1 Korinthoi 2 - Lek Jot de Jecu Kritho 19401 Ku ɣɛn, mɛɛthcie, ɣɔn bɛi an enɔŋ week, an e ce bɔ wɔne nyiɛc jam ku ne nyiny de kaŋ ɣɔn yan we lɛk kacikum ke Nhialic. 2 An e ci piɔu lɔ gɔc ba ciɛn ke nyiɛc ne weyic, a ye Yecu Kritho yetok man ci piaat. 3 Ku an e ye tɔ wɔne week ne niɔpic, ku ne riɔcic, ku ne lɛth ditic. 4 Ku jamdie kene weetdie aake cie wel ye kɔc kuɛm nhiim ke nyiny de kaŋ, aake ye ya nyuuth de Jɔŋdit ku de riɛr: 5 kɛlke gamduɔn bi ya kɔɔc, ne nyiny de raan, ke cie ne riɛr de Nhialic. 6 Wɔ ye jam ne nyiny de kaŋ ne kɔc lajik yic: ku kacie ya nyiny de yepinye, ku ci ye ke de medook ke yepinye, ka bi ya ya ciɛlic: 7 wɔ ye jam ne nyiny de Nhialic ne kecikum, agut nyiny ci thian, ke cii Nhialic yok ke piny ŋoot bi ya nuɔmda: 8 ke cin medoŋ toŋ de yepinye nom nyic en: na ne nyicki, e kee te kenki Bɛnydiit de nuɔm piaat. 9 Yen kee gɔɔr, Ya ka ken nyin ke ŋem ku ken yic ke piŋ, Ku kenki lɔ ne raan piɔuic, Keriɛc ci Nhialic juɛr keek kek kɔc ye ye nhiar. 10 Ku kaaye Nhialic ke nyuɔth wɔɔk ne Jɔŋdit: Jɔŋdit ee keriɛc ebɛn kɔɔr, agut kathuuth ke Nhialic. 11 Yeŋa ye tɔ ne kɔc yic ye ke de raan nyic, te cen e tiɛp de raan ke ye tɔ ne baŋ thin? yenekee cɔɔk de ka ke Nhialic cin en ran nyic ke, a kee Jɔŋdiit de Nhialic. 12 Ku ke cuk loom acie jɔŋ de piny nom, ee jɔŋ de Nhialic; buk kaŋ ya nyic ka yeke yiɛn wɔɔk ne Nhialic ne awaiyic. 13 Ku keeka yi wɔ ke jam eya, ku kacie ya wel ye nyiny de raan ke weet, kaaye ya ka ye Jɔŋdit ke weet; wɔ ye ka ke wei thɔŋ wei. 14 Ran de kapiiny ace ka ke Jɔŋdiit de Nhialic ye loom: aaye ya ka ke beel enɔŋ en, ku cii cokken ye leu ne nyic, ne ke yene ke dot ne wei. 15 Ran ye naŋ wei ee kaŋ kedhia dot; ku yen ne guɔpde acin ran ye ye dot. 16 Yeŋa ye tɛŋ de Bɛnydit nyic, bi ya piɔc? Ku wɔɔk, wɔ ye naŋ tɛŋ de Kritho. |