1 Petero 5 - Lek Jot de Jecu Kritho 1940

¹ Roordit tɔ kene week, aatuɛrke, ɣan man ye randit eya, ku ya duleŋ de guɔm de Kritho, ku ya mat ne nuɔm bi tuɔl:

² Ya yaka bioŋ de Nhialic tɔ ne weyic biɔɔk, yaka ŋem ne ke de piɔnduɔn, ne piɔn de Nhialic, ke ce mɛce we; ke cie ke de weu rac, ne ye ke de piɔu;

³ ku duɔka piɔth ye dit ne baany ne kɔckuɔn tɔ ne wecin; yaka roth cɔk ye ke bii biok kaar.

⁴ Na miak tul Abiok dit, ke we bi naŋ gol de nuɔm cie riak.

⁵ We we rorthi eya, yaka roordit gam thook. Ku week wedhia, yaka wepiɔth cɔk kor ne roth, ku yaka roth kuɔny: Nhialic ee teer ke ran dit piɔu, ku ye athiɛi yiɛn ran ye piɔu kuur.

⁶ Yen yaka wepiɔth cɔk kor ne ciin rir de Nhialic, bi we jat nhial ne kol nyic.

⁷ Yaka nomduɔn lɔcɔt kan en, yenekee we ŋem apiath.

⁸ Yaka cath ne piɔth lir, yaka roth tiit; ke ye naŋ ater ke we ee ɣɔu, durieth, ee ciɛt koor ciu, ye ran bi cuet kɔr:

⁹ yaka teer bak ya kɔɔc ne gam adonduɔn, nyiɛcka guɔm ye we gum ee tɔ eya kene mɛɛthkuɔn tɔ ne piny nom.

¹⁰ Nhialiny de athiɛi ebɛn, man ci we cal ne nuɔmden ye tɔ athɛɛric ne Kritho, te ci we dar nɔk nemath ne guɔm, e kabi we ya cɔk lɔcap, ku cɔk we ye kɔɔc, ku cɔk we ye riɛr.

¹¹ Eeyabi baany bi ya tɔ ke yen athɛɛr ku athɛɛr. Amen.

¹² Thiluano, wanmathdɛn nɔŋ adot, ci man thɔŋ an en acan we gar thon thindie ne yeciin, tuɛr we lɛk we ya yekene aye athiɛi yic de Nhialic: yaka kɔɔc ecok ne yeyic.

¹³ Kanitha tɔ ne Babulon, ci lɔc etok kene week, amath week; ku yenekee cɔɔk de wendie Mak.

¹⁴ Mathka roth ne ciɛm de nhiɛr. Eeyabi dɔɔr ya tɔ kene week we kɔc tɔ ne Krithoic wedhia.