1 Petero 3 - Lek Jot de Jecu Kritho 1940

¹ Ayinla, we diar, yaka wel ke rorkuɔn gam; ne ke na ci kɔc wɛt ye cak gam, e kaabike ya loom te cin wɛt ne luɔi piɛth de diarken;

² ne dai ye ke daai ne rerduɔn ye we reer emath.

³ Duɔka ceŋduɔn ye cɔk cit yuii de nhim de biak biyic, ku ceŋ de guɛn jini, ku pioth de alath;

⁴ ne ye ciɛt ke cii raan thian ne yepiɔu, ke ye piɔth ku cii ye riak, ke de piɔn luɔi ku piɔn lɔ diu, yen man ye ke de ciin gok ne Nhialic nyin.

⁵ Ee yinla ɣɔn diar lajik eya, ye roth gɛi Nhialic, aake ye roth kuɛm ne ka ke dheeŋ, ku yiki wel ke rorken gam:

⁶ ci man e ye Thara wel ke Abraɣam gam, ye cɔɔl ye bɛny: man ye mithke week emane, te ye we lui apiath ku cak ye riɔc ne ka yeneke gai ne riɔc.

⁷ Ku week eya, we ror, yaka reer wene diarkuɔn ke we ye roth nyic, ku yaka tiik theek ci man de tony niɔp, ku ci man ye we adiit etok ne athiɛi de piir; kɛlke lɔŋduɔn bi ya gel nom.

⁸ Yaka piɔth jal rɔm wedhia, ku yaka nyiin kuany ne roth, ku yaka roth nhiar ci ŋɛk ke manhe, ku yaka piɔth kac, ku yaka piɔth kuur:

⁹ duɔka rɛɛc ye dhuk nom ne rɛɛc, ku lɛt ne lɛt; athiɛi yene ye we ke dhuk; yenekee cɔɔlne week bak naŋ athiɛi bi ya adonyduɔn.

¹⁰ Ran ye piɔu naŋ bi piir ya nhiar, Ku ye akol lɔyum ŋem, Ke ne ye yeliep pɛn jam rac, Ku ye yethok peen ne adhuɔm:

¹¹ Ne ye rɔt wɛl wei ne rɛɛc, ku ye lui apiath; Ne ye dɔɔr kɔɔr, ku ye biɔth.

¹² Bɛnydit ee daai ne kɔc lajik, Ku yithke aaye ɣɔɔr ne lɔŋden: Bɛnydit ee nyin muɔn kene kɔc ye kerac loi

¹³ Yeŋa bi we ya yɔŋ, te ye we piɔth lɛth ne luɔi de kepiath?

¹⁴ Ku na ye lajik we cɔk gum, ke we ye thiei: duɔka ye riɔc ne ŋuukden, ku duɔka piɔthkuɔn cɔk ye lɔ etuk:

¹⁵ yaka Kritho cɔk ye dit ne wepiɔth ci Bɛnydit: yaka yin ne nyindhia bak raan ya leu ne dhuk ke ye thiɛc we ne ŋath ye tɔ ne weyic, ku yaka dhuk ne liɛr de piɔu ku rieu:

¹⁶ ne ke ye nyiny piɛth de piɔu tɔ ke we. Yen, na cak we ya jam arac, e kaabi ya cɔk riɔc nyin, kek kɔc ye piirduɔn de Krithoic lat.

¹⁷ Aŋuan, te tɔ en ne Nhialic piɔu, bak ya gum ne luɔi piath, ku cie luɔi rac.

¹⁸ Ne ke ci Kritho kan gum eya ne kerac, gum Kelajik ne kɔc ce lajik, bi wɔ lar enɔŋ Nhialic; ku ci cɔk thou ne riiŋ, ku jɔl ya piir ne tiɛp:

¹⁹ ela ci ya tiɛp, ke lɔ weet ne tiip ye tɔ te de dom;

²⁰ man ɣɔn reec gam ɣɔn tiite Nhialic ke ce leeth ne akol ke Noa, akol ke juɛr de riandit. Ku kɔc lik, bɛt nyin, yenekee ben luɔk ne piu.

²¹ Acit man de yeciɛn yiɛne luɛk we emane, baptith, ku kacie wɛɛk wei de acol de guɔp, e kɔr piɛth de nyiny de piɔu ye we Nhialic kɔr, ne jon de Yecu Kritho de rɔt,

²² man ye tɔ ne ciin cuec de Nhialic, ci lɔ pan nhial, ku malaikai ku kɔc ye tɔ ne riɛric ku riir aayeke cɔk tɔ ne riɛrdeic.