1 Thethalonikei 4 - Lek Jot de Jecu Kritho 1940

¹ Keciɛn, mɛɛthkuɔ, we yuukue lɔŋ ku yookku week ne Bɛnydit Yecuic, bak ya dit ku kuɔtka, ci man ci we cath bik we ya cath loom enɔŋ wɔ ku bak ya miɛt ne Nhialic piɔu, ku we ye cath wuɔla neyic.

² We nyic looŋ cukke yiɛn we ne Bɛnydit Yecu.

³ Lajiŋ bi we ya lajik, yenekee piɔn de Nhialic, bak roth ya pɛn bal;

⁴ ku bak ya nyiɛc ceŋ wene gupkuɔn lajik ku yakake riɛu,

⁵ ke cin kɔɔr rɛɛc de guɔp ci man de Juurkɔk ye Nhialic kuc;

⁶ cin ran toŋ ye wuɔc ku ye manhe peec ne yekene: ne guur ye Nhialic keekake guɔr kedhia, ci man ci wɔ we kan nyiɛn ku lekku week.

⁷ Nhialic ee ce wɔ cɔl buk ya lui arac, ee cɔl wɔ buk ya lajik.

⁸ Yen ran ye rɛɛc, acie raan guɔp e yee rɛɛc, ee ya Nhialic, man ye we yiɛn Jɔŋdiitden Lajik.

⁹ Ee ciɛn te beere ŋɛk ya gɛɛr enɔŋ week ne nhiɛr bii we mɛɛth ya nhiar: we ye Nhialic ke piɔc ne bi ŋɛk ŋɛk ya nhiar;

¹⁰ ayaka luɔi mɛɛth tɔ ne Makedonia kedhia ne yic. Ku we yookkuke, mɛɛthkuɔ, bak ya lɔ ke juakkayic areet;

¹¹ ku yaka reer eduk kɔɔr, ku yaka luɔiduɔn loi, ku yaka lui ne cinkuɔn, ci yook ci wɔ we yɔɔk;

¹² bak ya nyiɛc cath ne kɔc yic kɔc kec, ku ye ciɛn ke yaka dak.

¹³ Eewuubak ya cuɔk ye kuc, mɛɛthkuɔ, ye ke de kɔc ye niin; bak ke cuɔk ye dhiɛu, ci kɔc kɔk, ye ciɛn ŋath.

¹⁴ Na yuku ye gam ke Yecu ci thou ku beer rɔt jɔt, ke yenekee cɔɔk bene kɔc ci nin ne Yecuic bene ke ya bɛi ne Nhialic kene yen.

¹⁵ Yekene yeneka ye wɔ we yɔɔk ne wɛt de Bɛnydit, wuu wɔ kɔc ye piir, cike wɛn bɛn de Bɛnydit, wɔ ci kɔc ci niin bi wuɔr.

¹⁶ Bɛnydit ne guɔpde abi bɛn piny nhial, ne cɔt, ku ror de malaikadit, ku tuuŋ de Nhialic: ku jɔl kɔc ci thou ne Krithoic roth kan jɔt:

¹⁷ ku wɔɔk wɔ kɔc piir, ci doŋ, wɔ bike kuany nhial netok wɔne keek ne piolic, buk lɔ rɔm wɔne Bɛnydit ne nhial jɔc; ku jɔlku ya tɔ athɛɛr wɔne Bɛnydit.

¹⁸ Yen yaka wepiɔth duut ne roth ne keewelke.