1 Timotheo 3 - Lek Jot de Jecu Kritho 1940

¹ Yewɛte kee wɛt yic, Ya na kɔr raan luɔi de bicep, e kee luɔi piath e ye kɔɔr.

² Yen bicep abi ya ciɛn awac, ee ya mony de tiŋ tok, ku ye lɔcap, ku ye rɔt muk apiath, ku ye nyiɛc lui, ku ye gooŋ, ku ye nyiɛc pioc;

³ ku cii ye jɔɔl, ku cii cin ye dac war; ye liɛr, ku cii ye teer, ku cii weu ye nhiar;

⁴ ku ye ya ran ye dhiende nyiɛc dɔk, ku ye mithke luɔi ne rieuic.

⁵ (Na ye raan ye dhiende kuɔc dɔk, ke bi kanitha de Nhialic ya nyiɛc ŋem yede?)

⁶ ne cie ya ran piɔc rɔt wel, kɛlke bi piɔu ya dit ku yuik ne lukwei de duriethic.

⁷ Ku kabi ya naŋ luɔm piath enɔŋ kɔc kec; kɛlke bi loony ne gueelic ku ne aɣɔm de duriethic.

⁸ Ku yeneka bi ya ya cɔɔk de dikoon eya aabi reer eduk ya dhiil; ku yiki ciɛn thoŋ ye yic ya rou, aaci bi ya dek areet ne piukeabiɛi, ku cik bi ya lɔ gɔkgɔk ne jueŋ de weu;

⁹ aabi kecikum de gam ya muk ne nyiny lɔcar de piɔu.

¹⁰ Ne keekɔcka yeke kan caar, ku bik jal lui e ke ye dikoon, te ye kek ciɛn awac.

¹¹ Yeneka bi ya cɔɔk de diar eya aabi reer eduk ya dhiil, ku cik ye naŋ alop, yiki lɔcap, ku yiki naŋ adot ne keriɛc ebɛn.

¹² Ne dikoon ye ya roor ke diɛɛr took, ku ne ke ye mithken kene dhiɛnken dɔk apiath.

¹³ Kɔc ci lui apiath e kee ye dikoon aaye ɣɔn piath yok, ku ŋeenydiit de gam ye tɔ ne Yecu Krithoic.

¹⁴ Keekake agarke yin, ku an ŋath dai lɔ enɔŋ yin;

¹⁵ ku na dhiaac wei areet, ke yin bi ceŋ bii kɔc ya ceŋ ne dhien de Nhialicic ya nyic, dhien ye ya kanitha de Nhialiny ye piir, ye ya cok ku ye ya men de yic.

¹⁶ Kecikum de luɔi de Nhialic ee dit te cin teer; Yen ye ke e ci cɔk tiɛc ne guɔp, ku ci cɔk lajik ne tiɛp, ku ŋem ne malaikai, ku cene juɔr wɛɛt, ku cii piny nom gam, ee jal laar nhial ne nuɔm.