2 Jɔn 1 - Lek Jot de Jecu Kritho 1940

¹ Randit athɔn tiŋ ci lɔc kene mithke, kek keek man nhiarke ne yith; ku kacie ɣɛn atok, aa keek kedhia kek kɔc nyic yith eya;

² ku ne ke de yith, yen man ye ceŋ ne wɔyic, ku kabi ya tɔ ke wɔ athɛɛr.

³ Athiɛi, ku kac de piɔu, ku dɔɔr eeyabik ya tɔ kene wɔ nenɔŋ Nhialic Wun, ku nenɔŋ Yecu Kritho, Wen de Wun, ne yith ku ne nhiɛr.

⁴ An mit piɔu areet ne ke can mithkuk kɔk yok e ke ye cath ne yith yic, ci man ci wɔ loŋ loom enɔŋ Wun.

⁵ An lɛŋ yin emane, yin tiŋe, ku kace cit man gar an yin loŋ jot, ee ke cuk loom ɣɔn gɔɔce kaŋ, ya buk roth ya nhiar.

⁶ Nhiɛr eke, ee buk ya cath ne looŋke yic. Loŋ eke, ci man ci we ye piŋ ɣɔn gɔɔce kaŋ, ya buk ya cath thin.

⁷ Dudhuum juec aa lɔ ne piny nom, kek keek man ce bɛn de Yecu Kritho ne bii yen ne ye raan ye gam. Yenekee dudhum ku ye atiir de Kritho.

⁸ Yaka roth ŋem, kɛlke we bi kaŋ muɔr ka eke cukke loi, ku bak ariop ebɛn loom.

⁹ Raan ebɛn ran ye wuɔc ku cii ye dhiac ne pioc de Krithoic, ee ciɛn Nhialic: ran ye dhiac ne piocic ee naŋ ke keerou yi Wun ke Wa.

¹⁰ Na ye raan bɛn enɔŋ week, ku cii yepioce ye bɛi, ke duɔka ye laar ɣonduɔn, ku duɔka ye thiec:

¹¹ Ran ye ye thiec ee ya mat ke yen ne luɔi rɛɛcde.

¹² Anɔŋ kajuec bake gar week, ku kaacaake bi gɔɔr ne waragak ku yiŋki: an ŋath lɔ enɔŋ week, buk jam ke wɔ ɣoi wɔnyin, bi miɛtduɔn de piɔu jal dit.

¹³ Mith ke nyankui ci lɔc aamath yin. Amen.