2 Thethalonikei 1 - Lek Jot de Jecu Kritho 1940

¹ Paulo, kene Thiluano ku Timotheo, aalek kanitha de Thethalonikei tɔ ne Nhialic Awadaic ku Bɛnydit Yecu Kritho;

² Yi keewuubi athiɛi ya tɔ kene week ku dɔɔr de Nhialic Awada ku Bɛnydit Yecu Kritho.

³ Wɔ bi Nhialic ya dhiil ne lɛc riariar ne week, mɛɛthkuɔ, ci man piɛth en, ne dit ye gamduɔn lɔ ke juak yeyic areet, ku ye nhiɛr ye we roth nhiar wedhia ye lɔ ke dit;

⁴ a wɔ ye leec ne week ne kanithai ke Nhialic yic ne liɛrduɔn de wepiɔth ku gamduɔn ne ŋetduɔnic ebɛn ku ne ka ye we dhal yic yakake guum;

⁵ ka ye ya nyooth de luŋ lajik de Nhialic; bi we ya yok ke we piath ne ceŋ de Nhialicic, ne ke ye we gum ne yen eya:

⁶ te yen jal piath ne Nhialic piɔu ye bi kɔc ya riɔp ka ye ke nuan kek kɔc ye we luɔi ka dhal week,

⁷ ku bi we ya yiɛn lɔŋ wene wɔɔk, ne kol bene Bɛnydit Yecu nyuɔɔth nhial kene malaikai ke riɛrde,

⁸ ne liem de mac, bi aguure yiɛn kɔc kuc Nhialic ku kɔc ce welpiɛth ke Bɛnydiitda Yecu ye gam.

⁹ Keekɔcke aabi wɛi ya guum, agut en riak athɛɛr ne Bɛnydit nom, ku ne nuɔm de riɛrde,

¹⁰ te bii en bene ye noom ne kɔckek cithiei yic, ku bene gai ne yekole ne kɔc ye gam kedhia (ne kee cene lek ye wɔ we lɛk ya gam).

¹¹ Yen wɔ ye lɔŋ ne nyindhia ne week eya, bi Nhialinyda bi we yok ke we ci roth tiiŋ wene cɔt cene we cɔɔl, ku bi kɔr ebɛn kɔr de piath ku luɔi ebɛn luɔi de gam bi ke ya cɔk dhiil roth ne riɛr;

¹² bi rin ke Bɛnydiitda Yecu jal ya noom ne weyic, ku week ne yeyic, ne athiɛi de Nhialinyda ku Bɛnydit Yecu Kritho.