1 Korinthoi 4 - Lek Jot de Jecu Kritho 1940

¹ Ne kɔc ye wɔ tak ke wɔ ye ya awuut ke Kritho, ku yuku duŋeem ke ka ke Nhialic cikum.

² Ku kaye dhiil ne yok enɔŋ duŋeem, bi ya yok ne ye naŋ adot.

³ Ku na ye ɣɛn, e ke kethintet bene ɣa ya luk ne week ku ne luŋ de raan: ee yic, an ci rɔt ye luk atok.

⁴ Ku kacin kerɛɛc nyiɛc rɔt; ku yekene ace ɣa cɔk lajik: ke ye ɣa luk ee ya Bɛnydit.

⁵ Yen duɔka kɔn ya luk aŋoot Bɛnydit ke ken bɛn, yen man bi ka ci thian ne cuɔlic bɛi ne ɣɛɛric, ku bi tɛŋ de kɔc piɔth cɔk tiɛc; ku jɔl Nhialic raan ebɛn leec.

⁶ We ca lɛk kedie ku ke de Apolo enhia, bak ya wet ne wɔɔk ku cak kacigɔɔr ye waan; kɛlke ŋɛk bi piɔu ya dit ne ŋɛk guɔp.

⁷ Yeŋa ne week yic? ku yeŋo tɔ kene yin ne kɛne loom? ku na ne ca loom, ke yeŋo yin nom dit, ci ke kɛne loom?

⁸ We ci guɔ kuɛth, we ci guɔ bany, we ci ceŋduɔn yok te cin wɔɔk: eeya te yaka naŋ ceŋ, ku buk ya ceŋ eya wɔne week.

⁹ Aya cɔɔl, ya ci Nhialic wɔ jal taau ciɛnagut wɔ dutuuc, ci kɔc tit thuɔu: wɔ ye ya ke yene daai ne piny nom, ku ne malaikai, ku ne raan.

¹⁰ Wɔ ye ya acibeel ne ke de Kritho, ku we ye kaŋ nyic ne Krithoic; wɔ ye niɔp, ku we ye riɛr; we ye naŋ nuɔm, ku wɔ ye naŋ nyiil.

¹¹ Riarriar agut yethaane aye wɔ cɔk, ku kaye wɔ yal, ku kaye wɔ tat, ku kayene wɔ biak, ku cinku ɣɔnkuɔk ke ceŋ;

¹² ku yuku luɔi luut ne cinkuɔ: ela ya lɛɛte wɔ, ke wɔ thiei; ela ya ŋet wɔ, ke wɔ gum;

¹³ ya riethe wɔ, ke wɔ laŋ: wɔ ci cɔk ye acol de piny nom, ku wɔ ci jal ya ke ye cuat wei de keriɛc agut ci emane.

¹⁴ An ee ce keekake gar bak nyiin ya liɛr, ee ba we ya ŋuuk, ci mithciek nhiar keek.

¹⁵ Ne we cak ya naŋ bianabuur thiɛr de dupiooc ne Krithoic, ke we dhiac, ke we cin wurkuɔn juec: ne dhiɛth can we dhieeth ne Krithoic ne welpiath.

¹⁶ Yen we yake lɔŋ, ya yaka ɣa kaar.

¹⁷ Yekene yenekee tuɔc an week Timotheo, mɛnhdien nhiar nɔŋ adot ne Bɛnyditic, ran bi we ya cɔk ciit wenhiim ne ka yake loi ye tɔ ne Krithoic, aɣet ci man yan weet ne ɣan kedhia ne kanithaic ebɛn.

¹⁸ Kɔk aa piɔth dit, cɔlki yii caa bɔ enɔŋ week.

¹⁹ Ku na tɔ ne Bɛnydit piɔu, ke an bi dai lɔ; ku kacie wel ke ditden de kepiɔth kek bake nyic, ee riɛrden.

²⁰ Ne ke ci ceŋ de Nhialic ye kɔɔc ne wɛt, ee ya riɛr.

²¹ Wuɔde? ba lɔ ne weyic ne lec, ka ne nhiɛr kene kuur de piɔu?