2 Korinthoi 4 - Lek Jot de Jecu Kritho 1940

¹ Yen yeman nɔŋ wɔ yeluɔine, ci man ci wɔ naŋ kac de piɔu, wɔ cie niɔp:

² ku wɔ ci ka ci kum ke yicliɛr waan, wɔ cie cath ne pɛl, ku cuk wɛt de Nhialic ye gam ne adhuɔm; ye ya nyooth de yic yene ye wɔ roth gam tɛŋ de raan ebɛn piɔu ne Nhialic nyin.

³ Ku na ci welpiɛthkuɔ kum, e kaaya kum ne keyic keek man ye thou:

⁴ kɔc ci nhialiny de yepinye nom ke cɔɔr piɔth kek kɔc cie gam, a go ɣɛɛr de welpiɛth ke nuɔm de Kritho, man ye kɛɛr de Nhialic, cuɔk ye run ne kegup.

⁵ Wɔ cie weet ne roth, kee ya Yecu Kritho ne ye Bɛnydit, ku wɔ ye ya awuutkuɔn ne ke de Yecu.

⁶ Emane ee Nhialic, yenekee jam, Ye ɣɛɛr abi cuɔl thiaiyic, ke ci mer ne wɔpiɔth, bi ɣɛɛr de nyiny de nuɔm de Nhialic nyuɔɔth ne Yecu Kritho nyin.

⁷ Ku wɔ ye naŋ yekepiɛthe ne tony de tiɔpic, bi dit de riɛr bi ya ke de Nhialic, ku ci ye ya keda.

⁸ Wɔ yeke nhiac ne biɔk kedhia, ku wɔ cie ciɛn ɣɔr; wɔ ye liaap nhiim, ku wɔ cie ciɛn ŋɔth;

⁹ wɔ ye cop, ku wɔ cie ciɛn kuny; wɔ ye bar piny ne biok, ku cie ɣet wei;

¹⁰ wɔ ye thuɔu de Yecu ɣaac ne wɔgup akolriɛc, bi piir de Yecu bi ya tic ne wɔgup.

¹¹ Wɔ wɔ kɔc ye piir wɔ ye yiɛn thou ne ke de Yecu akolriɛc, bi piir de Yecu ya tic eya ne riiŋdaic.

¹² Yen thou ee cath ne wɔyic, ku cath piir ne weyic.

¹³ Eman nɔŋ wɔ jɔŋ de game, ci man de kacigɔɔr, Ya kaca gam, ku yeneka yan jam; ke yuku gam eya, ku yeneka ye wɔ jam eya;

¹⁴ ne nyiny nyic wɔ yen, yen man e jɔt Bɛnydit Yecu abi wɔ jɔt eya wɔne Yecu, ku kabi wɔ laar wɔne week.

¹⁵ Kaŋ kedhia aaye tɔ ne keduɔn, bi athiɛi, ci jɔpic ne juaac, bi lɛc ya cɔk dit enɔŋ nuɔm de Nhialic.

¹⁶ Yen wɔ cie niɔp; na cak ran biyicda ya lɔ ke jiɛl, ke ran de baŋthinda ee jɔt ne nyindhia.

¹⁷ Ke piɔl ye wɔ dhal, ye ke de emane, ee wɔ yiɛn thiɛk diit de nuɔm athɛɛr;

¹⁸ wɔ cie daai ne ka yeke ɣoi, aaye ya ka cie ɣoi: ne ke ye ka yeke ɣoi ya ka ke emane, ku ye ka cie ɣoi yiki ya ka ke athɛɛr.