1 Korinthoi 3 - Lek Jot de Jecu Kritho 1940

¹ Ku ɣɛn, mɛɛthcie, an ee ce we ye jaam ci ke jiɛm kɔc nɔŋ wei, we we ya jaam ci kapiiny, ku ci mith ajiɛl ne Krithoic.

² Ɣan ee ye we dɔp ne ca, ku caa we ye yiɛn riiŋ; ee kɛnka guɔ ya leu ne cuet: agut ci emane acak leu;

³ we ŋoot ke we ye kapiiny: ne ke ye tiɛl ku ɣok tɔ ne weyic, yen cakka ye kapiiny, ku cakka ye cath ci kɔc piiny?

⁴ Na ye ŋɛk jam, Ye an ye ke de Paulo; ku jam dɛ, Ye an ye ke de Apolo; cakka ye kɔc piiny?

⁵ Ye Apolo ye ŋa? ku ye Paulo ye ŋa? Aaye awuut ye week ke gam; ŋɛk ee naŋ ke cii Bɛnydit yiɛn en.

⁶ Aca com, ku piɔk Apolo; ku cɔk Nhialic ke kuɔt.

⁷ Yen ducum acie ke dɛ, ku yen yen man ye piook ee ciɛn ke dɛ; a kee ya Nhialic man ye ke cɔk kuɔt.

⁸ Yen ran ye com ku ran ye piook aaye tok: ku ŋɛk abi ariopde ya loom ci man de luɔide.

⁹ Wɔ ye lui wɔne Nhialic: we ye ya duɔm de Nhialic, ku yaka ya ɣɔɔt de Nhialic.

¹⁰ Athiɛi de Nhialic e ci yiɛn ɣɛn, ci man de atendiit de ɣoot nyic kaŋ, acan cok wɛc piny; ku jɔl ran dɛ buth nom. Ku nɛke raan ebɛn ye rɔt ŋem ne buth yene buth nom.

¹¹ Acin cook dɛ leu raan ne wec wɛr yeke ci wɛce, man ye Yecu Kritho.

¹² Ku na ye raan ye buth nom ne wɛnhjini, ka ne wɛnhrial, ka ne kur ke ciin dit, ka ne tiim, ka ne noon, ka ne bel:

¹³ ke luɔi de ŋɛk abi ya nyuɔɔth; abi akɔl cɔk tiɛc, ne many bii piny run; ku mac ne guɔpde abi luɔi de raan ya nyuɔɔth lan yin en de.

¹⁴ Na ye ran ye keden ci loi dhiac, ke ci buɔth ne yenom, e kabi ariɔp loom.

¹⁵ Ku na ye ran bi keden ci loi nyop, ke keden ci loi ee maar, ku luak ne guɔpde; ku kee luɔk ne mac.

¹⁶ Kuɔcka ke we ye ya yekalu de Nhialic, ka kuɔcka lan ye Jɔŋdiit de Nhialic ɣap ne weyic?

¹⁷ Na ye ran ye yekalu de Nhialic riɔk, e kabii Nhialic ya riɔk; ne ke ye yekalu de Nhialic lajik, we eka ye ya yeyekalune.

¹⁸ Ne ye ciɛn ran ye rɔt dhoom. Na ye ran ye tak ye nyic kaŋ ne yepinye nom ne weyic, ke ne ye ya acibel, yeneka ben kaŋ ya nyic.

¹⁹ Nyiny de kaŋ de yepinye nom ee ya beel enɔŋ Nhialic. Ee gɔɔr, Ya yenekee kɔc nyic kaŋ dɔm ne pɛlic:

²⁰ ku ya, Bɛnydit ee tɛŋ de kɔc nyic kaŋ nyic, ke ye ya ciɛlic.

²¹ Yen ne cin ran ye ran dɛ door. Ne ke ye kaŋ kedhia ya kakuɔn;

²² yi Paulo, ku Apolo, ku Kepath ku piny nom, ku piir, ku thou, ku ka tɔ, ku ka bi ya bɛn; aaye ya kakuɔn kedhia;

²³ ku we ye ya ka ke Kritho, ku ye Kritho ya ke de Nhialic.