1 Jɔn 5 - Lek Jot de Jecu Kritho 1940

¹ Raan ebɛn ye Yecu gam ye kee Kritho aye dhieth ne Nhialic: ku raan ebɛn ran ye medhieth nhiar, ee ke ci dhieth nhiar eya.

² Ayuku nyic ke wɔ ye mith ke Nhialic ne yekene, te ye wɔ Nhialic nhiar, ku yuku looŋke loi.

³ Nhiɛr de Nhialic eke, ee buk looŋke ya loi: ku looŋke aacie thiɛk.

⁴ Ke ci dhieth e Nhialic ebɛn ee ka ke piny nom tiam; ku tiɛm ye ka ke piny nom tiam, ee ya gamda.

⁵ Ku yeŋa ye ka ke piny nom tiam, cie ran ye gam ye Yecu ee Wen de Nhialic?

⁶ Yenekee ci bɛn ne piu ku riɛm, ye Yecu Kritho; ku kacie piu kepɛc, kaye piu kene riɛm.

⁷ Ku Jɔŋdit ee dulek, ne ke ye Jɔŋdit yic.

⁸ Yen duleek aatɔ keediak nhial, Wun, ku Wa, ku Jɔŋdiit Lajik: ku kaamat keediak netok. Ku duleek aatɔ keediak ne piny nom, Jɔŋdit, ku piu, ku riɛm: ku yediaŋe ee mat netok.

⁹ Na yuku ka lek kɔc ke wɔ gam, ke ke ye Nhialic lɛk wɔ adit e yen; ku ke ye Nhialic lɛk wɔ eke, ee ci wɔ lɛk ne Wende.

¹⁰ Ran ye Wen de Nhialic gam abi ya naŋ lek: ran ci Nhialic ye gam ee Nhialic cɔk ye alueeth, ne ke ken en lek ci Nhialic ye lɛk ne Wende gam.

¹¹ Ku lek eke, ye Nhialic ee wɔ yiɛn piir athɛɛr, ku yepiire atɔ ne Wendeic.

¹² Ran ye naŋ, Wende ee naŋ piir; ku ran cin Wen de Nhialic acin yepiire.

¹³ Keekake aacake gaar week, we kɔc ye rin ke Wen de Nhialic gam, bak ya nyic ke we ye naŋ piir athɛɛr; ku bak rin ke Wen de Nhialic ya gam.

¹⁴ Ku gei ye wɔ roth gɛi ye eke, na yuku ke dɛ thiɛc e ci man de yepiɔu, e kee wɔ piŋ:

¹⁵ ku na yuku nyic ke ye wɔ piŋ ne ke dɛ ebɛn yuku thiec, ke yuku nyic ke wɔ ye naŋ kacukke thiɛc en.

¹⁶ Na ye raan manhe ŋem ne loi kerac ke cie ke de thou, e kabi thiec ku kabii Nhialic yiɛn piir ne ke kek keek man ce kerɛɛc de thou ye loi. Rɛɛc de thou ee tɔ: ku kacie yekene yene luɛl ya bi ya thiec.

¹⁷ Luɔi ce lajik ebɛn ee ya rɛɛc: ku rɛɛc cie ke de thou ee tɔ.

¹⁸ Ayuku nyic raan ebɛn ye dhieth ne Nhialic ace kerac ye loi; ku yen man ci bɛn bei enɔŋ Nhialic aye muk, ku kacii jɔŋ rac ye jak.

¹⁹ Ayuku nyic ke wɔ ye ka ke Nhialic, ku piny nom ebɛn ee tɔ ne rɛɛcic.

²⁰ Ku kayuku nyic ke Wen de Nhialic ci bɛn, ku ci wɔ yiɛn adot, buk ya nyic yen man ye yic, ku wɔ ye tɔ ne yeyic yen man ye yic, yen Wende Yecu Kritho. Yenekee Nhialiny yic, ku ye piir athɛɛr.

²¹ Miththiicie, yaka roth tiit ne eidool. Amen.