2 Timotheo 3 - Lek Jot de Jecu Kritho 1940

¹ Ku ye yekene nyic, abi naŋ dhieu ne akol ciɛn bi bɛn.

² Kɔc aabii ŋɛk ke ya kok ne rɔt, ku yiki weu nhiar, ku yiki kenhiim lɛc, ku ditki piɔth, ku yiki lat, ku yiki wel ke kɔcken rɛɛc, ku cinki lɛc, ku cinki lajik,

³ ku yiki ciɛn nhiɛr ne keyic, ku yiki naŋ adhiil thin, ku yiki ya kɔc ke alop, ku yiki roth kuɔc muk, ku yiki ŋeeny, ku cik piath ye nhiar,

⁴ ku yiki menyiin, ku yiki nhiim riɛr, ku yiki piɔth dit, ku yiki yum de piɔu cɔk war nhiɛr de Nhialic;

⁵ ku yiki nhiim ya ka nɔŋ luɔi de Nhialic, ku ye ciɛn riɛrde ne keyic: ye jaal ne keekɔcke yic eya.

⁶ Kɔk ke keek aaye roth liɛɛp ne ɣoot yic, ku macki diar ci biɛp cii rɛɛc ke thiɔŋ, cike thɛl wei ne kɔɔr rɛɛc kuɔtic,

⁷ kaaye cool ne pioc, ku cik lɔ ye kan leu ne nyicic nyiny de yic.

⁸ Acit man ɣɔn teere Jane ku Jambere teer kek kene Mothe, yenekee cɔɔk ye keekɔcke teer kene yic, kɔc ci tɛŋden ke riak, ku yiki cuɔk piath ne ke de gam.

⁹ Ku kaace roth bi kan cuɔt: beelden abi tic enɔŋ raan ebɛn, ci man e cii keden kan yenya.

¹⁰ Ku yin ci piocdie biɔth, ku luɔidie, ku ke de ɣapiɔu, ku gam, ku guɔm, ku nhiɛr, ku liɛr de piɔu,

¹¹ ku ŋet, ku ka dhal ɣa; ka eke ci ɣɛn lɔny ne Antiokia, ne Yikonion, ku ne Luthura; ŋet ca ya guum: ku ka cii Bɛnydit ke ɣa ya luak bei thin kedhia.

¹² Ee yic, ku raan ebɛn ran ye Nhialic luɔi ne Yecu Krithoic abi ŋet ya guum.

¹³ Ku kɔc rac kene kɔc ke adhuɔɔm aabi ya lɔ e kee rac, ku kaabi ya dhuum ku dhom ke.

¹⁴ Ye ceŋ ne kaŋ yic ka cin ke pioc ku ca ke cok nyic, ku nyic ran e pioc yin ne keek;

¹⁵ ku ɣɔn yin meth ke yin ee ci kacikegɔɔr lajik aake cake nyic, ka ye yin cɔk leu nyiny de kaŋ agut luak ne gam ye tɔ ne Yecu Krithoic.

¹⁶ Kecigɔɔr ebɛn cii Nhialic taau ne weeide ee piath eya ne pioc, ku ne wɛi, ku ne jɔny, ku ne weet ye tɔ ne lajikic:

¹⁷ bi ran de Nhialic bi ya lɔcar, ku ci luɔi piath cok juɛr en ebɛn.