1 Timotheo 1 - Lek Jot de Jecu Kritho 1940

¹ Paulo, metuny de Yecu Kritho ne ke de loŋ de Nhialic Duluɛŋda, ku Yecu Kritho ŋathda;

² an lek Timotheo, mɛnh yicdie ne gamic: Ya keeyabi athiɛi ya tɔ kene yin, ku kac de piɔu, ku dɔɔr, enɔŋ Nhialic Wun ku Bɛnydiitda Yecu Kritho.

³ Acit man e can yin kan yɔɔk ya ba dhiac ne Epetho, ɣɔn lar an Makedonia, ba kɔe ya yɔɔk duɔeke ye weet ne weet dɛ,

⁴ ku cik ye piŋ ne akokool ku kuɛn de rin ke kuɛt cin kethook, ka ye ŋɔɔr ne teeric, ku cik ye ya luɔi yic de Nhialic ye tɔ ne gamic; yenekee yook yɔɔk an yin emane.

⁵ Ku thoŋ de yook ee ya nhiɛr de piɔu lɔcar ku nyiny piɛth de piɔu ku gam cin acuɔl.

⁶ Raan biak ee keekake kɔl ku ye rɔt wɛl wel ke ciɛlic;

⁷ aaye bik ya ya dupiooc ke looŋ kɔɔr, te ciɛk kek ke yiki luel kuc, ku ke yiki riɛr.

⁸ Ayuku nyic ke loŋ ye piath, te ye raan ye kuanyic apiath,

⁹ ku ye nyic, ke loŋ kene taau ne ran lajik, ee tɛɛue ne ran cin loŋ ku cie leu ne dok, ku kɔc reec Nhialic kene kɔc rac, ku kɔc cie lajik ye ciɛn rieu, ku ne kɔc ye wurken nɔk kene kɔc ye mɛrken nɔk, ku kɔc ye anaktiɛr,

¹⁰ ku ne abɛɛl, ku kɔc ye roth cɔk ye diar, ku ne kɔc ye kɔc kual, ku ne alueth, ku ne kɔc ye roth meel ne adhuɔɔm, ku na yin naŋ kɔk waac kene pioc yic;

¹¹ ne welpiɛth ke nuɔm de Nhialiny cithiei, ci ke tau yɛn.

¹² Aya leec ye ke ye ɣa cɔk rir, ye Yecu Kritho Bɛnydiitda, ne ke yen ɣɛn nyic ke ɣan ye naŋ adot, ku ci ɣa lac ne luɔideic;

¹³ ɣɔn cak ɣan ya ran ye Nhialic laat, ku ya meŋet, ku ya ya ayaŋkɔc. Go piɔu kac ne ɣɛn, ne ke yan e kuɔc loi ne gam kɛn an gam;

¹⁴ ku jɔl athiɛi de Bɛnydiitda dit areet kene gam ku nhiɛr ka ye tɔ ne Yecu Krithoic.

¹⁵ Ye wɛte kee wɛt yic, ku kapiath ne kɔc kedhia te loom kek yen, Ya Yecu Kritho ee bɛn ne piny nom bi kɔc ci karac loi luɔk, kɔc war keek ne rɛɛc:

¹⁶ Yekene yenekee kɔc yen piɔu ne ɣɛn, bi Yecu Kritho liɛr diitden de piɔu nyuɔɔth ne ɣaic ɣan man wɛr kɔc ne rɛɛc, ba ya kɛɛr de kɔc bi ye ya gam ne piir athɛɛr.

¹⁷ Eeyabi yi rieu kene nuɔm bik ya tɔ kene Meleŋ ye ceŋ athɛɛr, ku cii ye luɛl, ku cie leu ne ŋem, man ye ya Nhialiny tok, athɛɛr wada. Amen.

¹⁸ Ye wɛte acɔl yin, yin Timotheo mɛnhdie, ci nyuɔth e cene ye kan nyuɔɔth ɣɔn ne yin, bin tɔŋ piath ya thɔɔr;

¹⁹ ke yin ye gam muk ku nyiny piɛth de piɔu; ke ye kɔk ke rɛɛc ne keyic a jɔl ya pukden de gam:

²⁰ kɔc nɔŋ yi Kumenayo ku Alekandaro; kɔc cake gam Catan, bi ke piɔc bik Nhialic cuɔk ye laat.