Eberuu 1 - Lek Jot de Jecu Kritho 1940

¹ Nhialic, man e ye jam ɣɔn ke wurkuɔ ne biakne ku ne biakne ne nebii,

² ee jam ke wɔɔk ne thok de keeakolka ne Wende, man ci taau ke ye dit de keriɛc ebɛn, ye yen man ci piiny cak eya;

³ man ye ya mer de nuɔmde, yen yen man ye guɔpde ciɛt en ebɛn, ku ye kaŋ muk kedhia ne wɛt de riɛrde, ɣɔn cen karɛckuɔ puk, ke jɔl nyuc ne ciin cuec de Kediitgok nhialic;

⁴ ku jɔl ya yen e war malaikai ne piath, ci man cen rin war rinken loom.

⁵ Ye malaika no ci kan yɔɔk, Ye yin ye Wendie, Yin ca cɔk bɔbei e ekole? ku ber jam, Ye ɣan bi ya ya Wun, Ku kabi ya ya Wendie?

⁶ Ku ɣɔn ber en wenkaai cɔk bɔ ne piny nom ke jam, Ye ne door malaikai ke Nhialic kedhia.

⁷ Ku jiɛm ne malaikai, Ye yen man ye malaikaike cɔk ye yom, Ku ye awuutke cɔk ye liem de mac:

⁸ ku jiɛm ne Wende, Ye thonydu, Yin Nhialic, ee ke de athɛɛr ku athɛɛr; Ku leny de lajik, ee leny de ceŋdu.

⁹ Yin ci lajik ya nhiar, ku ye rɛɛc maan; Yen Nhialic, Nhialinydu, aci yi tɔc nom Ne miɔk de yum de piɔu a jɔl wariɛcku wuɔr.

¹⁰ Ku, Ye yin Bɛnydit, yin ci cok ke piny wɛc ɣɔn gɔɔce kaŋ, Ku jieer nhial ee luɔi de ciindu:

¹¹ Keeka bi riak; ku yin bi ya dhiac: Aabi dhiɔp ci alanh de raan guɔp;

¹² Aabake ya dol ci alanh de kɔu, Aabike ya waar ci ke ye piɔth: Ku yin ye dhiac, Ku runku aacie thok.

¹³ Ku ne ci kan jam ne malaika no, Ye ye nyuc ne ciin cuecdie, Aɣet kol ban yin cɔk kɛc kɔc nɔŋ ater kene yin kɔth?

¹⁴ Cik ye ya jak piath ye luui kedhia, cike tooc bik ya luui ne ke de keek man bi luak look?