2 Korinthoi 9 - Lek Jot de Jecu Kritho 1940

¹ Ace piath enɔŋ an ba gɛɛr enɔŋ week, ne ke de miɔc de kɔc cithiei:

² we nyiɛcke ke we ye piɔth naŋ miɔc, yenekee lɛc ɣan wenhiim enɔŋ keek kek kɔc ke Makeondia, ya Akaya ee go rɔt juir runwaar, a go ŋuenyduɔn kɔc juec ke keek cuɔth piɔth.

³ Ku an ci meethkuɔ tuɔɔc, bi lecdɛn de wenhiim bi cuɔk ye ya ciɛlic ne yekene; bi we ya yok ke we ci juir, ci man e can e luel:

⁴ kɛlke, na yen bɛn wɔne muɔny Makedonia, ku yok week ne ken roth juir, ke wɔɔk (acie week e luelkuke), wɔ bi yic liɛr ne yegei de rɔtne.

⁵ Yen acaal ya piɛth ba mɛɛth yɔɔk, bik ŋɔɔr enɔŋ week, bik miɔcduɔn e cak luel kan lɔ kuɔtic, bi jal tɔ ke ci juir, ke ye ke de miɔc ke cie ke e tuer.

⁶ Ku yekene kaluɛl, Ya ran ye kadiak pok, abi kadiak ya tem; ku ran ye kajuec pok, abi kajuec ya tem.

⁷ Nɛke raan ebɛn ye lui ci tɛŋ yene tak ne yepiɔu; ne cie gam de piɔu kɔu, ku cii ye ke ye tuer: Nhialic ee ran ye miooc ne piɔn lɔyum nhiar.

⁸ Ku Nhialic aleu bi athiɛi ebɛn ya cɔk dit enɔŋ week, bak ya kuɛth ne keriɛc ebɛn ne nyindhia, ku yaka bɛr kuɛth ne luɔi ebɛn:

⁹ ci man cene e gɔɔr, Ya kaacike weer, aacike yiɛn aŋaaŋ; Ku lajiŋde ee ceŋ athɛɛr.

¹⁰ Ku yen man ye dupuk yiɛn kɔth, ku cuin ne ye miɛth, abi kɔthkuɔn ya bɛi ku cɔk ke kuɔt ne puk, ku ye luɔiduɔn de lajik juak;

¹¹ ku we bi ya bany ne kaŋ kedhia bak ya nyiɛc miooc, miɔc ye Nhialic yiɛn lɛc ne wɔɔk.

¹² Teŋ de yeluɔine ee ŋɔɔŋ de kɔc cithiei kueth, ku jɔl lɛc kuɔt de Nhialic ya cɔk dit eya.

¹³ Yeluɔine kee we cɔk nyic, ku ye ke cɔk lec Nhialic ne tɛɛu ci we roth ya taau ne welpiath yic ne gamduɔn, ku ne nyiɛc miɔcduɔn de keek ku de raan ebɛn.

¹⁴ Ku keek eya ne gupken aaye lɔŋ ne week, ku yiki we ŋaŋ areet ne ke de athiɛi diit de Nhialic ye tɔ ne weyic.

¹⁵ Eeyabi lɛc ya tɔ kene Nhialic ne miɔcden cin yethok.