SANTIAGO 4 - Lengua Sur (Enxet) Nuevo Testamento

Ekleklamo egwáxok ektémakxa nak keso náxop

¹ ¿Háxko eñamakxa m'a kélenmexamaxche nak? ¿Háxko nahan eñamakxa m'a apkelátegmomap nak énxet'ák kélnepyeseksa kéxegke? Cha'a keñamak ma'a ekmaso nentémakxa nak, ennapmáxkohol'a cha'a ekpakméteykha egwáxok.

² kélmenyék cha'a kéxegke aksok, akke cha'a kólwet'ak; kélakhak nahan cha'a kélmók, katekkesek nahan cha'a kélyásekkeso xama aksok enxoho, agkok cha'a kólwet'ak aksok, kólátegmoweyxchek cha'a, keñe kóltehek cha'a kélenmexamaxche. Megkólwetyek cha'a kéxegke aksok kélmámenyého, hakte megkólmaxnék ma'a Dios.

³ Kélmaxnakkek agkok nahan cha'a aksok Dios, keñe megkólxakyek, hakte sagkek katnehek kélwáxok neyseksa kélmaxnagko, hakte kélmenyék aksa kóltawasha eñama m'a aksok kélyespagko nak.

⁴ Kéxegke kéltaha nak kélyenseyam kélyetlo Dios, ¿yagkólya'ásegkok kéxegke ektaha enmexma Dios ma'a negásekhayo nak aksok keso náxop? Negko'o ektahakxa enxoho negmáheyo agásekhohok ektémakxa nak keso náxop, nenmexma antemekxak ma'a Dios.

⁵ Nágkólána aksa ekteme agko' ekpeywa eknaktáxésamaxche s'e: “Apchásekha'awók Dios yetlo apkelmeyeykha m'a espíritu sempekkenchesama axta egwáxok negko'o.”

⁶ Empasmeyk eyke cha'a negko'o Dios yetlo segásekhayo, hakte temegkek eknaktáxésamaxche s'e: “Apkenmexchek cha'a Dios ma'a énxet'ák apkeleymákpoho nak, appasmeyk eyke cha'a Dios yetlo apkelásekhayo m'a énxet'ák megkaleymáxkoho nak apwáxók.”

⁷ Kólyahakxoho cha'a Dios, kólenmex cha'a kelyekhama', keñe sat kayenyók kéxegke.

⁸ Kólyepetkoho cha'a Dios, keñe sat épetkohok kéxegke m'a Dios. ¡Kólyenyes kélmék kéltaha nak kéllané megkólya'asáxma! ¡kólteme eyáxñeyo kélwáxok kéxegke kéltaha nak kélmáheyo kólásekhohok Dios, tén han kélmáheyo nak kólásekhohok ektémakxa nak keso náxop!

⁹ ¡Kallapwomák, kóllekxagwaha nahan! ¡kóllekxagwaha yakwayam enxoho kayakmagkasek ma'a ektémakxa nak kéllektegmeykha, kallapwomák yakwayam enxoho kayakmagkasek ma'a ektémakxa nak ekpayheykekxa kélwáxok!

¹⁰ Kólteme megkeymáxkoho kélwáxok nápakto' Wese' egegkok Dios, keñe sat nahan etnésesek kéxegke Dios néten nepyeseksa kélnámokkok.

Nágkólteme kélyekpelchémo kélyáxeg

¹¹ Elyáxeg, nágkólxén ekmaso kélmók. Hakte negko'o ektahakxa enxoho nenxeyenma ekmaso egyáxeg, esenhan nentaha enxoho negyekpelchémo, sagkek katnehek nenxeyenma m'a eltémókxa nak antehek segánamakxa, antehek nahan nenyekpelchémo m'a segánamakxa. Aptemék agkok xép apyekpelchémo m'a eltémókxa nak antehek segánamakxa, aptemesásamákpoho apagko' etnehek xép apyekpelchémo m'a segánamakxa, yakwayam nak eykhe etnehek apkelyaheykekxoho exchep.

¹² Apwánxa xama m'a aptaha nak aptekkeso segánamakxa, aptaha nak han segyekpelchémo, cham'a apmopwána nak ewagkasek teyp pók, aptaha nak han apmopwána yának emátog pók; wánxa agkok ¿háxko katnehek xép etnehek apyekpelchémo pók? Neghawók egmók.

Magya'áseyak yakwánxa katnehek mók ekhem

¹³ Kóleyxho hana kéxegke kéltéma nak cha'a kélpeywa s'e: “Sakhem sat ólmahagkok apyawakxa tegma, saka esenhan. Sat aghók xama apyeyam ma'a, sat ólyanmagkasaxchek ma'a, anxámásekxak sat selyakye,”

¹⁴ Megkólya'asagkek kéxegke yakwánxa katnehek kélha mók ekhem. Kéxegke kélteme kélhawo teyáméten ekteyapmol'a yakwatakxoho, ñohok nahan kamaskok.

¹⁵ Akke kéméxchek cha'a kóltehek kélpeywa s'e: “Apkeltamhok sat agkok Wese' egegkok, aghók sat ma'a, anlának sat nahan se'e, esenhan anxének ma'a mók aksok enxoho.”

¹⁶ Kéllenxanakmók eyke kéxegke kélteme eyémáxkoho kélpeywa; ekyókxoho ektémakxa nak eyémáxkoho nempeywa ekteme ekmaso agko', cháxa ektéma nak.

¹⁷ Negko'o ektahakxa enxoho negya'áseykegkoho nenlané aksok ektakmela, keñe manlanye', nenlanak mólya'asáxma nentaha enxoho xa.”