1 Jɔn 2 - Lek Jot de Jecu Kritho 1940

¹ Miththiicie, keekake aayake gaar week, bak ciɛn kerɛɛc yaka loi. Ku na ye raan kerac loi, ke wɔ nɔŋ Dukuny e Wun nom, Yecu Kritho lajik: ku kee duwerda ne karɛckuɔ:

² ku yen guɔp ee ke puk karɛckuɔ; ku kacie kakuɔ wɔpɛc, ee ke de tiɔp nom ebɛn eya.

³ Ku kayuku nyic ne yekene lan ye wɔ ye nyic, te ye wɔ looŋke loi.

⁴ Ran ye jam, Ye kaya nyic, ku cii looŋke ye loi, e ke ya alueeth, ku ye yic ciɛn yic:

⁵ ku ran ye wɛtde loi, yerane neyic acii nhiɛr de Nhialic ya yic ne yeyic. Yekene aye wɔ ye nyic lan ye wɔ tɔ ne yeyic:

⁶ ran ye ye luel ye ye ceŋ ne yeyic ee cath dhiil eya ci man e yen cath.

⁷ Kɔc nhiarke, acin loŋ jot ya gaar we, ee loŋ thɛɛr e tɔ ke week ɣɔn ciɛke kaŋ: loŋ thɛɛr ee wɛt cak piŋ.

⁸ Loŋ jot bɛr gaar week, ee ke ye ya yic ne yeyic ku weyic; ne kee jiɛle cuɔl, ku go ɣɛɛr ye yic guɔ ya ruɛr.

⁹ Ran yee luel ye tɔ ne ɣɛɛric, ku ye manhe maan, e kee tɔ ne cuɔlic agut ci emane.

¹⁰ Ran ye manhe nhiar ee ceŋ ne ɣɛɛric, ku ye ciɛn ke yen kɔth ne yeyic.

¹¹ Ku ran ye manhe maan ee tɔ ne cuɔlic, ku ye cath thin, ku ye te yen lɔ thin kuc, ne ke cii cuɔl ye cɔɔr.

¹² We yaake gaar, we miththiicie, ne ke cene karackuɔn pal week ne rinke.

¹³ We yaake gaar, we wurcie, ne ke ye we ye nyic ne tɔ ɣɔn ciɛke kaŋ. We yaake gaar, we rorthi, ne ke ci we jɔŋ rac tiam. We cake gaar, we miththii, ne ke ye we Wun nyic.

¹⁴ We cake gaar, we wurcie, ne ke ye we ye nyic ne tɔ ɣɔn ciɛke kaŋ. We cake gaar, we rorthi, ne ke rir we, ku ye wɛt de Nhialic ceŋ ne weyiic, ku cak jɔŋ rac tiam.

¹⁵ Duɔka piny nom ye nhiar, ku ka tɔ ne piny nom. Na ye raan piny nhiar nom, ke nhiɛr e Wun ee liu ne yeyic.

¹⁶ Ka tɔ ne piny nom kedhia, ee kɔr rɛɛc de guɔp ku kɔr rɛɛc de nyin, ku piɔndit de piir, aacie ka ke Wun, aa ka ke piny nom.

¹⁷ Ku piny nom ee jaal, kene kɔr de kake: ku ran ye piɔn de Nhialic loi ee ceŋ athɛɛr.

¹⁸ Miththi, kol ciɛn ee tɔ: ku ci man ci we ye piŋ ya atiir de Kritho kabɔ, ke atiir juec ke Kritho ci roth jɔt emane; ekene eka ye wɔ ye nyic lan tɔ kol ciɛn.

¹⁹ Aake jiɛl ne wɔyic, ku kaake cie kɔc ke wɔyic; ku na ne ke ye kɔc ke wɔyic, e ke te cik dhiac kene wɔ: ku kajaal lek biyic, bik roth nyuɔth lan cik kek ye kɔc ke wɔyic kedhia.

²⁰ Ku we nɔŋ tony de Toŋ Lajik cen we tɔc, ku we ye kaŋ nyic kedhia.

²¹ We kɛnke gaar ne kuny kuc we yic, ku kee ke nyic we ye, ne cin luenh de yic.

²² Ŋa ye alueth? Cie yen man ye Yecu jai ke ye Kritho? Yenekee ya atiir de Kritho, ee yen man ye Wun jai ku Wa.

²³ Raan ebɛn ran ye Wa jai, yenekee ciɛn Wun; ran ye Wa gam, ee naŋ Wun eya.

²⁴ Ku week, cakka ke cak piŋ ɣɔn gɔle kaŋ ye ceŋ ne weyic. Na ye ke cak piŋ ɣɔn gɔle kaŋ ceŋ ne weyic, ke we bi ya ceŋ ne Wayic eya, ku ne Wunic.

²⁵ Ekene yenekee lek e lek en e wɔ, yin piir athɛɛr.

²⁶ Keekake aacake gar we ne keek man bi we ya muɔr.

²⁷ Ku week, tony cak loom enɔŋ yen ee ceŋ ne weyic, ku we ci toŋ dɛ ye ŋaŋ bi we ya piɔc; ku tonyde ee we piɔc ne kaŋ kedhia, ku kee ya yic, ku cii ye ya lueth, ku ci man cen we ya piɔc, ke we ye ceŋ ne yeyic.

²⁸ Ku emane, miththiicie, yaka ceŋ ne yeyic; buk ya ŋeeny, te tul en, ku cuk nyin riɔc ne yenom te bii yen.

²⁹ Na yaka nyic ke lajik, ke nyiɛcka eya raan ebɛn ye lajik loi ee ye dhieth ne yen.