2 Thethalonikei 3 - Lek Jot de Jecu Kritho 1940

¹ Keciɛn, mɛɛthkuɔ, ee bak ya lɔŋ ne wɔɔk, bi wɛt de Bɛnydit ya cath ku ye noom, ci man yen tɔ kene week eya;

² ku bi wɔ ya luɔk enɔŋ kɔc kuc kaŋ ku kɔc rac, ne ke ye kek ciɛn gam kedhia.

³ Bɛnydit ee naŋ adot, abi we ya cɔk kaac, ku ye we gel ne kerac.

⁴ Ku wɔ ye roth gɛi Bɛnydit ne ke de week, ne ke ye we kaŋ loi ku yaka piɔth naŋ bak ke ya loi, keeka cukke lɛk week.

⁵ Ku keewuubi Bɛnydit we ya dak piɔth ne nhiɛr de Nhialicic, ku ne liɛr de piɔu de Krithoic.

⁶ We yookkuke, mɛɛthkuɔ, ne rin ke Bɛnydiitda Yecu Kritho, wuu yaka roth miɛt wei enɔŋ kɔc ye cath arac, ku cik ye cath ci wel cikke loom enɔŋ wɔɔk.

⁷ Week ne gupkuɔn we ye kɛɛr bii we wɔ ya dhiil ne kɛɛr nyic: wɔ wɔ ken ya ceŋ arac ne weyic;

⁸ ku kacin miɛth cuk cam ne ciɛlic ne ran dɛ ciin, ee ye ya luɔi ku guɔm, yuku lui ne wɛɛr ku akɔl, buk we ya cuɔk ye nuan:

⁹ ku kacie kee cii wɔ ye ye leu, ee kee cii wɔ roth cɔk ye kɛɛrduɔn, bak wɔ ya kaar.

¹⁰ Ɣɔn tɔ wɔ wɔne week, ke we we cukke lɛk yekene, Wuu ye na ye naŋ ran cie lui, ke ne cie cam.

¹¹ Wɔ ci kɔc piŋ ne weyic kɔc kɔk ye cath arac, kɔc cie kan lui, ye ya adakrooth.

¹² Emane wɔ yook kɔc yinya ku lekkuke ne rin ke Bɛnydit Yecu Kritho, wuu ne ke ye lui neduk, ku yiki miithken cam.

¹³ Ku week, mɛɛthkuɔ, duɔka ye dak ne luɔi piath.

¹⁴ Na nɔŋ ran ci welkuɔ ye gam ne yethone, ke yaka dot yerane, bak ya ciɛn mat wene yen, bi yic ya liɛr.

¹⁵ Ku duɔka ye thɔŋ ran de ater, yaka waai ci ke ye mɛtheda.

¹⁶ Eewuubi Bɛnydiit de dɔɔr ne guɔpde we ya yiɛn dɔɔr akolriɛc ne ɣan kedhia. Eewuubi Bɛnydit ya tɔ kene week wedhia.

¹⁷ We yake muɔth ne ɣaciin ɣan Paulo, muɔth ye ya cit ne thoon yic kedhia: yeneka jal gɔɔr.

¹⁸ Ya keeyabi athiɛi de Bɛnydiitda Yecu Kritho ya tɔ kene week wedhia.