2 Petero 1 - Lek Jot de Jecu Kritho 1940

¹ Thimon Petero man ye awut ku ye dutuny de Yecu Kritho, agɛr kɔc ci gam mit lom ci wɔɔk ne lajiŋ de Nhialinyda ku Duluɛŋda, Yecu Kritho:

² Eeyabi athiɛi tɔ kene we ku ye dɔɔr lɔ ke dit ne nyiny de Nhialicic ku de Yecu Kritho Bɛnydiitda;

³ man cii riɛrden nhial wɔ yiɛn kaŋ kedhia ke piir, ku lui ye wɔ Nhialic luɔi, ne nyiny de yen man e cɔl wɔɔk ne nuɔmde ku piathde.

⁴ Ku ci wɔ yiɛn kapiɛth ŋuan cike lɛk wɔ ne keekake, buk luɛl ci cil ne piny nom ne kɔr rɛɛc de kɔc piɔth ya leu ne dɛny, ku buk ya mat wɔ piɔn de Nhialic.

⁵ Yen yaka lui areet, ku yaka piath mat kene gamduɔn; ku nyiny de kaŋ kene piathduɔn;

⁶ ku nyiɛc luɔi kene nyiny de kaŋ; ku cuɔk leeth kene nyiɛc luɔi;

⁷ ku luɔi de Nhialic kene cuɔk leeth; ku nhiɛr de watmathkuɔn kene lui de Nhialic; ku nhiɛr kene nhiɛr de watmathkuɔn.

⁸ Te ye we naŋ keekake ku yeki we duut, e kaaye we gɛl wei ne beelic, ku ne cuɔk lokic ne nyiny de Yecu Kritho Bɛnydiitda.

⁹ Ran cin keekake ee cɔɔr, ee daai ne ka thiɔk abac, ku mɛr nom ne wɛk cene ye waak ne karɛc thɛɛrke.

¹⁰ Yen, watmathcie, yaka lui areet bak cɔtduɔn ku lonyduɔn cene we lɔc ya cɔk ye yic: te ye we ka cit keekake loi, ke we cie kan kɔth:

¹¹ ku ler bene we lar ne ceŋ athɛɛr de Bɛnydiitda ku Duluɛŋda Yecu Kritho abi cok ne yin we yala.

¹² Yen an bi dai ya tɔ ne nyindhia ba we ya cɔk tak keekake, te ciɛk we ke ya nyic, ku yaka kɔɔc apiath ne yicic man tɔ ne weyic.

¹³ Ku kaya tak ya piɛth, ne kam ŋuɔt an ka tɔ luaakne, aban we ya cuɔth piɔth bak wenhiim ya ciɛt;

¹⁴ ne nyiny nyiɛc an en ke luaŋdie bi guɔ dai nyaai, ci man ee ci Bɛnydiitda Yecu Kritho ye nyuɔth an.

¹⁵ Yen abak ya them areet bak wenhiim ya leu ne ciit ne keekake te can thou.

¹⁶ Acie akokool cike loi ne pɛl de raan kek eke biɔthku keek, ɣɔn cɔk wɔ we nyic riɛr ku bɛn de Bɛnydiitda Yecu Kritho; wɔ ci nuɔm diitde ŋem ne wɔnyin.

¹⁷ Ee ci nuɔm ku dheeŋ loom enɔŋ Nhialic Wun, wen biie ror enɔŋ yen ne nuɔm dit, Ye yekene kee Wendien nhiar ayan piɔu miɛt ne yen:

¹⁸ ku yerore ee cuk piŋ ne gupkuɔ ne bɔ nhial, ɣɔn tɔ wɔ wɔne yen ne kuur lajik nom.

¹⁹ Ku ne wɛt de kaciluel ya bik tuɔl acii wɔ yic yok thin; yen apiath bak yewɛte ya piŋ, ci man de lamba ye dep tecol agut run e piny, ku ye cier de akɔl rɔt jɔt ne wepiɔth:

²⁰ ku nyiɛcka tueŋ, ke cin keciluel ne kacigɔɔr yic ya bi tuɔl kene gɔɔc raan.

²¹ Acin luɛl de ke bi tuɔl ye kan bɛn ne piɔn de raan; aaye kɔc lajik ye wɛt de Nhialic luel e kee ci thiɔŋ ne Jɔŋdiit Lajik.