diit de cuɔt.

³⁶ We ye liɛr de piɔu ŋaŋ, bi we piɔn de Nhialic ya loi, bak keciluel loom.

³⁷ Ee kaam thintet eka ŋoot, Ke e bi bɛn abɔ, ku kaci bi gaau.

³⁸ Ku kedien lajik abi ya piir ne gam: Ku na dhuk ciɛn ne riɔc, ke ɣan ce piɔu bi ya lɔyum ne yen.

³⁹ Ku wɔɔk, wɔ cie kɔc ke dhuk ciɛn ne riakic; wɔ ye ya kɔc ke gam ne luaŋ de tiɛp.