1 Petero 4 - Lek Jot de Jecu Kritho 1940

¹ Yen na ci Kritho gum ne guɔp, ke we muɔkka wepiɔth bak ya yenya; ne ke ye ran ci gum ne guɔp cen rɛɛc ya puɔl ne luɔi;

² bak bɛr ya piir ne guɔp ne piɔn de Nhialic ku cie kɔr rɛɛc de guɔp de raan.

³ Akolkuɔn ke acirnom acii we ke kuɛth ne luɔi de piɔn de Juurkɔk, ku cak cath ne nompaal, kɔr rɛɛc de guɔp, deŋ dit de piukeabiɛi, jam dit de miɔl, kuɛth e miau, ku duɔr de ka rɛc ke piny nom.

⁴ Ku kaaye gai ne ke ci we roth dɛɛny ne karac yic etok wene keek, ku yiki we laat.

⁵ Ku kaabi luɔiden dhil ne lek ne yenom yen man ci rɔt juik ne luŋ de kɔc piir ku kɔc ci thou.

⁶ Ne yekene acene welpiath lɛk kɔc ci thou eya bi ke luk e ke ye kɔc ne guɔp, ku bik piir enɔŋ Nhialic ne tiɛp.

⁷ Thok de kaŋ kedhia ee ɣeet; yen yaka wecok kuɛɛny, ku yaka cath ne piɔth lir agut lɔŋ:

⁸ ku ke war ke kedhia ee bak roth ya nhiar. Nhiɛr ee dun de rɛɛc thian.

⁹ Yaka roth gɔɔŋ te cin luɔm de rɔt:

¹⁰ acit man cene we miɔc yenekee cɔɔk bi we ye ya luɔi roth, ci duteek piɛth ke athiɛi kuɔt de Nhialic.

¹¹ Ya na ye raan weet, ke ne ye weet ci wɛt de Nhialic; Ye na ye raan kɔc luɔi, ke ne ye lui ne riɛr ci Nhialic yiɛn e: bi Nhialic bi noom ne kaŋ kedhia ne Yecu Kritho, man ye nuɔm ya kede ku riɛr athɛɛr agut athɛɛr.

¹² Kɔc nhiarke, duɔka ye gai ne many de ŋet ye bɛn enɔŋ week bi we them, ci kegɛiye ye we lɔny.

¹³ We ye mat ne guɔm de Kritho; yen yaka piɔth lɔyum, bak piɔth bɛr ya lɔyum ne yum gok te nyoothe nuɔmde eya.

¹⁴ Na ye we laat ne rin ke Kritho, ke we ye thiei; ne ke ye Jɔŋdiit de nuɔm ku Jɔŋdiit de Nhialic we nyuɔc. (Ee lɛt enɔŋ keek, ku kee nuɔm enɔŋ week.)

¹⁵ Ne cin ran de week ye gum ke ye atiir, ka rueny, ka ran ye kerac loi, ka ran ye rɔt taau ne kalei yic.

¹⁶ Na ye ran gum ne ye Kirithano, ke ne ci nyin ye riɔc; ne ye Nhialic noom ne keerinke.

¹⁷ Akɔl ee ɣeet bene luk gɔɔc dhien de Nhialic; ku na kɔne gɔɔc ne wɔɔk, ke bi yende miak enɔŋ ke kek kɔc ye wɛt de Nhialic rɛɛc?

¹⁸ Na bi ran lajik puɔth ne luak, ke ran ce piath ku ye ran de rɛɛc bi tuɔl yede?

¹⁹ Yen ne kɔc ye gum ne piɔn de Nhialic ne ke ye tipken yiɛn Duciɛk nɔŋ adot ne luɔi piɛthden.