1 Thethalonikei 5 - Lek Jot de Jecu Kritho 1940

¹ Ee ciɛn te gar an week mɛɛthkuɔ, ne ke de run ku akol ke bɛn.

² Anyiɛckayic ne gupkuɔn ke kol de Bɛnydit bi bɛn ci man de rueeny kau.

³ Na yiki ye luel, Yi kee dɔɔr ku kee ceŋ lɔyum; ke jɔl guɔ ya riak yene lony keek, ci man de rɔp ke tiŋ liac; ku kaabi ciɛn ke kɔn ke puɔɔth.

⁴ Ku week, we mɛɛthkuɔ, we ci cuɔl ye ceŋic, a bi yeakole we muɔk piny ci rueeny,

⁵ ne ke ye we ya wɛɛt ke ɣɛɛr wedhia, ku yaka ya wɛɛt kɔl: wɔ cie ya kɔc ke kau, ku cuk ye ya kɔc ke cuɔl.

⁶ Yen dukku ye niin ci man de kɔc kɔk, yuku tiit ku dukku ye miɔl.

⁷ Kɔc ye niin aaye niin wakɔu; ku kɔc ye miɔl aaye miɔl wakɔu.

⁸ Ne wɔ cie miɔl eman ye wɔ kakɔle, yuku luŋ de yɔu gɛɛŋ de gam ku de nhiɛr; ku luŋ de nom man ye ŋath de luak.

⁹ Ne ke kene Nhialic wɔ mɛk ɣok, ee wɔ mɛk loom de luak ne Bɛnydiitda Yecu Kritho,

¹⁰ man ci thou ne wɔɔk, buk piir ya mat wɔne yen, te ye wɔ yin ka te ye wɔ nin.

¹¹ Yen yaka roth yɔɔk, ku yaka roth yiɛk nhial, ci man ye we ye loi.

¹² We yukuke lɔŋ, mɛɛthkuɔ bak kɔc ya nyic, kɔc ye lui ne weyic, ku yiki tɔ ne wenhiim ne Bɛnyditic, ku yiki we waai;

¹³ ku bak ke ya riɛu areet ne nhiɛr ne ke de luɔiden. Yaka naŋ dɔɔr ne roth.

¹⁴ Ku we yookku keek, mɛɛthkuɔ, wuu yaka kɔc kuc luɔi waai, ku yaka kɔc riɔc piɔth wɛɛi, ku yaka kɔc niɔp kuɔny, ku yaka cok gum ne raan ebɛn.

¹⁵ Yaka roth ŋem kɛlke ŋɛk bi rɛɛc ya dhuɔk ŋɛk; ku yaka piath yaka biɔɔth cok ne nyindhia, ne yi ŋɛk ke ŋɛk, ku ne raan ebɛn.

¹⁶ Yaka piɔth lɔyum ne nyindhia;

¹⁷ yaka lɔŋ riariar;

¹⁸ yaka leec ne ke dɛ ebɛn: yenekee ya piɔn de Nhialic enɔŋ week ne Yecu Krithoic.

¹⁹ Duɔka Jɔŋdit ye yaai;

²⁰ duɔka lek ye tɔɔnic;

²¹ yaka kaŋ kedhia them; yaka ke ye kepiath muk arir;

²² yaka roth muɔk wei ne keriɛc ye racic.

²³ Eewuubi Nhialiny de dɔɔr bi we ya cok cɔk lajik ne guɔpde; ku keewuubi weikuɔn, kene tiipkuɔn, ku gupkuɔn roth ya tiiŋ te cin awac ne bɛn de Bɛnydiitda Yecu.

²⁴ Ee naŋ adot ye yen man ye we cɔɔl, ku kabi ya loi eya.

²⁵ Yaka lɔŋ ne wɔɔk, mɛɛthkuɔ.

²⁶ Mathka mɛɛth kedhia ne ciɛm lajik.

²⁷ We yake yɔɔk ne Bɛnydit ya yethone abi ciɛr mɛɛth kedhia.

²⁸ Eeyabi athiɛi de Bɛnydiitda Yecu Kritho ya tɔ kene week.