2 Korinthoi 3 - Lek Jot de Jecu Kritho 1940

¹ Beerku lec de wɔnhiim gɔɔc? ka ŋɛŋku, ci man de kɔk, thoon ke lec de wɔnhiim enɔŋ week, ka lecduɔn de wɔnhiim enɔŋ kɔc kɔk?

² We ye thonda, thon ci gaar ne wɔpiɔth, ci nyic ku ye ciir ne raan ebɛn;

³ ku kee we nyuɔɔth ke we ye ya thon de Kritho, cuk gɔɔr, ku kee cuk gar ne yiŋki, ee garku ne Jɔŋdiit de Nhialiny ye piir; ku kee cuk gɛɛr ne kur ci ke guaŋ yic, aake gɛɛruke ne ka cit ka ci guaŋ yic, ye ya piɔth ke riiŋ.

⁴ Wɔ ye roth gɛi Nhialic ne Kritho wuula:

⁵ ku wɔ cie leu ne gupkuɔ buk ya tak wuu nɔŋku kedɛn de riɛrda; leu ye wɔ luɔi leu ee ya ke de Nhialic;

⁶ yen man ci wɔ cɔk leu luɔi yuku awuut ke man jot; ku cii ye ke de loŋ ci gɔɔr, ee ke de jɔŋdit: loŋ ci gɔɔr ee nɛk, ku jɔŋdit ee wei miaac.

⁷ Na ne luɔi de thou, ci gɔɔr ne kur kɔth, bɔ ne nuɔm, agut te ci mith ke Yithrael Mothe ye leu ne ɣoi nyin ne dheeŋ de yenyin, ku yedheeŋe ee lɔ ke guut,

⁸ ke yeŋo cii luɔi de jɔŋdit ye jal naŋ nuɔm?

⁹ Na ye luɔi de lukwei naŋ nuɔm, ke luɔi de lajik ee ye wuɔr ne nuɔm.

¹⁰ Neyic ke e ci cɔk nɔŋ nuɔm ee ce cɔk nɔŋ nuɔm yala, ee ne ke de nuɔm bi ya war.

¹¹ Na ne yeke ye jaale ye naŋ nuɔm, ke ke ye dhiac ee ye waan ne nuɔm.

¹² Yen yeman nɔŋ wɔ yeŋathe, acii wɔ ya ŋeeny areet ne jam,

¹³ ku wɔ ce cit Mothe, man e ye yenyin kum, kɛlke mith ke Yithrael bi thok de yeke ye jaale ya ŋem egɔk:

¹⁴ aake rir nhiim, ke ye yeke ye kuɔme ye dhiac ne kuɔmic, agut ci emane, te yene man thɛɛr ciir, ke ci jal guɔ jaal ne Krithoic.

¹⁵ Ku aɣet ci emane, te yene Mothe ciir, ke ke ye kuɔm ee dhiac ne kepiɔth.

¹⁶ Ku na ye dhuk enɔŋ Bɛnydit, ke ke ye kuɔm aye nyaai.

¹⁷ Bɛnydit ee ya Jɔŋdit emane: ku te ye Jɔŋdiit de Bɛnydit tɔ thin, yenekee naŋ nomlaau.

¹⁸ Ku wɔɔk wɔdhia, wɔ ye ciɛn ke de kum, ku wɔ ye ciɛt mandar nuɔm de Bɛnydit ayuku nyuɔɔth, ku wɔ ye war ne yeguɔp toŋeic jal ne nuɔmic lɔ ne nuɔmic, ci ke ci bɛn enɔŋ Bɛnydit Jɔŋdit.