SANTIAGO 3 - Lengua Sur (Enxet) Nuevo Testamento

Egaxkok

¹ Elyáxeg, nágkólho aksa exámak kélnepyeseksa kéxegke m'a énxet'ák apkelxekmóso nak apnámokkok, hakte kélya'ásegkok kéxegke negko'o nentaha nak nelxekmóso ennámokkok peya hẽlyekpelcháseshok ekyentaxno agko', megkaxók sat ma'a pók énxet'ák nak.

² Nenxámokxoho cha'a yetnak magakhémo; apchakhawók agkok aptahakxa appeywa enxama, méko enxoho megyakhémo aptahakxa appeywa, cháxa énxet apteme appéwomo xa, apteme nahan apmopwána elanagkohok aptémakxa.

³ Negatchesesek agkok apwáxok yatnáxeg negatchesesamol'a apátog yakwayam anlánesagkok apxega, antemésesek cha'a m'a negmokókxa enxoho antemésesek yakwayam hẽlyahakxoho'.

⁴ Kóllano nahan ektémakxa nak yántakpayhe, ekwányam eykhe katnehek, kayhek eykhe nahan katnehek ma'a exchahayam ektaha nak ekyégeyak, ketsék eykhe m'a appeykesáseykegkaxa nak ekxega m'a ektaha nak apkelpeynchámeyak, ey'aksek ma'a apmokókxa enxoho ey'aksek.

⁵ Hawók nahan ektémakxa nak egaxkok ma'a, ketsék eykhe egaxkok ekyetno nak negyókxa, kának eyke kawának ma'a ekyókxoho aksok ekhágko nak. Kóllano hana ektémakxa nak han ketsék táxa awanchek kawatnek naxma ekwányam.

⁶ Máxa táxa egaxkok negko'o, ekteme ekyetnamakxa agko' aksok ekmaso ektémakxa nak keso náxop, ekyetna nak han negyókxa. Cháxa eksawheykekxoho nak ekpeysegkeso negyókxa xa, megkaspóneykxa táxa nahan ektekkeso xa táxa nak, hentawasha nahan cha'a neyseksa negha keso náxop.

⁷ Apwanchek eltamaksek énxet ekxámokxoho ektémakxa nak aksok nawha'ák ello, náta tén han ma'a yéwa, tén han ma'a aksok nawha'ák eleñama nak wátsam ekwányam, apkeltámeseykegkek nahan.

⁸ Wánxa agkok, megkólwanchek eyke kóltamaksek ma'a egaxkok, cháxa xama aksok ekmaso agko' megkahayo nak kóltamaksek xa, láneyók nahan aksok ekmaso segakhamo nak.

⁹ Egaxkok nahan keñamak ektakmela cha'a nenxeyenma Dios Egyap, keñe cha'a kasók nenxeyenma m'a énxet aptaha nak apkelánamap aphawo Dios.

¹⁰ Egátog nahan katyapok ektakmela nempeywa, tén han katyapok ma'a ekmaso nak nempeywa. Elyáxeg, megkatakmelak katnehek xa ektaha nak.

¹¹ Yawanchek kalenchahaxchek ekteyapma yásek yegmen, tén han yegmen ekmátsa m'a ekteyapmakxal'a yegmen.

¹² Ekhawo ektémakxa nak han higo yámet ekyexna, yawanchek katnekxak ekyexna m'a yámet ekweseyl'a aceituna, cham'a ekmáskel'a ekyexna, keñe m'a anmen yámet nak, yawanchek katnekxak ekyexna m'a ektémakxa nak higo ekyexna. Elyáxeg, yawanchek nahan katyapok xamo' yásek yegmen ma'a ekteyapmakxal'a yegmen ektakmela negyamol'a.

Ekmámnaksoho negya'ásegwayam

¹³ Apyetneyk agkok kélnepyeseksa kéxegke m'a ekha nak apya'áseyak tén han ma'a apmopwána nak ékpelkoho', exekmósho ektémakxa nak apya'áseyak yetlo ektakmela aptémakxa, tén han yetlo m'a megkeymáxkoho nak apwáxok, ektaha nak ekméso m'a apya'ásegwayam nak.

¹⁴ Kél'awók agkok kéxegke ektekkesa eklo kélwáxok ma'a kélyásekkáseykha nak, tén han kóllának aksok eñama m'a kélenmexamaxche nak, chakho' kapayhekxak kélwáxok kéxegke, kéllanak ma'a aksok enmexma nak amya'a ekmámnaksoho.

¹⁵ Hakte megkañamak Dios xa ektéma nak negya'ásegwayam, náxop akke keñamak xa, ekteme nahan énxet elchetamso apwáxok, kelyekhama' nahan keñamak xa.

¹⁶ Keytek móltakmelchásamáxche m'a ekyetnakxa enxoho nelyásekkáseykha tén han ma'a nelenmexamaxche nak, keytek nahan ma'a ekyókxoho nentémakxa ekmaso nak;

¹⁷ keñe m'a énxet'ák ekyetna nak negya'ásegwayam eñama nak Dios, eláxñeyo apkeltémakxa etnahagkok, meyke ektahakxa apwáxók nahan etnahagkok, eltakmela apwáxok nahan etnahagkok; apmopyósa elanok pók nahan etnahagkok, meyeykhakpek nahan elanok pók, melyexamakpoho apkeltémakxa nahan etnahagkok, aksok eltakmela nahan elanagkok.

¹⁸ Enxet'ák ektaha nak apkelenxányam etekkesek meyke ektahakxa egwáxok, elanagkok nahan meyke ektahakxa egwáxok, yakwayam enxoho étak ma'a nentémakxa ekpéwomo nak.