1 Thethalonikei 2 - Lek Jot de Jecu Kritho 1940

¹ Week ne gupkuɔn, mɛɛthkuɔ, we nyic lɔ ci wɔ lɔ enɔŋ week, ke ken ya ciɛlic:

² ɣɔn cii wɔ kan gum, ku ci wɔ ya luɔi karɛc dit ne Pilipoi, ci man nyic we yen, goku ŋeeny areet ne Nhialinydaic lekku we welpiɛth ke Nhialic ne teer ditic.

³ Yookda acie ya awac, ku kacie ke de acuɔl, ku adhuɔɔm:

⁴ acit man e cii Nhialic wɔ them lan ben welpiath taau ne wɔcin, a yeneka ye wɔ jam; acie buk kɔc ya yuum piɔth, ee ya Nhialic man ye piɔthkuɔ them.

⁵ Acin kol toŋ yene wɔ yok ke wɔ jam ne wel ke pal de nom, ci man nyic we yen, ku cii ye wel ye wek thian, ci man ye Nhialic ye nyic;

⁶ ku cuk lɛc ye kɔɔr enɔŋ kɔc, lan yen week, ku lan yen kɔk, te ete ciɛk wɔ ya anuanduɔn ne ke ye wɔ dutuuc ke Kritho.

⁷ Wɔ wɔ ye lui ne weyic nemath, ci muŋ de tiik ke mithke:

⁸ yenekee ye cɔɔk e ye wɔ we kɔɔr ne nhiɛr, ku yuku piɔth miɛt ne miɔc de week ne welpiɛth ke Nhialic ku cie ke kepɛc, ye ya tiipkuɔ eya, ne nhiɛr cii wɔ week ya nhiar.

⁹ We ye wenhiim ciɛɛt, we mɛɛthkuɔ, ne luɔida ku guɔmda: luɔi cuk ya loi ne wɛɛr ku akɔl, kɛlke we buk ya nuan, a goku we ya wɛɛt ne welpiɛth ke Nhialic.

¹⁰ We ye duleek, ku Nhialic eya, ne nyiɛc ceŋ cii wɔ ya ceŋ ne weyic, yuku lajik ku lok car, ku cuk nɔŋ aciwuɔc ne weyic, ne kɔc ye gam:

¹¹ ci man nyic we luɔi e yuku luɔi ŋɛk ne week, ci man de ŋɛk ke mithke, yuku we jaam, ku weeiku week,

¹² ku yuku we yɔɔk, bak ya nyiɛc cath wene Nhialic, man ye we caal ne ceŋdeic ku nuɔm.

¹³ Ku yekene eya yeneka ye wɔ Nhialic leec riariar, ɣɔn loom we wɛt enɔŋ wɔɔk wɛt ci tuɔc week, wɛt ye ya ke de Nhialic, guɔka ciɛk loom ci wɛt de raan, ee lɔmka ci man de yic, ye wɛt de Nhialic, ke ye lui ne weyic we kɔc ye gam.

¹⁴ Ku week, we mɛɛthkuɔ, we ci jal ya ka ye kaar ke kanithai ke Nhialic ye tɔ ne Judaya ne Yecu Krithoic: ne ke cii we keeka tooka ya guum enɔŋ kɔc ke panduɔn, ci guɔm cik kek gum ne Judai;

¹⁵ kɔc ekee nɛk Bɛnydit Yecu ku nebii, ku ciecki wɔ wei, ku cik Nhialic ye yuum piɔu, ku yiki wuɔc kene kɔc kedhia;

¹⁶ ku yiki wɔ pɛn weet de Juurkɔk, weet bene ke ya luɔk; bi rɛɛcden thok ya tuɔm ne nyindhia: kaaci ɣok ke jal cooth ɣok thiekic edot.

¹⁷ Ku wɔɔk, mɛɛthkuɔ, we cukke dak ne keeakol likka, ku kaaye wegup, ku kacie ne piɔu, wɔ ci lok we ŋem nyin them areet ne dit de piɔu:

¹⁸ ku kee te cuk lɔ enɔŋ week naatok ka rou, agut ɣɛn Paulo, go Catan wɔ peen.

¹⁹ Yeŋo ye ya ŋɔthda, ku yumdɛn de piɔu, ku goldɛn de nuɔm? Cie ya week ne Bɛnydiitda Yecu nom te bii yen?

²⁰ Week eka ye ya nuɔmda ku yaka yumdɛn de wɔpiɔth.